Taga a kɔnɔkow lajɛ

Taga a kɔnɔnakow lajɛ

 SAPITIRI 99NAN

Yezu be fiyentɔcɛw kɛnɛya ani a be Zase dɛmɛ

Yezu be fiyentɔcɛw kɛnɛya ani a be Zase dɛmɛ

MATIYO 20:29-34 MARIKI 10:46-52 LUKA 18:35–19:10

  • YEZU BE FIYENTƆCƐ DƆW KƐNƐYA ZERIKO

  • LANPOMINƐLA ZASE BE NIMISA

Yezu n’a tagamaɲɔgɔnw sera Zeriko. Ka bɔ Zeriko ka taga Zeruzalɛmu, o ye tile kelen tagama lo ye. A be se ka fɔ ko dugu fila lo kɛra Zeriko ye: dugu kɔrɔ ani dugu kura min lɔra Ɔrɔmukaw ka tile la. Kilomɛtɛrɛ kelen ni tilan lo b’o dugu fila cɛ. Yezu ni jama bɔra o dugu dɔ la ani u be tagara tɔɔ kelen na. U gwɛrɛtɔ o dugu la, fiyentɔcɛ fila ye jama mankan mɛn. Kelen tɔgɔ ko Baritime. U fila tun siginin be sirada la n’u be delili kɛra.

Baritime n’a tɔɲɔgɔn y’a mɛn ko Yezu be tɛmɛna minkɛ, u y’a daminɛ ka pɛrɛn ko: “Matigi, Dawuda dencɛ, makari an na!” (Matiyo 20:30). Jama cɛma, mɔgɔ dɔw sɔngɔra u kun na k’u ka je. Nka, u tora ka pɛrɛn ka tɛmɛ fɔlɔ kan. Yezu y’u pɛrɛnkan mɛn minkɛ, a lɔra ani a y’a fɔ a ka kalandenw ye k’u ka u weele ka na. U tagara fiyentɔcɛw fɛ, k’a fɔ kelen ye ko: “I hakili sigi. Wili, a ko i ka na.” (Mariki 10:49). Fiyentɔcɛ ninsɔndiyaninba y’a ka forokiya fili ka pan ka lɔ ani a tagara Yezu fɛ.

Yezu y’u ɲininga ko: “Aw b’a fɛ ne ka mun kɛ aw ye?” U y’a jaabi ko: “Matigi, an b’a fɛ i k’an ɲaa yɛlɛ.” (Matiyo 20:32, 33). U makari ye Yezu minɛ. A magara u ɲɛɛw na ani k’a fɔ u la kelen ye ko: “Taga. I kɛnɛyara i ka lanaya kosɔn.” (Mariki 10:52). Fiyentɔcɛ fila minw tun ye delilikɛlaw ye, u ɲɛɛw yɛlɛla ani u y’a daminɛ ka Ala tando. Jama y’o kabako ye minkɛ, u fana ye Ala tando. O cɛɛ fila minw kɛnɛyara, olu y’a daminɛ ka tugu Yezu kɔ.

Yezu tɛmɛtɔ Zeriko dugu kɔnɔ, jamaba be n’a ye. Mɔgɔ min ye fiyentɔcɛw kɛnɛya, bɛɛ b’a fɛ k’a ye. Jama ye Yezu degun yɔrɔ bɛɛ, fɔɔ dɔw yɛrɛ tɛ se k’a ye. Zase fana tɛ se k’a ye sabu a ka surun. A tun ye lanpominɛlaw kuntigi ye Zeriko ani a dafɛduguw la. A bolila ka taga yɛlɛ torosun dɔ kan ɲɛfɛ sabu Yezu ka ɲi ka tɛmɛ yen. Ka Zase to yiri kan, koo o koo be kɛra, a ɲɛɛ b’o la. Yezu sera o yɔrɔ la ka Zase ye yiri kan tuma min na, a y’a fɔ a ye ko: “Zase, jigi joona joona. Wajibi lo ne ka jigi i ka soo bii.” (Luka 19:5). Zase jigira ka bɔ yiri kan ani a teliyara ka taga soo walisa k’a ka lonan bisimila, o min ɲɔgɔn tɛ yen.

Jama y’a ye ko Yezu be tagara Zase ka soo minkɛ, u y’a daminɛ ka ŋunuŋunu. Olu fɛ, a bɛnnin tɛ Yezu ka taga Zase fɛ sabu olu b’a jati jurumukɛla ye. Zase kɛra nafolotigi ye sabu a ye mɔgɔw nanbara a ka baara sen fɛ.

Tuma min na Yezu be donna Zase ka soo, jama ŋunuŋununa ko: “Cɛɛ nin be tagara jigi hakɛkɛla fɛ.” Nka, Yezu y’a ye ko Zase be se ka nimisa a ka jurumuw na. Ani o lo kɛra tiɲɛn na. Zase wulila ka lɔ ani k’a fɔ Yezu ye ko: “Matigi, sisan ne bena n ka nafolo tilancɛ di  fantanw ma, ni ne ye mɔgɔ min namara, ne bena o ɲɔgɔn naani segi a tigi ma.”—Luka 19:7, 8.

Zase y’a yira cogo kabakoman na ko a nimisara a ka jurumuw na sɔbɛ la! A be komi a tun be se ka basigi lanposɛbɛw kan k’a lɔn Yahutuw ye lanpo minw sara. A y’a daa di ko ale ye mɔgɔ minw nanbara, a bena o ɲɔgɔn naani kɔsegi u ma. Sariya tun be min waajibiya mɔgɔ ma o koo ɲɔgɔn na, Zase b’a fɛ ka min kɛ, o tɛmɛna o kan yɛrɛ (Ɛkizɔdi 21:37; Levitiki 5:21-24). Ka fara o kan, Zase ko a bena a ka nafolo tilancɛ di fantanw ma.

Zase nimisara cogo min na, o diyara Yezu ye. O kama, a ko: “Kisili sera soo nin kɔnɔ bii, bari ale fana ye Ibrayima ka deen dɔ ye. Mɔgɔ Dencɛ nana ka mɔgɔ tununinw lo yaala k’u kisi.”—Luka 19:9, 10.

Mɔgɔ minw bɔra Jehova kɔ, Yezu tun ye ntalen dɔ la deen tununin dɔ koo la walisa k’a yira olu ka koo be cogo min na (Luka 15:11-24). Sisan, Yezu b’a mako don Zase la. Ale tun be komi mɔgɔ tununin ani a yera. N’a sɔrɔ diinan kuntigiw n’u kɔmɔgɔw be ŋunuŋununa Yezu kɔrɔ ani u b’a kɔrɔfɔra sabu a b’a mako don Zase ɲɔgɔnna mɔgɔw la. O n’a ta bɛɛ, Yezu tora ka Ibrayima ka deen tununinw ɲini ani k’u dɛmɛ u ka segi Ala ma.