Taga a kɔnɔkow lajɛ

Taga a kɔnɔnakow lajɛ

 SAPITIRI 4NAN

Mariyamu kɔnɔman lo k’a sɔrɔ a furunin tɛ

Mariyamu kɔnɔman lo k’a sɔrɔ a furunin tɛ

MATIYO 1:18-25 LUKA 1:56

  • YUSUFU BƆRA A KALA MA KO MARIYAMU KƆNƆMAN LO

  • MARIYAMU KƐRA YUSUFU MUSO YE

Mariyamu kɔnɔman lo a kalo naani ye nin ye. I hakili b’a la ko a ka kɔnɔ daminɛ na, a tagara a somɔgɔ Elizabɛti fɛ, Zude worodugu fan fɛ, kuluyɔrɔw la. Nka sisan, Mariyamu kɔsegira a ka soo Nazarɛti dugu la. Ayiwa, bɛɛ bena bɔ a kala ma ko a kɔnɔman lo. Miiri k’a filɛ o koo b’a hakili ɲagami cogo min na!

Min yɛrɛ be Mariyamu ka koo tɔɔw juguya, o ye ko a maminɛnin lo. Miniziyecɛ dɔ be Nazarɛti, a tɔgɔ ko Yusufu. Ale tun ye Mariyamu maminɛ. Ala tun ye sariya dɔ di Israɛldenw ma. Ka kɛɲɛ n’o sariya ye, ni cɛɛ dɔ tun ye muso dɔ maminɛ, n’o muso lara ni cɛɛ wɛrɛ ye, u kan k’a bon fɔɔ k’a faga. Mariyamu tun b’o sariya kala ma (Deteronɔmu 22:23, 24). Mariyamu do ma kakalayako si kɛ. O n’a ta bɛɛ, a ka ɲi k’a ɲɛfɔ Yusufu ye ale y’o kɔnɔ nin sɔrɔ cogo min na. Ka fara o kan, a yɛrɛ m’a lɔn Yusufu bena o koo ta cogo min na.

Yusufu ma Mariyamu ye a kalo saba ye nin ye. Siga t’a la, a kɔrɔtɔnin lo k’a ye sisan. U ye ɲɔgɔn ye tuma min na, Mariyamu y’a fɔ a ye ko ale kɔnɔman lo. A y’a seko bɛɛ kɛ k’a ɲɛfɔ Yusufu ye ko ale ye kɔnɔ ta Ala ka hakili senu barika lo la. Miiri k’a filɛ a tun ka gwɛlɛ Yusufu fɛ cogo min na k’o koo faamu ani ka la o la.

Mariyamu koo ka di Yusufu ye kosɔbɛ. A b’a lɔn ko nanbaramɔgɔ tɛ ani ko bɛɛ b’a tɔgɔ ɲuman fɔ. Nka, Mariyamu mana min o min fɔ, Yusufu tɛ se k’o faamu. Ale fɛ, Mariyamu tɛ se ka kɔnɔ ta n’a ma la ni cɛɛ wɛrɛ ye. Nka, Yusufu t’a fɛ u ka Mariyamu bon k’a faga wala  k’a lamaloya jama ɲɛɛ na. O kosɔn, a y’a latigɛ k’a furu sa dogo la. O wagati la, ni dɔ tun ye muso maminɛ, a tun be jati i n’a fɔ u furula. U tun tɛ se ka ɲɔgɔn bila n’o furu ma sa.

Kɔfɛ, Yusufu tagara la. Nka, o koo bele b’a tɔɔrɔla. Jehova ka mɛlɛkɛ dɔ y’a yɛrɛ yira a la siko la ani k’a fɔ a ye ko: “I kana siran ka Mariyamu furu, bari a ye kɔnɔ ta Nii Senuman [wala hakili senu] barika la. A bena dencɛ wolo, i k’a tɔgɔ la ko Yezu, bari ale lo ben’a ka mɔgɔw kisi u ka hakɛw ma.”—Matiyo 1:20, 21.

Yusufu kununa tuma min na, a ye koo bɛɛ faamu. O y’a hakili sigi yɛrɛ le! Mɛlɛkɛ ye min fɔ a ye, a m’o bila ka suma. A ye Mariyamu ta a ka soo. O cogo la, a y’a yira bɛɛ ɲɛɛ na ko Mariyamu y’ale ka muso ye sisan. Nka, Yusufu ma la ni Mariyamu ye fɔɔ Yezu wolonin kɔ.

Kalo caaman o kɔ, Mariyamu kɔnɔ mɔnna. Nka, ale ni Yusufu ka ɲi ka bɔ u ka soo Nazarɛti ka taga dugu wɛrɛ la. Mariyamu jigi tuma do man jan. U ka ɲi ka taga min o wagati ɲɔgɔn na?