Taga a kɔnɔkow lajɛ

Taga a kɔnɔnakow lajɛ

 SAPITIRI 136NAN

Yezu be Galile baji daa la

Yezu be Galile baji daa la

ZAN 21:1-25

  • YEZU B’A YƐRƐ YIRA A KA KALANDENW NA GALILE BAJI DAA LA

  • PIYƐRI NI CIDEN TƆƆW KA KAN KA YEZU KA SAGADENW DƐNDƐ

Yezu ye suu laban min kɛ n’a ka cidenw ye, a y’a fɔ u ye ko: “Ni ne kununna n sanin kɔ tuma min na, ne bena bila aw ɲa Galile mara la.” (Matiyo 26:32; 28:7, 10). O kama, a ka kalanden caaman tagara Galile. Nka, u tagara mun lo kɛ yen?

Wagati dɔ la, Piyɛri y’a fɔ ciden wɔɔrɔ ye ko “ale be taga mɔni kɛ.” U bɛɛ y’a fɔ “k’olu be taga n’a ye.” (Zan 21:3). U y’o suu bɛɛ kɛ u ma jɛgɛ si minɛ. Dugugwɛ dafɛ, Yezu y’a yɛrɛ yira u la bada la, nka u m’a lɔn. Yezu y’u weele ko: “Hee! N teriw, jigɛ te aw fɛ wa?” U y’a jaabi ko: “Ayi.” A y’a fɔ u ye ko: “Aw ka jɔɔ fili kurun kinibolo fɛ, aw bena sɔrɔli kɛ.” (Zan 21:5, 6). U y’a fili yen, u ye jɛgɛ caaman minɛ fɔɔ u yɛrɛ tun tɛ se ka jɔɔ sama jɛgɛ cayakojugu bolo.

Zan y’a fɔ Piyɛri ye ko: “Matigi lo!” (Zan 21:7). Piyɛri y’o mɛn minkɛ, a y’a ka fani ta k’a don ani a y’a yɛrɛ fili jii la. A ye mɛtɛrɛ 90 ɲɔgɔn kɛ ka sɔrɔ ka se bada la. Tɔɔw tugura a kɔ dɔɔni dɔɔni ni kurun ye n’u be jɔɔ samana, a fanin jɛgɛ la.

U sera bada la tuma min na, u ye “tasuma mananin sɔrɔ yen ni jigɛ lanin b’a kan, ani buru.” Yezu y’a fɔ u ye ko: “Aw ye jigɛ minw sɔrɔ sisan sisan, aw ye na n’u [dɔw] ye.” Piyɛri ye jɔɔ sama ka na n’a ye. A tun fanin be jɛgɛbaba 153 la! Yezu y’a fɔ u ye ko: ‘Aw ye na dumuni kɛ.’ U si ma se k’a ɲininga ko “ale ye jɔn le ye” sabu u y’a faamu ko Yezu lo (Zan 21:9-12). Yezu siɲɛ sabanan tun lo k’a yɛrɛ yira a ka kalandenw na k’u to ɲɔgɔn fɛ.

Yezu ye buru ni jɛgɛ di u kelen kelen bɛɛ ma. O kɔ, u tun ye jɛgɛ minw minɛ, Yezu y’u filɛ ani a ye Piyɛri ɲininga ko: “Zan dencɛ Simɔn, i be ne kanu ka tɛmɛ nunu kan wa?” Yezu b’a fɛ Piyɛri ka baara min kɛ, yala Piyɛri ka jɛgɛminɛ baara koo ka gwɛlɛ a ma ka tɛmɛ o baara kan wa? Piyɛri y’a jaabi ko: “Ɔnhɔn Matigi, e yɛrɛ y’a lɔn ko ne b’i kanu.” Yezu y’a fɔ a ye ko: “Ne ka sagaw dɛndɛ.”—Zan 21:15.

Yezu ye Piyɛri ɲininga tugun ko: “Zan dencɛ Simɔn, ne koo ka di i ye wa?” N’a sɔrɔ o ɲiningali ye Piyɛri kabakoya. A y’a kɔnɔ gwɛ ka Yezu jaabi ko: “Ɔnhɔn Matigi, e yɛrɛ y’a lɔn ko ne b’i kanu.” Yezu y’a fɔ a ye tugun ko: “Ne ka sagaw kɔlɔsi.”—Zan 21:16.

Yezu y’a ɲininga a siɲɛ 3nan na ko: “Zan dencɛ Simɔn, ne koo ka d’i ye wa?” N’a sɔrɔ Piyɛri y’a daminɛ k’a yɛrɛ ɲininga ni Yezu lara a la ko ale ye kantigi ye. Piyɛri y’a jaabi ko: “Matigi, e yɛrɛ be koo bɛɛ lɔn, e b’a lɔn ko e koo ka di ne ye.” Yezu y’a fɔ a ye tugun ko: “Ne ka sagaw dɛndɛ.” (Zan 21:17). Minw be kafo ɲɛminɛ, olu ka kan k’u janto Ala ka sagakulu la.

U ye Yezu siri ani k’a faga sabu a tun be Ala ka baara lo kɛra. Sisan, Yezu y’a yira k’o kɔrɔbɔli ɲɔgɔn bena Piyɛri sɔrɔ. A ko: “E tun ye kanbelen ye tuma min na, e tun b’i yɛrɛ cɛɛ siri. N’i tun b’a fɛ ka taga yɔrɔ min na, i tun be taga yen. Nga i mana kɛ mɔgɔkɔrɔba ye tuma min na, i bena i bolo jan mɔgɔ wɛrɛ bena i cɛɛ siri, ka taga n’i ye yɔrɔ la i t’a fɛ ka taga yɔrɔ min na.” O n’a t’a bɛɛ, Yezu y’a fɔ Piyɛri ye ko: “Tugu ne kɔ.”—Zan 21:18, 19.

Piyɛri ye ciden Zan ye minkɛ, a ye Yezu ɲininga ko: “Nin do Matigi, mun le bena kɛ ale la?” Piyɛri b’a fɛ k’a lɔn Zan ka siniɲasigi bena kɛ cogo min na sabu a koo ka di Yezu ye kosɔbɛ. Yezu y’a jaabi ko: “Hali ni ne b’a fɛ ale ka to yen fɔɔ ne ka kɔsegi ka na, e ka mun le b’o la?” (Zan 21:21-23). Piyɛri ka kan ka tugu Yezu kɔ le dɔrɔn. Tɔɔw bena min kɛ, a man kan ka jɔrɔ o la. Nka, o kumaw fɛ, Yezu y’a yira ko Zan bena sii jan sɔrɔ ka tɛmɛ ciden tɔɔw kan ani yelifɛn dɔ kɔnɔ, a bena Yezu nali ye a ka Masaya la.

Yezu ye koo caaman wɛrɛw kɛ. N’u tun ko u b’u bɛɛ sɛbɛ, u tun tɛ se ka don kitabunin melekenin caaman kɔnɔ.