Taga a kɔnɔkow lajɛ

Taga a kɔnɔnakow lajɛ

 SAPITIRI 130NAN

Yezu donna Yahutuw bolo ani u be tagara n’a ye a fagayɔrɔ la

Yezu donna Yahutuw bolo ani u be tagara n’a ye a fagayɔrɔ la

MATIYO 27:31, 32 MARIKI 15:20, 21 LUKA 23:24-31 ZAN 19:6-17

  • PILATI B’A ƝININA KA YEZU LABILA

  • U YE JALAKI BEN YEZU KAN ANI U BE TAGARA A FAGAYƆRƆ

U ye Yezu tɔɔrɔ kosɔbɛ ani k’a lɔgɔbɔ. Pilati y’a ɲini ka Yezu labila. O n’a ta bɛɛ, sarakalasebagaw kuntigiw n’u ka mɔgɔw m’u ka miiriya yɛlɛma. U t’a fɛ foyi ka Yezu kisi fagari ma. U tora ka pɛrɛn ko: “A ka gwengwen lɔgɔ kan! A ka gwengwen lɔgɔ kan!” Pilati y’u jaabi ko: “Aw yɛrɛ k’a minɛ k’a gwengwen, ne kɔni ma jalakiyɔrɔ si ye a la.”—Zan 19:6.

Yahutuw ma se ka tɛmɛ politikikow fɛ k’a to Pilati k’a miiri ko Yezu ka kan ka faga. Nka, yala u bena se ka tɛmɛ diinankow fɛ ka Pilati ka miiriya yɛlɛma wa? U tun ye Yezu jalaki min na u ka kititigɛlaw jɛnkulu ɲɛfɛ ko a ye Ala nɛni, u segira o kan tugun. U ko “sariya be olu fɛ, k’olu ka sariya la [Yezu] ka kan ka faga, bari a y’a yɛrɛ kɛ Ala Deen ye.” (Zan 19:7). Nin ye jalakiliko kura ye Pilati fɛ.

Pilati segira ka don a ka masaso kɔnɔ. A be fɛɛrɛ wɛrɛ ɲinina walisa ka Yezu labila. Mun na do? Sabu Yezu y’a jaa gwɛlɛya ka tɔɔrɔba muɲu ani Pilati muso yɛrɛ sikora Yezu koo la (Matiyo 27:19). Sisan, Yahutuw be Yezu jalakira ko a ye “Ala Deen” ye. O kɔrɔ ko di? Pilati b’a lɔn ko Yezu be bɔ Galile mara la (Luka 23:5-7). O bɛɛ n’a ta, a ye Yezu ɲininga ko “a bɔra min”? (Zan 19:9). N’a sɔrɔ Pilati tun b’a yɛrɛ ɲiningara yala Yezu ye ɲɛnamaya kɛ sankolo la ka sɔrɔ ka na dugukolo kan ani ko Ala lo y’a ci wa?

Yezu yɛrɛ tun y’a fɔ Pilati ye ko ale ye masacɛ ye ani ko a ka masaya tɛ nin duniɲa ta ye. Yezu ye min fɔ ka ban, a t’a fɛ ka dɔ fara o kan tugun. O kama, a ma Pilati jaabi. O ma diya Pilati ye ani a dimina k’a fɔ Yezu ye o: “I te ne jaabi wa? I m’a lɔn ko ne be se k’i gwengwen lɔgɔ kan, walima k’i labila wa?”—Zan 19:10.

Yezu y’a jaabi dɔrɔn ko: “See min b’i fɛ k’a yira ne la, i m’o sɔrɔ i yɛrɛ ma, Ala le ye o see d’i ma, o la do, mɔgɔ min ye ne don i bolo, o tigi le ye hakɛba kɛ ka tɛmɛ e kan.” (Zan 19:11). Yezu kaan tɛ mɔgɔ kelen dɔrɔn ma. Nka, a b’a fɛ k’a fɔ ko Kayifu n’a baarakɛɲɔgɔnw ani Zuda Isikariyɔti ye jurumuba kɛ ka tɛmɛ Pilati kan.

