Taga a kɔnɔkow lajɛ

Taga a kɔnɔnakow lajɛ

 SAPITIRI 95NAN

Kalan, furusa ni denmisɛnw kanuya koo la

Kalan, furusa ni denmisɛnw kanuya koo la

MATIYO 19:1-15 MARIKI 10:1-16 LUKA 18:15-17

  • YEZU B’A YIRA ALA BE MIN MIIRI FURUSA KOO LA

  • MINW Y’A LATIGƐ K’U TƐ FURU

  • AN KA ƝI KA KƐ I KO DENMISƐNW

Yezu n’a ka kalandenw bɔra Galile mara la, u ye Zurudɛn baji ani Pere mara cɛtigɛ n’u be tagara worodugu fan fɛ. Yezu tun tagara Pere kɔsa la ani a tun y’a fɔ Fariziɲɛw ye Ala be min miiri furusa koo la (Luka 16:18). Sisan, u be kuma o koo la tugun walisa ka Yezu kɔrɔbɔ.

Musa y’a sɛbɛ ko mɔgɔ be se k’a muso furu sa n’a ye “koo dɔ kɛ min y’a maloya.” (Deteronɔmu 24:1). Koo min ka ɲi ka kɛ furusa sababu ye, mɔgɔw ka miiriyaw tɛ kelen ye o koo la. Dɔw b’a miiri ko mɔgɔ be se k’a ka furu sa koo fitinin dɔrɔn kosɔn. O kama, Fariziɲɛw ye ɲiningali kɛ ko: “A daganin be cɛɛ k’a muso furu sa koo sugu bɛɛ la wa?”—Matiyo 19:3.

Sanni Yezu ka basigi adamadenw ka miiriyaw kan, a y’u hakili jigi nɛmɛnɛmɛ kuun min kama Ala ye furuko sigi sen kan. A y’a fɔ ko: “Aw m’a mɛn Ala ka kuma na, ko Ala ye diɲɛ dan tuma min na, a ye cɛɛ ni muso dan wa? A y’a fɔ fana k’o le kosɔn cɛɛ ben’a faa n’a baa to yen ka nɔrɔ a muso la, u fila bɛɛ bena jɛn ka kɛ kelen ye. A kɛra ten, u tena kɛ mɔgɔ fila ye tugu, fɔɔ kelen. Ala ye min jɛn ka kɛ kelen ye, mɔgɔ si kana o faran.” (Matiyo 19:4-6). Tuma min na Ala ye Adama ni Awa ka furu siri, a m’a fɔ ko u tun be se k’o furu sa.

Fariziɲɛw ye Yezu sɔsɔ ko: “Mun na Musa y’a fɔ ko wajibi lo n’an b’a fɛ ka muso furu sa, ko an ka kan ka furusasɛbɛ d’a ma?” (Matiyo 19:7). Yezu y’u jaabi ko: “Aw ka dusugwɛlɛya le y’a to Musa sɔnna ko aw be se k’aw ka muso bila, n’o tɛ, fɔlɔfɔlɔ a tun te ten.” (Matiyo 19:8). “Fɔlɔfɔlɔ” min kofɔra, o tun tɛ Musa ka tile ye. O tun ye tuma min na Ala ye furu fɔlɔ siri Edɛn nankɔ la.

O kɔ, Yezu ye tiɲɛn kuma dɔ fɔ min kɔrɔtanin lo. A ko: “Ne b’a fɔ aw ye ko ni mɔgɔ o mɔgɔ y’a ka muso furu sa, ni ɲamɔgɔya sababu tɛ, ka dɔ wɛrɛ ta, o tigi ye kakalaya kɛ.” (Matiyo 19:9). Ka kɛɲɛ ni Bibulu ye, kakalayako dɔrɔn lo ye furusa sababu ye.

Kalandenw y’o mɛn minkɛ, u y’a fɔ ko: “Ni nin le kɛra furu cogo ye, o tuma na, kuun t’a la mɔgɔ ka furu.” (Matiyo 19:10). Tiɲɛn na, mɔgɔ min b’a fɛ ka furu, a k’a lɔn ko o ka ɲi ka kɛ furututuko lo ye!

Yezu kumana mɔgɔ dɔw koo la minw furubali be to. A ko dɔw be wolo ani u tɛ se ka cɛnimusoko kɛ. Dɔw fana furubali be to sabu u y’u ka cɛya bɔ u la. Dɔ wɛrɛw be cɛnimusoko nege bɔ u yɛrɛ la. U b’o kɛ walisa ka se ka Ala ka Masayakow kɛ u ɲɛnako fɔlɔ ye. Yezu y’a fɔ a lamɛnbagaw ye ko: “Mɔgɔ min be se ka sɔn furubaliya ma, o tigi ka sɔn.”—Matiyo 19:12.

Sisan mɔgɔw be nana n’u ka denmisɛnw ye Yezu fɛ. Nka, kalandenw ye mɔgɔw sɔngɔ. A be komi u t’a fɛ mɔgɔw ka Yezu ɲɛɛ gwan. Yezu y’o ye minkɛ, a dimina a ka kalandenw kɔrɔ ani a y’a fɔ u ye ko: “Aw k’a to denmisɛnw ka na ne fɛ, aw kana u bali, bari Ala ka masaya ye olu bɔɲɔgɔnw le ta ye. Tiɲɛ na, ne b’a fɔ aw ye ko ni mɔgɔ min ma sɔn Ala ka masaya ma i n’a fɔ denmisɛn b’a kɛ cogo min na, o tigi tɛna se ka don a la fewu.”—Mariki 10:14, 15; Luka 18:15.

O ye kalan nafaman ye dɛ! Walisa ka sɔn Ala ka Masaya ma, an ka ɲi k’an majigi, ka sɔn u k’an kalan i n’a fɔ u be denmisɛnw kalan cogo min na. Yezu ye denmisɛnw ta ani a y’u duga. O cogo la, a y’a yira ko a b’u kanu. Minw bɛɛ be sɔn “Ala ka masaya ma i n’a fɔ denmisɛn,” Yezu b’olu fana kanu kosɔbɛ.—Luka 18:17.