Taga a kɔnɔkow lajɛ

Taga a kɔnɔnakow lajɛ

 SAPITIRI 48NAN

A ye kabakow kɛ, nka Nazarɛtikaw yɛrɛ ma la a la

A ye kabakow kɛ, nka Nazarɛtikaw yɛrɛ ma la a la

MATIYO 9:27-34; 13:54-58 MARIKI 6:1-6

  • YEZU YE FIYENTƆW NI BOBO DƆ KƐNƐYA

  • NAZARƐTIKAW MA LA YEZU LA

Yezu ye koo caaman kɛ tile kɔnɔ. A bɔra Dekapoli mara la ka na. A ye muso dɔ kɛnɛya jolibɔn bana tun be min na ani a ye Zayirus denmuso suu kunu. Nka, tile bele ma ban fɔlɔ. Yezu bɔtɔ Zayirus ka soo, fiyentɔcɛ fila tugura a kɔ ka to ka kule ko: “Makari an na, Dawuda dencɛ!”—Matiyo 9:27.

Fiyentɔcɛw kɛtɔ k’a fɔ ko Yezu ye “Dawuda dencɛ” ye, u b’a yira ko u lanin b’a la ko Yezu ye Dawuda ka masaya cɛntala ani Masiya ye. Yezu y’a kɛ komi a t’o cɛɛw kulekan mɛnna. N’a sɔrɔ a b’a fɛ k’a lɔn n’u bele bena to ka kule ale kɔ. Nka, o cɛɛw fari ma faga. Yezu donna soo kɔnɔ tuma min na, u tugura a kɔ. Yezu y’u ɲininga ko: “Aw lanin b’a la ko ne be se k’aw ɲaa yɛlɛ wa?” U ma sigasiga k’a jaabi. U ko: “Ɔnhɔn Matigi, an lanin b’a la.” O kama, Yezu magara u ɲɛɛw na ani a y’a fɔ u ye ko: “Aw jigi b’a la ko ne be se ka fɛɛn min kɛ aw ye, o ka kɛ aw ye.”—Matiyo 9:28, 29.

U ɲɛɛw barila ka yɛlɛ! Yezu tun mana mɔgɔw kɛnɛya a tun b’a fɔ u ye k’u kana o koo wangola. A y’o lo fɔ o fiyentɔcɛ fila nunu ye fana. Nka kɔfɛ, ninsɔndiya y’a to o cɛɛw y’a daminɛ ka Yezu kofɔ mɔgɔw ye yɔrɔ bɛɛ.

O cɛɛ fila bɔtɔ, mɔgɔw nana ni cɛɛ dɔ ye min tɛ se ka kuma sabu jina dɔ tun b’a la. Yezu y’o jina gwɛn ka bɔ cɛɛ la dɔrɔn, a y’a daminɛ ka kuma. O ye jama kabakoya ani “u tora k’a fɔ k’u ma deli ka nin ɲɔgɔn ye Isirayɛli jamana na fɔlɔ.” Fariziɲɛw fana tun be yen. Yezu ye kabako min kɛ, u tɛ se k’o sɔsɔ. O kosɔn, Yezu be sera ka kabakow kɛ sababu min fɛ, u y’a daminɛ ka sɔsɔli kɛ o koo la tugun. U ko: “A be jinaw gwɛn jinaw kuntigi le barika la.”—Matiyo 9:33, 34.

Dɔɔni o kɔ, Yezu kɔsegira a wolodugu la, Nazarɛti. Nin sen fɛ, a kalandenw tun be n’a ye. A saan kelen ɲɔgɔn ye nin ye a tun ye mɔgɔw kalan yen Alabatoso kɔnɔ. A daminɛ na, a ka kalan ye mɔgɔw kabakoya. Nka kɔfɛ, u dimina a kɔrɔ o kalan kosɔn ani u y’a ɲini k’a faga. Yezu y’a ɲini tugun k’a sigiɲɔgɔn kɔrɔw dɛmɛ.

Lafiɲɛlon na, Yezu tagara tugun Alabatoso kɔnɔ walisa ka mɔgɔw kalan. Mɔgɔ caaman kabakoyara. U tora k’a fɔ ko: “Haan! A bɔra ni hakilitigiya nin ye min? A be kabako nunu kɛ cogo di? Miniziye ka deen nin tɛ wa? Mariyamu t’ale lo bamuso ye wa? A dɔgɔcɛ te Zaki ni Yusufu ni Simɔn ani Zude ye wa? A dɔgɔmusow te dugu nin kɔnɔ yan wa? A do ye hakilitigiya ni kabakokɛ see nin sɔrɔ min?”—Matiyo 13:54-56.

Mɔgɔw y’a miiri ko Yezu ye u ka duguden dɔrɔn lo ye. U y’a fɔ u yɛrɛ kɔnɔ ko: “A bonyana an bɛɛ ɲɛɛ na yan! A be se ka kɛ Masiya ye cogo di?” Yezu ka hakilitigiya, a ka kabakow ani koo caaman wɛrɛw y’a yira ko a ye Masiya lo ye. O bɛɛ n’a ta, u ma la Yezu la sabu u tun b’a lɔn ka ɲɛ. Hali Yezu ka somɔgɔw yɛrɛ ma la a la. O kama, Yezu y’a fɔ ko: “Kira be boɲa sɔrɔ yɔrɔ bɛɛ, fɔɔ a ka dugumɔgɔw n’a ka somɔgɔw cɛma.”—Matiyo 13:57.

Tiɲɛn na, u ka dannabaliya ye Yezu kabakoya. O kama, “Yezu y’a bolo la banabagatɔ dɔw kan k’u kɛnɛya.” A ma kabako si kɛ yen ka fara o kan.—Mariki 6:5, 6.