Taga a kɔnɔkow lajɛ

Taga a kɔnɔnakow lajɛ

 SAPITIRI 24NAN

Yezu b’a ka cidenyabaara kɛ Galile mara bɛɛ la

Yezu b’a ka cidenyabaara kɛ Galile mara bɛɛ la

MATIYO 4:23-25 MARIKI 1:35-39 LUKA 4:42, 43

  • YEZU N’A KA KALANDEN NAANI DƆW BE GALILE MARA BƐƐ YAALA

  • MƆGƆ CAAMAN BE YEZU KA WAAJULI N’A KA KABAKOW KOO MƐN

Tile kuru bɛɛ la, Yezu n’a ka kalandenw ma se ka lafiɲɛ. Wulafɛ, Kapɛrnaumkaw nana n’u ka banabagatɔw ye Yezu fɛ walisa a k’u kɛnɛya. Yezu ma wagati caaman sɔrɔ a yɛrɛ ye.

O dugusagwɛ sɔgɔmada joona, sanni kɛnɛ ka bɔ, Yezu wulila ka bɔ. A tagara yɔrɔ dɔ la a dan na walisa ka se k’a Faa deli. Nka, Yezu ma to a kelen ka mɛɛn. Tuma min na “Simɔn n’a tɔɲɔgɔnw” bɔra a kala ma ko Yezu tɛ yen, u tagara a yɔrɔ ɲini. N’a sɔrɔ o miiriya bɔra Piyɛri lo la sabu Yezu tun be ale lo ka soo.—Mariki 1:36; Luka 4:38.

U ye Yezu ye tuma min na, Piyɛri ko: “Mɔgɔ bɛɛ b’i yɔrɔ ɲinina.” (Mariki 1:37). Tiɲɛn na, Kapɛrnaumkaw b’a fɛ Yezu ka to n’u ye. A ye min kɛ u ye, o diyara u ye kosɔbɛ. O kama, u “y’a daali ko a ka to u kɔrɔ, ko a kana taga.” (Luka 4:42). Nka, Yezu nakun dugukolo kan, yala o tun ye ka kabakow kɛ ka mɔgɔw kɛnɛya wa? Ani a ka waajuli baara tun ka ɲi ka dan o yɔrɔ dɔrɔn lo ma wa? A ye mun lo fɔ o koo la?

Yezu y’a ka kalandenw jaabi ko: “An ka taga gɛrɛfɛduguw la, ne bena Ala ka kuma fɔ o yɔrɔw la fana, bari ne nana diɲɛ na o le kama.” Minw tun b’a fɛ Yezu ka to n’u ye, a yɛrɛ y’a fɔ olu ye ko: “Ne ka kan ka Ala ka masaya kibaru diman fɔ dugu tɔw la fana, bari ne cikun ye o le ye.”—Mariki 1:38; Luka 4:43.

Tiɲɛn na, kuun jɔnjɔn min kama Yezu nana dugukolo kan, o ye ka Ala ka Masaya kofɔ mɔgɔw ye. O Masaya lo bena a Faa tɔgɔ saniya ani ka adamadenw ka kunkow bɛɛ ban pewu. Yezu ye kabakow kɛ ka mɔgɔw kɛnɛya walisa k’a yira ko Ala lo y’a ci. O cogo kelen na, saan kɛmɛkulu caaman ka kɔn Yezu ka wagati ɲɛ, Musa fana tun ye kabakow kɛ k’a yira ko Ala lo y’a ci.—Ɛkizɔdi 4:1-9, 30, 31.

O kama, Yezu bɔra Kapɛrnaum ka taga dugu wɛrɛw la n’a ka kalanden naani nunu ye: Piyɛri n’a faden Andere, Zan n’a faden Zaki. A lɔgɔkun kelen ye nin ye Yezu y’a ɲini u fɛ u ka kɛ ale ka baarakɛɲɔgɔnw ye.

Yezu n’a ka kalanden naani ye Galile mara bɛɛ yaala ka waajuli kɛ. U ye sanga sɔrɔ kosɔbɛ o la! Yezu tɔgɔ bɔra yɔrɔ bɛɛ “fɔɔ ka taga se Siri jamana na . . . Dugu Tan mara la” (min be weele ko Dekapoli) ani Zurudɛn baji kɔfɛ (Matiyo 4:24, 25). Jamaba bɔra o yɔrɔw la ani Zude mara la ka tugu Yezu n’a ka kalandenw kɔ. Caaman nana n’u ka banabagatɔw ye a k’u kɛnɛya. Yezu m’u jigi tigɛ: a y’u ka banabagatɔw kɛnɛya ani ka jinaw gwɛn ka bɔ jinatɔw la.