Taga a kɔnɔkow lajɛ

Taga a kɔnɔnakow lajɛ

 SAPITIRI 106NAN

Yezu be ntalen fila la ɛrɛzɛnforow koo la

Yezu be ntalen fila la ɛrɛzɛnforow koo la

MATIYO 21:28-46 MARIKI 12:1-12 LUKA 20:9-19

  • YEZU BE NTALEN LA DENCƐ FILA KOO LA

  • YEZU BE NTALEN LA ƐRƐZƐNFORO SƐNƐBAGAW KOO LA

Alabatoso kɔnɔ, sarakalasebagaw kuntigiw ani dugu cɛkɔrɔbaw tun ye Yezu ɲininga ko a ye setigiya sɔrɔ min ka koow kɛ? Yezu y’u jaabi cogo dɔ la fɔɔ u ma se ka foyi fɔ tugun. O kɔ, a ye ntalen dɔ la min b’a yira u ye mɔgɔ sifa minw ye tigitigi.

Yezu ko: “Deen fila tun be cɛɛ dɔ fɛ. A y’a fɔ deen fɔlɔ ye ko: ‘Bii, ne b’a fɛ i ka taga baara kɛ foro kɔnɔ.’ Deen fɔlɔ nin y’a jaabi ko: ‘Ne tena se ka taga.’ Dɔɔni a nimisara, a ye sira minɛ ka taga foro la. Facɛ nin tagara deen filanan fɛ, k’a fɔ ale ye fana, deen ko: ‘Ɔnhɔn baba, ne bena taga.’ Nga a ma taga. O deen fila nunu cɛma, jumɛn le ye a facɛ sago kɛ?” (Matiyo 21:28-31). O ɲiningali jaabili gwɛnnin lo: deen fɔlɔ lo labanna k’a facɛ sago kɛ.

O kama Yezu y’a fɔ a kɛlɛbagaw ye ko: “Ne b’a fɔ aw ye tiɲɛ na ko lɛnpominɛlaw ni kakalamusow bena kɔn ka don aw ɲa Ala ka masaya kɔnɔ.” Lanpominɛlaw ni kakalamusow tun tɛ Ala sago kɛ a daminɛ na. Nka, u be i n’a fɔ deen fɔlɔ. U nimisara kɔfɛ, ani u be baara kɛra Ala ye sisan. K’a sɔrɔ diinan kuntigiw be i n’a fɔ deen filanan. U b’a fɔ k’u be baara kɛ Ala ye nka u t’o kɛra tiɲɛn tiɲɛn na. Yezu ko: “Zan [Batizelikɛla] nana aw fɛ ka taamacogoɲuman yira aw la. Aw ma sɔn o ma, nga lɛnpominɛlaw ni kakalamusow sɔnna o ma. Aw y’o ye, aw ma sɔn k’aw dusu yɛlɛma ka la a la.”—Matiyo 21:31, 32.

Yezu ye ntalen wɛrɛ la tugun. Sisan ta la, a m’a yira dɔrɔn ko diinan kuntigiw tɛ baara kɛra Ala ye dɛ, a ko u ka jugu yɛrɛ. A ko: “Cɛɛ dɔ ye ɛrɛzɛnforo bɔ. A ye kogo lɔ k’a lamini, ka dingɛ sogi ka ɛrɛzɛn nin jii bɔyɔrɔ dilan, ka sangaso lɔ a kɔlɔsibagaw ye. A y’a don baarakɛla dɔw bolo. O kɔ, a tagara taama na. Ɛrɛzɛn mɔna tuma min na, a y’a ka jɔɔn dɔ ci baarakɛla nunu fɛ ko a ka taga ale niyɔrɔ minɛ. U y’o jɔɔn nin minɛ k’a bugɔ k’a bololakolon bila ka taga. Forotigi ye jɔɔn wɛrɛ ci u fɛ. U y’o fana bugɔ a kuun na k’a nɛni. Forotigi ye jɔɔn wɛrɛ bila ka taga, u y’o faga. O kɔ, a ye jɔɔn caaman ci u fɛ tugu, u ye dɔw bugɔ ka dɔw faga.”—Mariki 12:1-5.

