Taga a kɔnɔkow lajɛ

Taga a kɔnɔnakow lajɛ

 SAPITIRI 25NAN

Yezu makarila kunatɔ dɔ la k’a kɛnɛya

Yezu makarila kunatɔ dɔ la k’a kɛnɛya

MATIYO 8:1-4 MARIKI 1:40-45 LUKA 5:12-16

  • YEZU BE KUNATƆ DƆ KƐNƐYA

Yezu n’a ka kalandenw be waajuli kɛra “Galile mara faan bɛɛ la” Alabatosow kɔnɔ. A ye kabako minw kɛ, o kuma lo be fɔra yɔrɔ bɛɛ (Mariki 1:39). O kuma sera fɔɔ kunatɔcɛ dɔ ka dugu la. Dɔgɔtɔrɔcɛ Luka y’a fɔ o cɛɛ koo la ko “kuna tun b’a fari yɔrɔ bɛɛ la.” (Luka 5:12, ABM). N’o bana juguyara ka se hakɛ dɔ ma, a be mɔgɔ fari yɔrɔw tiɲɛ dɔɔni dɔɔni.

Kunatɔcɛ ka bana juguyara ka se hakɛ min ma, o b’a waajibiya k’a mabɔ mɔgɔw la ka sigi a dan na. Ka fara o kan, ni mɔgɔw be gwɛrɛla a la, a ka kan ka kule ko “nɔgɔnin, nɔgɔnin!” walisa a ka bana kana yɛlɛma u la (Levitiki 13:45, 46). Nka, o kunatɔcɛ ye mun lo kɛ sisan? A gwɛrɛla Yezu kɔrɔ, k’a kunbiri n’a teen gwan duguma k’a deli ko: “Matigi, n’i sɔnna, i be se ka n kɛnɛya.”—Matiyo 8:2.

O cɛɛ limaniyanin lo Yezu la dɛ! Nka, n’a sɔrɔ a ka bana y’a kɛ makaritɔ ye! Yezu bena mun lo kɛ do? Ni ele lo tun ye Yezu ye, i tun bena mun lo kɛ do? O cɛɛ makari ye Yezu minɛ. A y’a bolo la a kan k’a fɔ a ye ko: “N sɔnna ko i ka kɛnɛya.” (Matiyo 8:3). N’a sɔrɔ a tun ka gwɛlɛ dɔw fɛ ka la o la, nka o cɛɛ kɛnɛyara yɔrɔnin kelen.

Yezu ye masacɛ ye min be hinɛ mɔgɔ la ani see b’a ye. Yala i t’o masacɛ ɲɔgɔn fɛ wa? Yezu ye kunatɔcɛ nin minɛ cogo min na, o b’an jigi sigi ko n’a nana kɛ Masacɛ ye dugukolo bɛɛ kun na, kiraya kuma nin bena dafa: “A bena makari barikatan na, ani fantan. A bena fantan kisi.” (Zaburuw 72:13). Tiɲɛn na, mɔgɔ minw dusu kasinin lo, a bena diya Yezu ye k’u bɛɛ dɛmɛ.

I hakili to a la ko sanni Yezu ka kunatɔcɛ nin kɛnɛya, mɔgɔw tun be ninsɔndiya sɔrɔla a ka cidenya baara la ka ban. Sisan,Yezu ye kabako min kɛ, mɔgɔw bena o koo mɛn. Nka mɔgɔw be min mɛn a koo la, Yezu t’a fɛ u ka basigi o dɔrɔn kan ka limaniya ale la. Kiraya kuma min ko “a kaan tena mɛn siraw kan,” a b’o lɔn. O kɔrɔ ko a t’a fɛ a tɔgɔ ka bɔ (Ezayi 42:1, 2). O kama, a ye cɛɛ min kɛnɛya, a y’a fɔ a ye ko: “I yɛrɛ kɔlɔsi, i kan’a fɔ mɔgɔ si ye ko ne le y’i kɛnɛya dɛ. Nga, taga i yɛrɛ yira sarakalasebaga la, Musa tun ye saraka min koo fɔ farisogobanatigi ka kɛnɛya koo la, i k’o bɔ.”—Matiyo 8:4.

Nka miiri k’a filɛ: o cɛɛ ninsɔndiyanin lo kosɔbɛ a ka kɛnɛyako kosɔn fɔɔ a tɛ se ka je. A mana taga yɔrɔ o yɔrɔ, a b’o kuma fɔ. O y’a to bɛɛ b’a fɛ ka dɔ lɔn Yezu koo la. O kama, Yezu tɛ se ka don tugun dugu kɔnɔ jama ɲɛɛ na. A waajibiyara ka taga wagati damanin kɛ yɔrɔ dɔ la a dan na. O bɛɛ n’a ta, mɔgɔw nana a fɛ ka bɔ yɔrɔ bɛɛ walisa a k’u kalan ani k’u kɛnɛya.