Taga a kɔnɔkow lajɛ

Taga a kɔnɔnakow lajɛ

 SAPITIRI 8NAN

U bolila masacɛ jugu dɔ ɲɛ

U bolila masacɛ jugu dɔ ɲɛ

MATIYO 2:13-23

  • YEZU SOMƆGƆW BOLILA KA TAGA N’A YE EZIPITI

  • YUSUFU TAGARA N’A KA DENBAYA YE NAZARƐTI DUGU LA

Jehova ka mɛlɛkɛ y’a yɛrɛ yira Yusufu la siko la k’a fɔ a ye ko: ‘Wili ka boli ka taga ni deen n’a baa ye Ezipiti jamana na, bari Erɔdi be deen yɔrɔ ɲinina k’a faga. To o yɔrɔ la fɔɔ ni ne ka kuma sera i ma tuma min na.’ Yusufu ye Mariyamu lakunu k’o fɔ a ye joona joona.—Matiyo 2:13.

Yusufu ni Mariyamu wulila o suu yɛrɛ la ka taga n’u deen ye. U y’o kɛ wagati bɛnnin na sabu Erɔdi bɔra a kala ma ko lolo lɔnbaga minw bɔra kɔrɔn fan fɛ, u y’ale janfa. A tun y’a fɔ u ye k’u ka segi ka na deen nin koo ɲɛfɔ ale ye. Nka u kɔsegira u ka dugu la, u ma tɛmɛ Erɔdi fɛ. O koo ye Erɔdi dimi kosɔbɛ! A bele b’a fɛ ka Yezu faga. O kama, cɛdennin minw be Bɛtilehɛmu n’a gɛrɛfɛ duguw la, ani u sanda ma tɛmɛ saan 2 kan, a ye cii di ko olu bɛɛ ka faga. A y’o sanda latigɛ ka kɛɲɛ ni lolo lɔnbagaw ka kuma ye.

Cɛdennin caaman fagara. O kɛra kojuguba yɛrɛ lo ye! U ye cɛdennin minw faga an m’u hakɛ lɔn. Foyi tɛ se k’u bamusow dusu saalo. U ŋunakan n’u kasikan be Bibulu ka kiraya kuma dɔ dafa, Ala ka kira Zeremi tun ye min sɛbɛ.—Zeremi 31:15.

O wagati la, Yusufu n’a ka denbaya tun bolila ka taga Ezipiti ani u tora yen. Nka loon dɔ sufɛ, Jehova ka mɛlɛkɛ y’a yɛrɛ yira Yusufu la kokura siko la, k’a fɔ a ye ko: “Wili ka segi ni deen n’a bamuso ye Isirayɛli jamana na, bari mɔgɔ minw tun b’a fɛ ka deen nin faga, olu banna.” (Matiyo 2:20). Yusufu y’a faamu o sen fɛ ko ale n’a ka denbaya be se ka kɔsegi u faso la. O koo ye kiraya kuma wɛrɛ dafa: Ala y’a Dencɛ weele ka bɔ Ezipiti jamana na.—Oze 11:1.

A be komi Yusufu b’a fɛ ka taga sigi Zude mara la Bɛtilehɛmu dugu gɛrɛfɛ. A tun b’o  yɔrɔ lo la ka sɔrɔ ka boli ka taga sigi Ezipiti jamana na. Nka, a y’a mɛn ko Erɔdi dencɛ jugu Arikelayusi kɛra masacɛ ye Zude kun na. Siko wɛrɛ la, Ala ye Yusufu lasɔmi ko farati b’a la ka kɔsegi Zude mara la. O kama, Yusufu n’a ka denbaya tagara sigi Nazarɛti dugu la, Galile mara saheli fan fɛ. O la, u ye u yɔrɔ janya Zeruzalɛmu na, Yahutuw ka diinankow fanba be kɛ yɔrɔ min na. Yezu lamɔna Nazarɛti le. O ye kiraya kuma wɛrɛ dafa min tun ko: “U ben’a wele ko Nazarɛtika.”—Matiyo 2:23.