Taga a kɔnɔkow lajɛ

Taga a kɔnɔnakow lajɛ

 SAPITIRI 10NAN

Yezu somɔgɔw be tagara Zeruzalɛmu

Yezu somɔgɔw be tagara Zeruzalɛmu

LUKA 2:40-52

  • YEZU SAAN 12, A YE SARIYA KARAMƆGƆW ƝININGA

  • YEZU YE JEHOVA WEELE KO “N FAA”

Yusufu ka denbaya, a teriw n’a somɔgɔw be to ka taga min kɛ Zeruzalɛmu saan o saan, o wagati sera. U be to ka taga yen walisa ka Tɛmɛnkan seli kɛ i ko sariya b’a ɲini u fɛ cogo min na (Deteronɔmu 16:16). Ka bɔ Nazarɛti ka taga Zeruzalɛmu, o ye kilomɛtɛrɛ 120 ɲɔgɔn ye. Bɛɛ bolo degunnin lo o wagati la ani u ninsɔn ka di. Yezu be ni saan 12 ye sisan. A kɔrɔtɔnin lo ka taga o seli la walisa ka se ka don Alabatosoba kɔnɔ tugun.

Yezu somɔgɔw fɛ, Tɛmɛnkan seli tɛ tile kelen koo dɔrɔn ye. U be buru funubali seli fana kɛ o wagati la. O seli be daminɛ Tɛmɛnkan seli dugusagwɛ ani a be mɛɛn tile 7 kɔnɔ (Mariki 14:1). O la, Yezu n’a somɔgɔw be wagati min kɛ ka bɔ Nazarɛti ka taga Zeruzalɛmu ani ka kɔsegi, ka fara u be wagati min kɛ o dugu kɔnɔ, o bɛɛ tun be lɔgɔkun fila ɲɔgɔn bɔ. Nka nin sen nin na, Yezu ye koo dɔ kɛ min bena a to u be wagatijan kɛ. A bangebagaw bɔra o kala ma k’u to sira kan, u kɔsegitɔ ka bɔ Zeruzalɛmu.

Yusufu ni Mariyamu tun y’a miiri ko Yezu tugura u somɔgɔw n’u teri dɔw kɔ, u ni minw be sira kan ɲɔgɔn fɛ. Nka tuma min na suu kora, u lɔra ani u ma Yezu ye. U tora k’a ɲini u tagamaɲɔgɔnw cɛma, nka u m’a ye. U y’a filɛ yɔrɔ bɛɛ u m’a ye! O kama, Yusufu ni Mariyamu kɔsegira ka taga a ɲini Zeruzalɛmu.

U y’a ɲini tile kelen, tile fila u m’a ye. U tagara batosoba kɔnɔ. Bondenw ka ca yen. Tile sabanan loon, u labanna k’u dencɛ ye Alabatosoba bonden dɔ kɔnɔ. U ye Yezu siginin ye sariya karamɔgɔw cɛma. A b’u lamɛnna ani k’u ɲininga koo dɔw la. Yezu ka hakilitigiya y’o cɛɛw kabakoya!

Mariyamu ye Yezu ɲininga ko : “N deen, mun y’a to i ye nin kɛ an na ten? A filɛ, ne n’i facɛ hakili ɲagaminin tun b’i yɔrɔ ɲinina.”—Luka 2:48.

Yezu kabakoyara k’a ye k’u m’a lɔn ale tun be sɔrɔ yɔrɔ min na. A y’u ɲininga ko: “Mun na aw tun be ne yɔrɔ ɲini? Aw tun m’a lɔn ko ne ka kan ka sɔrɔ n Faa ka soo kɔnɔ wa?”—Luka 2:49.

Sisan, Yusufu ni Mariyamu ye Yezu ye. O kɔ, u kɔsegira ka taga ɲɔgɔn fɛ Nazarɛti ani a tora k’u bonya. Dɔ tora ka fara Yezu kundama n’a hakili kan. Hali k’a sɔrɔ a bele ye kanbelenin ye, a koo diyara Ala ni mɔgɔw ye. Tiɲɛn na, Yezu kɛra ɲɛyirali ɲuman ye kabi a denmisɛnman. Alakow ka di a ye ani a be bonya la a wolobagaw kan.