Taga a kɔnɔkow lajɛ

Taga a kɔnɔnakow lajɛ

 SAPITIRI 124NAN

Zuda ye Yezu don mɔgɔ juguw bolo

Zuda ye Yezu don mɔgɔ juguw bolo

MATIYO 26:47-56 MARIKI 14:43-52 LUKA 22:47-53 ZAN 18:2-12

  • ZUDA YE YEZU JANFA NANKƆ KƆNƆ

  • PIYƐRI YE CƐƐ DƆ TULO TIGƐ

  • U YE YEZU MINƐ

Dugu tilara fɔɔ ka janfa. Sarakalasebagaw ye warigwɛ 30 di Zuda Isikariyɔti ma walisa a ka Yezu janfa. O kama, Zuda tagara ni sarakalasebagaw ni Fariziɲɛ caaman ye walisa ka Yezu yɔrɔ ɲini. Ɔrɔmu sɔrɔdasi dɔw ni komandan fana be n’u ye ani kɛlɛkɛminanw b’u bolo.

Tɛmɛnkan seli dumuni tuma na, Yezu tun y’a ɲini Zuda fɛ a ka taga. N’a sɔrɔ Zuda sinna ka taga sarakalasebaga kuntigiw lo fɛ (Zan 13:27). U y’u ka kuntigi dɔw ani sɔrɔdasi dɔw lajɛn. Yezu n’a ka cidenw ye Tɛmɛnkan seli kɛ boon min kɔnɔ, n’a sɔrɔ Zuda kɔnna ka taga n’u ye o yɔrɔ la le. Nka sisan, o jamaba ye Sedirɔn kɔkɛnɛ tigɛ ani u be tagara Zɛtisemane nankɔ kɔnɔ. Ka fara kɛlɛkɛminanw kan, fitinɛw ni tɔrɔsiw b’u bolo sabu u jijanin lo ka Yezu yɔrɔ ye.

Zuda y’o jamaba ɲɛminɛ, u be tagara oliviyeyirikulu kan. A lanin b’a la ko a bena Yezu sɔrɔ yen. Lɔgɔkun tɛmɛnin, Yezu ni cidenw tora ka taga ni segi kɛ Betani ni Zeruzalɛmu cɛ. U tun be lɔ ka lafiɲɛ Zɛtisemane nankɔ kɔnɔ. Nka sisan, suu kora ani n’a sɔrɔ Yezu be oliviyeyiri dɔ jukɔrɔ, dibi kɔnɔ. N’a y’a sɔrɔ ko sɔrɔdasiw ma deli ka Yezu ye, u bena se k’a lɔn cogo di? Walisa k’u dɛmɛ, Zuda ye tagamasiɲɛ dɔ di u ma. A y’a fɔ ko: “Ne bena cɛɛ min fo ka n bolo meleke a kaan na, o le ye Yezu ye. Aw k’a minɛ ka taga n’a ye. Aw taatɔ, aw b’a kɔlɔsi ka ɲa.”—Mariki 14:44.

Zuda tagatɔ ni jama ye nankɔ kɔnɔ, a ye Yezu n’a ka cidenw ye. A sinna Yezu ma k’a fɔ a ye ko: “I ni suu, karamɔgɔ.” O kɔ, a y’a bolo meleke Yezu kaan na. Yezu y’a jaabi ko: “N teri, i b’a fɛ ka koo min kɛ, o kɛ.” (Matiyo 26:49, 50). Yezu y’a fɔ tugun ko: “Zuda, i be Mɔgɔ Dencɛ don mɔgɔjuguw bolo ni foli le ye wa?” (Luka 22:48). Yezu ma dɔ wɛrɛ fɔ o janfanci ye tugun!

Sisan, Yezu gwɛrɛla fitinɛw ni tɔrɔsiw yeelen na ani a ye jama ɲininga ko: “Aw be jɔn le yɔrɔ ɲinina?” Dɔ y’a jaabi jama cɛma ko: “Nazarɛtika Yezu lo.” Yezu y’a jaa gwɛlɛya k’a fɔ ko: “Ne lo.” (Zan 18:4, 5). Komi u tun m’a lɔn min bena kɛ, u benna duguma siranya bolo!

Sanni Yezu ka tɛmɛ o sababu fɛ ka boli dibi la, a y’u ɲininga tugun ko u be jɔn lo ɲinina. U y’a jaabi tugun ko: “Nazarɛtika Yezu lo.” Yezu tora ka kuma ni dususuman ye ko: “Ne y’a fɔ aw ye ko ne lo. N’aw be ne le yɔrɔ ɲinina, aw ye nunu to u ka taga.” Hali wagati gwɛlɛ nin na, Yezu hakili jigira a la ko a tun y’a fɔ ko a t’a fɛ a ka ciden si ka tunu (Zan 6:39; 17:12). A y’a ka ciden kantigiw tanga ani u si ma tunu fɔɔ halakiliden Zuda (Zan 18:7-9). O kama, Yezu ko u ka a ka cidenw to u ka taga.

Sɔrɔdasiw wulila ka gwɛrɛ Yezu la. O tuma na le, cidenw y’a faamu min be kɛra. U ye Yezu ɲininga ko: “Matigi, an ka murujanjanw ta u kama wa?” (Luka 22:49). Yezu yɛrɛ ma se k’o ɲiningali jaabi fɔlɔ, murujanjan fila minw tun be cidenw fɛ, Piyɛri y’u kelen ta ka Malikusi kinibolo tulo caron. O Malikusi tun ye sarakalasebagaw kuntigiba ka baaraden lo ye.

Yezu magara Malikusi tulo la k’a kɛnɛya. O kɔ, a ye kalan nafamanba dɔ di a ka cidenw ma. A y’a fɔ Piyɛri ye ko: “I ka murujan don a nɔɔ na, bari mɔgɔ minw be kɛlɛ kɛ ni murujan ye, murujan le bena u faga fana.” Yezu sɔnna u k’ale minɛ sabu a y’a fɔ ko: “Ala ka kuma min b’a fɔ k’o koow ka kan ka kɛ, o bena dafa cogo di?” (Matiyo 26:52, 54). A y’a fɔ tugun ko: “Ne Fa ye tɔɔrɔ jifilen min di ne ma, ne man kan ka minni kɛ o la wa?” (Zan 18:11, ABM). Ala sago ye min ye Yezu koo la, Yezu sɔnna k’o dafa, hali ka sa yɛrɛ.

 Yezu ye jama ɲininga ko: “Aw nana ni murujanjan ni berew ye ka ne minɛ, i n’a fɔ ne ye benkannikɛla ye. Ne tun be to ka sigi Alabatosoba kɔnɔ loon bɛɛ ka mɔgɔw kalan, aw ma ne minɛ. Nga, o koo bɛɛ kɛra waasa min fɔra kiraw ka sɛbɛw kɔnɔ, o ka dafa.”—Matiyo 26:55, 56.

Sɔrɔdasiw, komandan ani Yahutuw ka kuntigiw ye Yezu minɛ k’a siri. Cidenw y’o ye minkɛ, u bolila. Nka, “kanbelen dɔ” tora jama cɛma ani a tugura Yezu nɔfɛ (Mariki 14:51). N’a sɔrɔ Yezu ka kalanden Mariki lo. Mɔgɔw y’o kanbele lɔn ani u y’a ɲini k’a minɛ. Nka, a bolila k’a ka fani to u bolo.