Taga a kɔnɔkow lajɛ

Taga a kɔnɔnakow lajɛ

Walisa ka Yezu ladegi, an ka ɲi ka . . .

Walisa ka Yezu ladegi, an ka ɲi ka . . .

HINƐ

Yezu tun ye mɔgɔ dafanin ye. O kama, tɔɔrɔ ni hami minw be adamadenw sɔrɔ, u caaman ma Yezu sɔrɔ. O bɛɛ n’a ta, a y’a yira ko a be hinɛ mɔgɔw la. A tun labilanin lo k’a seko kɛ k’u dɛmɛ. Mɔgɔw makoya jɔnjɔn ye min ye, a yɛrɛ tun tɛ dan o dɔrɔn ma. Siga t’a la, hinɛ lo tun b’a lasun ka mɔgɔw dɛmɛ. A ɲini ka dɔ lɔn o koo la sapitiri 32, 37, 57, 99 kɔnɔ.

KƐ MƆGƆ YE MƆGƆW TƐ SIRAN KA GWƐRƐ MIN NA

Yezu tun t’a yɔrɔ janya mɔgɔw la, a tun t’a yɛrɛ fisaya tɔɔw ye. O kama, mɔgɔ si tun tɛ siga ka gwɛrɛ a la, denmisɛn fara mɔgɔkɔrɔba kan. A tun ka di u ye ka kɛ ni Yezu ye sabu u tun b’a lɔn ko a b’a janto u la. O koo lajɛ sapitiri 25, 27, 95 kɔnɔ.

KƐ MƆGƆ YE DELILI KA DI MIN YE

Yezu tun b’a kelen wo, a tun be ni Ala batobaga sɔbɛw ye wo, a tun ka teli k’a Faa deli n’a dusu bɛɛ ye. A tun t’o kɛ dumuni kɛtuma dɔrɔn na. A tun be delili kɛ k’a Faa waleɲuman lɔn, k’a tando ani k’a ka dɛmɛ ɲini ka sɔrɔ ka desizɔnba ta. O koo lakalila sapitiri 24, 34, 91, 122, 123 kɔnɔ.

TƆƆW KA NAFA ƝINI

Tuma dɔw la, Yezu mako tun b’a la ka lafiɲɛ dɔɔni. Nka sanni a k’o kɛ, a tun be tɔɔw ka nafa le ɲini fɔlɔ. A tun t’a yɛrɛ dɔrɔn nafa ɲini. A kɛra an fɛ ɲɛyirali ɲuman ye o koo la. O kalan sapitiri 19, 41, 52 kɔnɔ.

YAFA

Yezu ye mɔgɔw kalan yafali koo la. Nka a ma dan o dɔrɔn ma. A y’a ka kalandenw ani mɔgɔ tɔɔw minɛ cogo min na, o b’a yira ko ale yɛrɛ be yafa. Miiri o koo la. Sapitiri 26, 40, 64, 85, 131 lajɛ.

KISƐYA

A tun kɔnna ka fɔ Ala ka Kuma kɔnɔ ko Yahutuw fanba tɛna sɔn Masiya la ani ko Masiya juguw bena a faga. O koo tun be se k’a to Yezu t’a sɔbɛ don ka mɔgɔw dɛmɛ. Nka a y’a seko bɛɛ kɛ ka tiɲɛn batoli lafasa. O cogo la, a y’a yira ko a ka kalandenw ka kan ka kisɛya hali ni mɔgɔw t’u mako don u ka waajuli la wala n’u b’u kɛlɛ yɛrɛ. O koo lajɛ sapitiri 16, 72, 103 kɔnɔ.

KƐ NI MAJIGILENYA YE

Koo caaman na, adamaden dafabaliw tɛ se ka suma ni Yezu ye. Ɲɛyirali fɛ, a ka lɔnniya n’a ka hakilitigiya ka bon adamadenw ta ye. Mɔgɔ si fanga tun man bon ani mɔgɔ si hakili tun man di ka se Yezu ta ma sabu a tun dafanin lo. O bɛɛ n’a ta, a y’a yɛrɛ majigi ka mɔgɔw mako ɲɛ. I bena kalan sɔrɔ o koo la sapitiri 10, 62, 66, 94, 116 kɔnɔ.

KƐ NI MUƝULI YE

Yezu tun be muɲu tuma bɛɛ a kalandenw ani mɔgɔ tɔɔw kɔrɔ hali ni tuma dɔw la u ma se k’a ladegi wala u ma se k’a ka ladili sira tagama. A muɲuna ka segi k’u kalan siɲɛ caaman walisa k’u dɛmɛ u k’u magwɛrɛ Jehova la. A ka muɲuli kofɔra sapitiri 74, 98, 118, 135 kɔnɔ.