Taga a kɔnɔkow lajɛ

Taga a kɔnɔnakow lajɛ

 SAPITIRI 69NAN

Jɔn lo ye u faa ye: Ibrayima wala Sutana?

Jɔn lo ye u faa ye: Ibrayima wala Sutana?

ZAN 8:37-59

  • YAHUTUW B’A FƆ KO IBRAYIMA LO YE U FAA YE

  • SANNI IBRAYIMA KA WOLO, YEZU TUN BE YEN

Yezu bele be Zeruzalɛmu, Gwatakɔrɔsigi seli (Sumanladon ɲɛnagwɛ) la. A be mɔgɔw kalanna tiɲɛn kuma nafamanbaw la. Yahutu dɔw y’a fɔ a ye ko: “Anw ye Ibrayima deenw ye. An ma deli ka kɛ mɔgɔ si ka jɔɔn ye.” Yezu y’u jaabi ko: “Ne y’a lɔn ko aw ye Ibrayima deenw ye. Nga ne ka kuma te donna aw dusu la, o kama aw be ne fagayɔrɔ ɲinina. Ne ye min ye n Faa Ala fɛ, ne b’o le fɔ. K’a sɔrɔ aw ye min mɛn aw faa fɛ, aw b’o le kɛ.”—Zan 8:33, 37, 38.

Yezu ka kuma faamu man gwɛlɛ: Ale Faa be dan na Yahutuw faa la. Yahutuw m’o kuma kɔrɔ faamu minkɛ, u y’a fɔ tugun ko: “Anw faa ye Ibrayima le ye.” (Zan 8:39; Ezayi 41:8). U ye Ibrayima bɔnsɔnw ye tiɲɛn na. O kama, u b’a miiri ko u be ni Ala tericɛ Ibrayima ka limaniya ɲɔgɔn ye.

Nka Yezu ye kuma dɔ fɔ u ye min y’u dimi. A ko: “N’aw faa ye Ibrayima ye, aw k’a ka kɛwaliw ɲɔgɔn kɛ.” Tiɲɛn be Yezu fɛ sabu deen ɲuman b’a faa ladegi. Yezu y’a fɔ u ye tugun ko: “Ne ye tiɲɛkuma min mɛn Ala fɛ, ne y’o bɛɛ fɔ aw ye. Nga aw be ne fagayɔrɔ le ɲini, k’a sɔrɔ Ibrayima m’o ɲɔgɔn kɛ.” O kɔ, Yezu ye kuma nin fɔ min y’u hakili ɲagami: “Aw b’aw faa ka kɛwaliw le kɛ.”—Zan 8:39-41.

Yahutuw bele m’a faamu Yezu be kumana mɔgɔ min koo la. U y’a fɔ k’olu ye deen halalaw ye. U ko: “A ma kɛ i n’a fɔ ko anw ye ɲamɔgɔdenw ye dɛ! Faa kelen le be an fɛ: o ye Ala ye.” Yala Ala lo ye u Faa ye tiɲɛn na wa? Yezu y’u jaabi ko: “Ni Ala tun ye aw Faa ye, ne koo tun bena diya aw ye, bari ne bɔra Ala le fɛ ka na. Ne ma na n yɛrɛ ma. Ale lo ye ne ci.” Yezu ye ɲiningali dɔ kɛ ani a yɛrɛ y’o jaabi ko: “Ne be minw fɔ aw ye, mun na aw t’o faamu? Bari aw ma sɔn ka mɛnni kɛ.”—Zan 8:41-43.