Minw be Yezu lamɛnna, yala u y’o ntalen faamu wa? N’a sɔrɔ u hakili be kira Ezayi ka kumaw nunu na: “Masaba, Setigi ka ɛrɛzɛnforo ye Isirayɛlidenw le ye. Zude mara mɔgɔw le kɛra ɛrɛzɛnsunw ye, minw koo tun ka d’a ye haali. A tun be tilenninya le kɔnɔn’u fɛ, nga tilenbaliya le be kɛra.” (Ezayi 5:7). Yezu ka ntalen n’o kiraya kuma bɛɛ ye kelen ye: Jehova lo ye forotigi ye, Israɛl siya lo ye ɛrɛzɛnforo ye, kogo min kɛra ka foro lamini walisa k’a latanga, o ye Ala ka Sariya lo ye. Jehova ye kiraw ci ka na a ka mɔgɔw kalan ani k’u dɛmɛ ka kɛ ni kɛwale ɲumanw ye.

Nka, “jɔɔn” minw cira foro ‘baarakɛlaw’ ma, u y’u tɔɔrɔ ani k’u faga. Yezu y’a ɲɛfɔ ko: “Mɔgɔ kelen min tora forotigi fɛ sisan, o y’a dencɛ ye. A tun b’o kanu kosɔbɛ. A y’o fana ci u fɛ a laban na. A tun be miiri ko: ‘U bena n dencɛ boɲa.’ Nga baarakɛlaw y’a fɔ ɲɔgɔn ye ko: ‘Nin le ye cɛntala ye, aw ye na an k’a faga, cɛɛn nin bena kɛ an ta ye.’ U y’a minɛ k’a faga.”—Mariki 12:6-8.

Sisan, Yezu y’u ɲininga ko: “Forotigi bena mun kɛ sa?” (Mariki 12:9). Diinan kuntigiw y’a jaabi ko: “Wajibi lo, a tena makari o mɔgɔjugu nunu na, a bena u faga, k’a ka foro kalifa baarakɛla dɔ wɛrɛw ma, minw ben’a niyɔrɔ d’a ma ɛrɛzɛnmɔtuma na.”—Matiyo 21:41.

Diinan kuntigiw m’a lɔn k’u ye jalaki ben u yɛrɛw kan ten sabu u ye Jehova ka “ɛrɛzɛnforo” “baarakɛla” dɔw ye. O ɛrɛzɛnforo ye Israɛl siya ye. Jehova tun be min ɲinina o baarakɛlaw fɛ, o ye ka limaniya ale Dencɛ la, o min ye Masiya  ye. Yezu y’o diinan kuntigiw filɛ u ɲɛdaw la ani a y’a fɔ ko: “Siga t’a la, aw ye yɔrɔ dɔ kalan Ala ka kuma na min b’a fɔ ko: ‘Bonlɔlaw tun banna kabakuru min na, o nana kɛ kabakuru barikaman ye, boon nɔnkɔn ta. O ye kabako ye an ɲana.’” (Mariki 12:10, 11). O kɔ, Yezu y’a fɔ ka gwɛ u ye ko: “Ne b’a fɔ aw ye k’o cogo kelen la, Ala ka masaya bena bɔsi aw la, ka di siya wɛrɛw ma. Olu bena kɛwaliɲuman kɛ.”—Matiyo 21:43.

Sariya karamɔgɔw ni sarakalasebagaw kuntigiw y’a faamu ko Yezu ka “talen nin ɲaa sinnin tun be olu le ma.” (Luka 20:19). U b’a fɛ k’a faga o wagati yɛrɛ la, ale min ye “cɛntala” yɛrɛ yɛrɛ ye. Nka, u be siranna jama ɲɛ sabu jama be Yezu jati kira ye. O kama u m’a ɲini k’a faga o yɔrɔnin bɛɛ.