Yezu ka kokɛcogo ani a ka kumaw ye Pilati kabakoya. A be siranna ko n’a sɔrɔ Ala lo ye Yezu ci. O kama, a y’a ɲini tugun ka Yezu labila. Nka, n’a sɔrɔ Pilati be siranna koo wɛrɛ ɲɛ fana. Yahutuw ye dɔ fara o siranya kan tuma min na u ye Pilati bagabaga ko: “N’i y’a bila, i te Ɔrɔmu masacɛ teri ye tugu. Bari mɔgɔ min b’a yɛrɛ kɛ masa ye, o tigi be wili masacɛ le kama.”—Zan 19:12.

Gofɛrɛnɛrɛ Pilati bɔra luu kɔnɔ ni Yezu ye tugun. A tagara sigi kititigɛyɔrɔ la k’a fɔ jama ye ko: “A ye aw ka masacɛ filɛ.” Nka, Yahutuw ma sɔn a ka kuma ma. U kulera ni kaanba ye tugun ko: “A ka faga, a ka faga lɔgɔ kan!” Pilati y’a fɔ u ye ko: “Ne k’aw ka masacɛ faga lɔgɔ kan wa?” Ɔrɔmukaw ka kuntigiya be Yahutuw niin tɔɔrɔla kabi wagatijan. O n’a ta bɛɛ, sarakalasebagaw kuntigiw sinsinna a kan ko “masacɛ wɛrɛ te olu fɛ Ɔrɔmu masacɛ kɔ.”—Zan 19:14, 15.

Yahutuw b’a gwanna Pilati kun. Pilati ye fagobagatɔya kɛ ka Yezu don u bolo u k’a faga. Sɔrɔdasiw ye forokiya wulenman nin bɔ Yezu la, k’a yɛrɛ ka faniw don a kaan na. U tagatɔ ni Yezu ye a fagayɔrɔ la, a y’a yɛrɛ ka gwengwelɔgɔ ɲun.

Sisan, an be jumalon, Nisankalo tile 14 ani midi be ɲini ka se. Kabi lamisalon sɔgɔma, Yezu be seen kan, u b’a la k’a ɲani ani k’a tɔɔrɔ. K’a to a be banbara k’a yɛrɛ gwengwelɔgɔ ɲun, a fanga bɛɛ banna. O kama, sɔrɔdasiw ye tɛmɛbaga dɔ waajibiya a ye gwengwelɔgɔ nin ta ka taga n’a ye Yezu fagayɔrɔ la. O cɛɛ tɔgɔ ko Simɔn ani a be bɔ Afiriki, Sirɛni dugu la. Mɔgɔ caaman be tugura Yezu kɔ. Dɔw b’u disi gosira dusukasi bolo ani u be kasira.

 Muso minw be kasira, Yezu y’a fɔ olu ye ko: “Zeruzalɛmu musow, aw kana kasi ne kosɔn. Aw ye kasi aw yɛrɛw n’aw ka deenw kosɔn, bari loon dɔ bena se, mɔgɔw ben’a fɔ ko: ‘Muso minw ma deen sɔrɔ ka ye, ni minw te se ka deen sɔrɔ, ani minw ma siin di deen ma ka ye, olu dagamunin lo.’ O tuma na, mɔgɔw ben’a daminɛ k’a fɔ kuluw ye ko: ‘Aw ka ben an kan!’ U ben’a fɔ tintinw ye ko: ‘Aw k’an datugu!’ Ne be kuma ten bari aw yɛrɛ y’a ye u be nin kɛra yirikɛnɛ na, yiri jalan ta bena kɛ cogo di?”—Luka 23:28-31.

Yezu kaan be Yahutu siya lo ma. O siya be komi yiri min be jara, nka a ma ja pewu sabu Yezu ni Yahutu minw lara a la, olu bele be yen. Nka ni Yezu sara ani a ka kalandenw ye Yahutu diinan to yen, Yahutu siya bena ja Alako ta fan fɛ i ko yiri sanin. Tuma min na Ala bena a to Ɔrɔmukaw ka sɔrɔdasiw ka wuli Yahutu siya kama, kasi bena gwan o wagati!