O cogo la, Yezu y’a ɲini k’u dɛmɛ u k’a faamu fɛɛn min bena u sɔrɔ n’u banna ale la. Nka sisan a y’a fɔ u ye ka gwɛ ko: “Aw fa ye min ye, Sitanɛ don. Aw b’a fɛ ka aw fa diyaɲɛkow de kɛ.” U faa ye mɔgɔ sifa juman lo ye? Yezu y’a ɲɛfɔ ko: “Ale kɛra mɔgɔfagala ye kabini fɔlɔfɔlɔ. A ma to tiɲɛ kan.” Yezu y’a fɔ tugun ko: “Min bɔra Ala la, o bɛ Ala ka kumaw lamɛn. Aw tɛ u lamɛn, katuguni aw ma bɔ Ala la.”—Zan 8:44, 47, ABM.

O kumaw ye Yahutuw dimi ani u ko: “An ye min fɔ, tiɲɛ yɛrɛ lo. I ye Samarika ye, i ye jinatɔ ye.” U kɛtɔ k’a fɔ ko Yezu ye “Samarika” ye, o b’a yira k’u b’a mafiɲɛya le. Nka Yezu m’a janto o nɛnili kuma na. A y’u jaabi ko: “Ne te jinatɔ ye dɛ, ne be kunkɔrɔta di n Faa le ma, k’a sɔrɔ aw b’a la ka ne dɔgɔya.” O ye kojuguba ye dɛ. Yezu ka kuma nunu b’o lo yira. A ko: “Ni mɔgɔ min ye ne ka kuma bato, o tigi te sa abada!” Yezu t’a fɔra ko a ka cidenw n’a ka kalanden tɔɔw tɛna sa yɛrɛ yɛrɛ la dɛ. Nka a b’a fɔra le k’u tɛna halaki bugubugu: o ye “saya filanan” ye, min kɔ sukununi tɛ yen.—Zan 8:48-51; Yirali 21:8.

Nka Yahutuw m’a faamu ko Yezu ka kumaw ye ntalen kumaw lo ye. U y’a fɔ ko: “Sisan kɔni, an y’a lɔn ko i ye jinatɔ ye tiɲɛ na! Ibrayima sara, kiraw fana sara. E ko ni mɔgɔ min ye ele ka kuma bato, k’o tigi tena sa abada! An faa Ibrayima min sara, e ka fisa n’o ye wa? . . . E b’i yɛrɛ jati mun le ye?”—Zan 8:52, 53.

A gwɛnin lo ko Yezu b’a ɲɛfɔra u ye le ko ale lo ye Masiya ye. Nka sanni a ka sin k’u jaabi, a y’a fɔ ko: “Ni ne be n yɛrɛ tanu, o tanuli nin te foyi ɲa. Ne Faa le be n tanu. Aw k’o min y’aw ka Ala ye. K’a sɔrɔ aw do t’a lɔn. Ne kɔni b’a lɔn. Ni ne y’a fɔ ko n t’a lɔn, an bɛɛ be kɛ kelen ye, ne fana be kɛ galontigɛla ye.”—Zan 8:54, 55.

Yezu kumana tugun u bɛnba cɛɛ kantigi Ibrayima koo la ko: “Aw faa Ibrayima nisɔn tun  diyara, bari a miirila ko a bena ne ka tile ye. A do y’a ye, o nisɔndiya nin y’a wasa.” Komi Ibrayima tun lanin be Ala ka layidu la, a tun be Masiya makɔnɔna. Yahutuw ye Yezu sɔsɔ ko: “E yɛrɛ sii ma saan bi duuru bɔ fɔlɔ, e ko i ye Ibrayima ye!” Yezu y’u jaabi ko: “Tiɲɛ tiɲɛ na, ne b’a fɔ aw ye ko sanni Ibrayima ka wolo, ne tun be yen.” A tun be kumana a ka ɲɛnamaya koo la, a ye min kɛ sankolo la i ko mɛlɛkɛ barikaman sanni ka na dugukolo kan.—Zan 8:56-58.

Komi Yezu y’a fɔ ko ale ye ɲɛnamaya kɛ Ibrayima ɲɛ, o ye Yahutuw dimi fɔɔ u b’a fɛ k’a bon ni kabakuruw ye. Nka Yezu bɔra u kɔrɔ.