Taga a kɔnɔkow lajɛ

Taga a kɔnɔnakow lajɛ

 SAPITIRI 36NAN

Sɔrɔdasiw kuntigi dɔ y’a yira ko a limaniyanin lo kosɔbɛ

Sɔrɔdasiw kuntigi dɔ y’a yira ko a limaniyanin lo kosɔbɛ

MATIYO 8:5-13 LUKA 7:1-10

  • SƆRƆDASIW KUNTIGI DƆ KA BAARADEN KƐNƐYARA

  • MƆGƆ LIMANIYANINW BENA DUGA SƆRƆ

Yezu ka kalan bannin kɔ kulu kan, a tagara Kapɛrnaum dugu la. O yɔrɔ la, Yahutuw ka cɛkɔrɔba dɔw kumana a fɛ. Siya wɛrɛ mɔgɔ dɔ lo y’u ci: Ɔrɔmu sɔrɔdasiw kuntigi dɔ lo.

Baaraden dɔ b’o kuntigi fɛ min koo ka di a ye kosɔbɛ. Nka, a be ɲini ka sa bana kosɔn. Hali n’o kuntigi tɛ Yahutu ye, a ye dɛmɛ ɲini Yezu fɛ. Cɛkɔrɔbaw y’a fɔ Yezu ye k’o cɛɛ ka “baaraden lanin be soo, a man kɛnɛ, murukubana b’a la. A tɔɔrɔnin lo kosɔbɛ.” (Matiyo 8:6). Dugu cɛkɔrɔbaw y’a fɔ Yezu ye k’o sɔrɔdasiw kuntigi ka kan n’o dɛmɛ ye. U ko: “Ale lo lɔra n’an ka kalanso lɔli musakaw ye.”—Luka 7:4, 5.

O yɔrɔnin bɛɛ Yezu ni dugu cɛkɔrɔbaw ye sira minɛ ka taga sɔrɔdasiw kuntigi ka soo. U surunyana tuma min na, o kuntigi y’a teri dɔw ci k’a fɔ Yezu ye ko: “Matigi, kana i yɛrɛ sigɛn, bari i ka don ne ka soo kɔnɔ, ne man kan n’o ye. O kosɔn, ne yɛrɛ ma taga i fɛ.” (Luka 7:6, 7). Sɔrɔdasiw kuntigi k’o kuma ɲɔgɔn fɔ, o ye majigilenya ye dɛ! O b’a yira k’o cɛɛ ni Ɔrɔmukaw tun tɛ kelen ye. Olu tun b’u ka jɔɔnw tɔɔrɔ.—Matiyo 8:9.

Siga t’a la, sɔrɔdasiw kuntigi b’a lɔn ko Yahutuw tɛ sɔn ka jɛn ni siya wɛrɛ mɔgɔw ye (Kɛwaliw 10:28). N’a sɔrɔ o lo y’a to a y’a teriw ci k’a fɔ Yezu ye ko: “Kuma kelen fɔ, ne ka baaraden bena kɛnɛya.”—Luka 7:7.

O kumaw ye Yezu kabakoya. O kama, a y’a fɔ ko: “Ne b’a fɔ aw ye ko hali Isirayɛli mɔgɔw fɛ, ne ma lanaya nin ɲɔgɔn ye.” (Luka 7:9). Sɔrɔdasiw kuntigi teriw kɔsegira tuma min na, u y’a sɔrɔ ko baaraden nin kɛnɛyara k’a sɔrɔ a tun bananin lo kosɔbɛ.

Cɛɛ kɛnɛyanin kɔ, Yezu y’a ɲɛfɔ ko siya wɛrɛ mɔgɔ minw limaniyanin lo, olu bena duga sɔrɔ. A ko: “Mɔgɔ caaman bena bɔ kɔrɔn ni tileben fɛ ka na sigi dumuni na ni Ibrayima ni Isiyaka ani Yakuba ye sankolo masaya la.” Nka, Yahutu minw limaniyanin tɛ, mun lo bena olu sɔrɔ? Yezu ko “olu bena to kɛnɛma dibi la. U bena kasi ka kule yen.”—Matiyo 8:11, 12.

Sababu tun dira Yahutuw lo ma fɔlɔ ka don Krista ka Masaya la. Nka, komi u ma sɔn ka don, Ala bena ban u la. O la, siya wɛrɛ mɔgɔw bena nɛɛma sɔrɔ ka sigi dumuni na “sankolo masaya la.”