Taga a kɔnɔkow lajɛ

Taga a kɔnɔnakow lajɛ

 SAPITIRI 15NAN

Yezu ka kabako fɔlɔ

Yezu ka kabako fɔlɔ

ZAN 2:1-12

  • KƆƝƆYA, KANA DUGU LA

  • YEZU YE JII YƐLƐMA K’A KƐ DIWƐN YE

A tile saba ye nin ye Natanayɛli kɛra Yezu ka kalanden fɔlɔ dɔ ye. Sisan, Yezu n’a ka kalanden fɔlɔ dɔw tagara u ka mara la Galile, Kana dugu la. O be saheli fan fɛ. Natanayɛli bɔra o dugu lo la. Kana be sɔrɔ kuluyɔrɔ la, Yezu lamɔdugu Nazarɛti saheli fan fɛ. U y’u weele kɔɲɔya dɔ la o dugu la.

Yezu bamuso tun ye furuɲɔgɔnmaw ka denbaya terimuso dɔ ye. A fana tagara o kɔɲɔ na. N’a sɔrɔ ale fana tun be dɛmɛ donna walisa k’a janto mɔgɔ weeleninw na. Ayiwa, a y’a kɔrɔsi ko diwɛn banna ani a y’o fɔ Yezu ye ko: “U ka duvɛn banna.”—Zan 2:3.

A tun b’a fɔra Yezu ye le ko a ka dɔ kɛ dɔ ye. Yezu y’a jaabi ni talen kuma dɔ ye ko: “Muso, e ni ne ka mun b’o la?” (Zan 2:4, NW). Ala lo ye Yezu kɛ Masa ye. O kosɔn, cikan fɛɛn o fɛɛn ɲɛsinna a ka baara ma, a ka ɲi k’o sɔrɔ ka bɔ Ala yɔrɔ. A bangebagaw n’a teriw man kan ka cii di a ma o koo la. Mariyamu ye koow to Yezu bolo ni hakilitigiya ye. A y’a fɔ baaradenw ye ko: “N’a ye fɛɛn o fɛɛn fɔ aw ye, aw k’o kɛ.”—Zan 2:5.

Jidaga wɔɔrɔ tun be yen ani jii litiri 40 tun be se ka don u kelen kelen bɛɛ kɔnɔ. Yezu y’a fɔ baaradenw ye ko: “Aw ka daga nunu fa jii la.” O kɔ, a y’a fɔ u ye ko: “Aw ka dɔ bɔ sisan ka taga di ɲamɔgɔ ma.”—Zan 2:7, 8.

Dumuniko ɲɛmɔgɔ y’a ye k’o diwɛn ka di kosɔbɛ. Nka a m’a lɔn ko kabako dɔ lo kɛra walisa k’o diwɛn sɔrɔ. A ye kɔɲɔcɛ weele k’a fɔ a ye ko: “O ɲɔgɔn na, mɔgɔ bɛɛ be bɔ ni duvɛn diman le ye fɔlɔ. Ni mɔgɔ weleninw be ɲini ka fa tuma min na, u be sɔrɔ ka bɔ ni duvɛn kumunin ye. Nga ele kɔni ye duvɛn diman mara fɔɔ sisan!”—Zan 2:10.

O tun ye Yezu ka kabako fɔlɔ lo ye. A ka kalandenw y’o kabako ye tuma min na, u lara a la kosɔbɛ! O koo kɛnin kɔ, Yezu, n’a bamuso n’a lamɔfa deenw tagara Kapɛrnaum. O dugu be sɔrɔ Galile baji gɛrɛfɛ, tileben ni saheli cɛ.