Taga a kɔnɔkow lajɛ

Taga a kɔnɔnakow lajɛ

 SAPITIRI 56NAN

Mun lo be mɔgɔ nɔgɔ tiɲɛn na?

Mun lo be mɔgɔ nɔgɔ tiɲɛn na?

MATIYO 15:1-20 MARIKI 7:1-23 ZAN 7:1

  • YEZU BE ADAMADENW KA LANDAKOW BƆ KƐNƐ KAN

Saan 32 ka Tɛmɛnkan seli surunyana. O y’a sɔrɔ Yezu be mɔgɔw kalanna Galile. O kɔ, n’a sɔrɔ a tagara Zeruzalɛmu walisa ka Tɛmɛnkan seli kɛ i ko sariya b’a ɲini Yahutuw fɛ cogo min na. Nka, Yezu b’a yɛrɛ kɔrɔsi sabu Yahutuw b’a ɲinina k’a faga (Zan 7:1). O kɔ, a kɔsegira Galile.

N’a sɔrɔ Yezu tun be Kapɛrnaum tuma min na Fariziɲɛw ni sariya karamɔgɔw bɔra Zeruzalɛmu ka n’a filɛ. Mun na u y’o tagama kɛ? U be sababu lo ɲinina ka Yezu jalaki ko a be Ala ka sariya tiɲɛ. U y’a ɲininga ko: “Mun na i ka kalandenw te an faaw ka landa bato? Bari u be dumuni kɛ n’u te u tigɛ ko ka ɲa.” (Matiyo 15:2). Ala ma deli k’a fɔ a ka jama ye k’u ka u tɛgɛw ko “ka kɛɲɛ n’u faaw ka landa ye.” (Mariki 7:3). Nka, ni mɔgɔ tun m’o kɛ, Fariziɲɛw tun b’o jati jurumuba ye.

Sanni Yezu ka sin ka Fariziɲɛw ka darabɔli kumaw jaabi, a y’a yira cogo min na u be tugu ka Ala ka sariya tiɲɛ. Yezu y’u ɲininga ko: “Mun na aw be Ala ka sariya cɛn aw ka landaw kosɔn? Bari Ala y’a fɔ ko i k’i baa n’i faa boɲa, ko ni mɔgɔ min y’a faa, walima a baa nɛni, k’o tigi ka kan ka faga. Nga aw b’a fɔ ko ni mɔgɔ dɔ y’a fɔ a faa, walima a baa ye ko ale tun ka kan k’a dɛmɛ ni fɛɛn min ye, ko a y’o di Ala ma, a kɛra ten wajibi tɛ o tigi ma k’a faa n’a baa dɛmɛ tugu.”—Matiyo 15:3-6; Ɛkizɔdi 20:12; 21:17.

Fariziɲɛw b’a fɔ ko wari, bololafɛnw wala fɛɛn o fɛɛn dira Ala ma, o ye Alabatoso ta ye. O kama, o fɛɛnw tɛ se ka ta ka koo wɛrɛ kɛ. Nka tiɲɛn tiɲɛn na, o tigi ye fɛɛn minw kɛ Ala ta ye, u bele b’a bolo kɔrɔ. Ɲɛyirali fɛ, dencɛ dɔ be se k’a fɔ ko a y’a ka wari wala a bololafɛnw “di Ala ma” wala Alabatosoba baara kama ani a b’a kɛ komi o fɛɛnw ye Alabatoso ta ye ka ban. Nka, o wari wala bololafɛnw bele b’o cɛɛ bolo ani a be se k’a ɲɛnako kɛ n’u ye. A do b’a fɔ ko a tɛ se k’u kɛ k’a bangebagaw dɛmɛ k’a sɔrɔ u kɔrɔla ani u mako be dɛmɛ na. O cogo la, a be ban a ka kunkanbaara la a wolobagaw ta fan fɛ.—Mariki 7:11.

Joo be Yezu fɛ ka dimi sabu Fariziɲɛw be Ala ka sariya kɔrɔ yɛlɛma. A ko: “Aw be Ala ka kuma kɛ kumafu ye aw ka landaw kosɔn. Filakanfɔ nunu! Ezayi ye kirayakuma min fɔ aw ka koo la, o bɛnna kosɔbɛ. A ko: ‘Mɔgɔ nunu be ne boɲa u daa dama le la, nga u dusu yɔrɔ ka jan ne la. U be ne bato gwansan, bari u be ɲɔgɔn kalan koo minw na, o ye adamadenw ka sariyaw dama le ye.’” Komi Fariziɲɛw ma se ka foyi fɔ, Yezu ye jama weele u ka gwɛrɛ ka na. A ko: “Aw k’aw tulo malɔ ka n ka kuma faamu. A ma kɛ i n’a fɔ ko mɔgɔ be fɛɛn min dumu, o le b’a nɔgɔ, nga a kɔnɔnako le b’a nɔgɔ.”—Matiyo 15:6-11; Ezayi 29:13.

Dɔɔni o kɔ, k’u to boon dɔ kɔnɔ, kalandenw ye Yezu ɲininga ko: “I m’a lɔn ko i ka kuma nin digira Fariziɲɛw na k’u hakili ɲagami wa?” Yezu y’u jaabi ko: “Ne Faa min be sankolo la ma yiri o yiri tutu, olu bena bɔn ka bɔ yen. Aw y’u ye k’u to yen, fiɲɛntɔw lo. Ni fiɲɛntɔ ye a tɔɲɔgɔn ka bere minɛ, u fila bɛɛ bena kori ka ben dingɛ kɔnɔ.”—Matiyo 15:12-14.

Piyɛri y’a ɲini Yezu fɛ kalanden tɔɔw tɔgɔ la, a k’a ɲɛfɔ fɛɛn min be mɔgɔ nɔgɔ. A be komi o ye Yezu kabakoya. Yezu y’a jaabi ko: “Aw m’a lɔn ko mɔgɔ be fɛɛn o fɛɛn don a daa la, k’o be don a kɔnɔ na, o kɔ, a be taga o fili banakɔ wa? Nga mɔgɔ daa be fɛɛn min fɔ, o be bɔ a dusu la le. Olu le be mɔgɔ nɔgɔ.  Bari miiriyajuguw be bɔ mɔgɔ dusu le la, ani mɔgɔfaga, ni ɲamɔgɔya, kakalaya, soɲali, galontigɛ, ani nɛnili. O koo nunu le be mɔgɔ nɔgɔ, nga ka dumuni kɛ n’i ma i tigɛ ko, o te mɔgɔ nɔgɔ.”—Matiyo 15:17-20.

Yezu t’a fɔra le ko mɔgɔ man ɲi ka saniya, a fana t’a fɔra k’u man kan k’u tɛgɛw ko ka sɔrɔ ka tobili kɛ wala ka dumuni kɛ. Nka, a be diinan kuntigiw lo jalakira u ka filankafoya kosɔn. Olu be adamadenw ka landakow fisaya ni Ala ka sariya ye. Tiɲɛn na, kɛwale juguw lo be mɔgɔ nɔgɔ sabu u be bɔ mɔgɔ dusukun na.