Taga a kɔnɔkow lajɛ

Taga a kɔnɔnakow lajɛ

 SAPITIRI 61NAN

Yezu be kanbelenin jinatɔ dɔ kɛnɛya

Yezu be kanbelenin jinatɔ dɔ kɛnɛya

MATIYO 17:14-20 MARIKI 9:14-29 LUKA 9:37-43

  • U MAKO TUN BE LIMANIYA BARIKAMAN NA WALISA KA KANBELENIN JINATƆ KƐNƐYA

Yezu, Piyɛri, Zaki ani Zan be jigira ka bɔ kulu kan tuma min na, u ye jamaba kunbɛn. Koo dɔ lo kɛra. Sariya karamɔgɔw lajɛnna Yezu ka kalandenw kɔrɔ ka to ka sɔsɔli kɛ n’u ye. Jama ɲɛɛ lara Yezu kan dɔrɔn, u ninsɔndiyaninba bolila ka taga a fo. Yezu y’a ka kalandenw ɲininga ko: “Aw ni sariya karamɔgɔw be ɲɔgɔn sɔsɔra mun lo la?”—Mariki 9:16.

Cɛɛ dɔ bɔra jama cɛma ka na a kunbiri gwan Yezu kɔrɔ ani k’a fɔ ko: “Karamɔgɔ, jina be n dencɛ la. A y’a kɛ bobo ye, o le y’a to, n nana n’a ye i fɛ. N’a wilila a kan yɔrɔ o yɔrɔ, a b’a ta k’a ben duguma, a daa be kanga, a b’a ɲiiw ɲimi, a be ja kankan. Ne y’i ka kalandenw daali k’u ka jina gwɛn ka bɔ a la, nga u ma se.”—Mariki 9:17, 18.

A be komi sariya karamɔgɔw be kalandenw kɔrɔfɔra le sabu u ma se ka kanbelenin kɛnɛya. N’a sɔrɔ u yɛrɛ b’u lɔgɔbɔra. Kanbelenin facɛ dusu kasinin lo. O kama, sanni Yezu k’a jaabi, a kumana jama fɛ ko: “Aw bii mɔgɔw kɔni, aw ka jugu, aw te la Ala la. Ne bena to n’aw ye k’aw ka koo muɲu fɔɔ tuma jumɛn?” N’a sɔrɔ o kuma gwɛlɛw ɲɛsinna sariya karamɔgɔw lo ma. Olu lo tun ye Yezu ka kalandenw darabɔ tuma min na a tun tɛ yen. Yezu y’a ɲɛɛ sin kanbelenin facɛ ma k’a fɔ ko: “Na n’i dencɛ ye yan.”—Luka 9:41.

Kanbelenin gwɛrɛtɔ Yezu la, jina min b’a la, ale y’a ta ka ben duguma ani k’a yuguyugu kosɔbɛ. Kanbele tora ka kolonkolon duguma ani a daa be kangara. Yezu ye deen facɛ ɲininga ko: “Kabini tuma jumɛn jina nin b’a tɔɔrɔ ten?” A y’a jaabi ko: “Kabin’a denmisɛn tuma. Siɲɛ caaman, jina y’a ta k’a ben tasuma na ani jii la janko a ka faga.” Deen facɛ ye Yezu deli ko: “N’i be se ka fɛɛn dɔ kɛ, hinɛ an na k’an dɛmɛ.”—Mariki 9:21, 22.

 Deen facɛ jigi tigɛnin lo sabu Yezu ka kalandenw ma se k’a dɛmɛ. Yezu y’a jaabi cogo min na, o y’a hakili sigi. Yezu ko: “Mun na i ko: ‘N’i be se’? Ni mɔgɔ min lara Ala la, Ala be se ka fɛɛn bɛɛ kɛ o tigi ye.” Kanbele facɛ sinna k’a fɔ ni kaanba ye ko: “Ne lara Ala la. Ne dɛmɛ janko ne kana sigasiga.”—Mariki 9:23, 24.

Yezu y’a ye ko jama be bolila ka na a fan fɛ. U bɛɛ ɲɛɛ na, a sɔngɔra o jina kan ko: “E min be mɔgɔ kɛ bobo ni tulogweren ye, n b’a fɔ i ye, bɔ kanbelen nin na, i kana don a la tugu.” Jina bɔtɔ kanbele la, a y’a kɛ a kulera ani a y’a yuguyugu kosɔbɛ. Kanbelenin benna ka kirin ka kɛ i n’a fɔ suu. Mɔgɔw y’o ye minkɛ, u caaman ko: “A sara.” (Mariki 9:25, 26). Nka, Yezu ye kanbelenin bolo minɛ ani a y’a dɛmɛ a wulila. “O yɔrɔnin bɛɛ a kɛnɛyara.” (Matiyo 17:18). O ye mɔgɔw kabakoya kosɔbɛ. O tɛ bari an na.

A ma mɛɛn, Yezu tun y’a ka kalandenw ci ka taga waajuli kɛ. O wagati la, u sera ka jinaw gwɛn. O kama, u donnin kɔ soo kɔnɔ, u ye Yezu ɲininga ko: “Mun na anw ma se ka jina nin gwɛn?” Yezu y’a ɲɛfɔ ko u ma se k’o kɛ u ka dannabaliya kosɔn. A ko: “Mɔgɔ te se ka jina nin ɲɔgɔn gwɛn cogo si la n’a ma Ala daali.” (Mariki 9:28, 29). Walisa ka se k’o jina barikaman gwɛn, kalandenw tun ka ɲi ka kɛ ni limaniya barikaman ye ani ka Ala deli a ka fanga di u ma.

Yezu y’a ka kumaw kuncɛ ko: “Tiɲɛ na, ne b’a fɔ aw ye, ko n’aw ka lanaya boɲa tun be mutaridikisɛ ta bɔ, aw tun be se k’a fɔ kulu nin ye ko a ka wili ka bɔ yan ka taga lɔ yen fɛ. O tun bena kɛ. Fɛɛn te yen n’aw tena se ka min kɛ.” (Matiyo 17:20). Tiɲɛn na, limaniya be se k’an dɛmɛ ka koobaw kɛ!

Gwɛlɛya minw b’an bali ka ɲɛtaga kɛ Jehova ka baara la, u be se ka kɛ an ɲɛɛ na i n’a fɔ kulu yɛrɛ yɛrɛ, mɔgɔ tɛ se ka min bɔ a nɔɔ na. Nka, limaniya be se k’an dɛmɛ ka see sɔrɔ o gwɛlɛyaw kan.