Taga a kɔnɔkow lajɛ

Taga a kɔnɔnakow lajɛ

 SAPITIRI 46NAN

A magara Yezu ka fani na ani a kɛnɛyara

A magara Yezu ka fani na ani a kɛnɛyara

MATIYO 9:18-22 MARIKI 5:21-34 LUKA 8:40-48

  • MUSO DƆ MAGARA YEZU KA FANI NA ANI A KƐNƐYARA

Yahutu minw be Galile bajida la saheli ni tileben cɛ, olu y’a mɛn ko Yezu bɔra Dekapoli mara la ka na. N’a sɔrɔ u caaman y’a mɛn fana ko a ma mɛɛn, Yezu ye fɔɲɔba ni baji mala. N’a sɔrɔ dɔw fana b’a lɔn ko a ye jinatɔw kɛnɛya. O kama, “mɔgɔ caaman” tagara lajɛn baji gɛrɛfɛ walisa ka Yezu kunbɛn. (Mariki 5:21). N’a sɔrɔ o yɔrɔ be Kapɛrnaum mara la. Yezu bɔra kurun kɔnɔ tuma min na, u bɛɛ kɔrɔtɔnin lo, u b’a fɛ k’a lɔn a bena min kɛ.

Mɔgɔ minw kɔrɔtɔnin lo ka Yezu ye, u dɔ ye Zayirus ye. Ale ye Alabatoso kuntigi dɔ ye. A y’a kunbiri gwan Yezu kɔrɔ ka to k’a deli ko: “N denmuso be ɲini ka sa. Sabali ka na i bolo la a kan janko a ka kɛnɛya ka to nii na.” (Mariki 5:23). A deen kelenpe lo, a be ni saan 12 dɔrɔn lo ye ani a koo ka gwɛlɛ Zayirus ma. Yezu bena mun lo kɛ do?—Luka 8:42.

Yezu ye Zayirus ka soo sira minɛ. A tagatɔ, a bɛnna makariko wɛrɛ la. Mɔgɔ minw be tugura Yezu kɔ, u caaman kɔrɔtɔnin lo k’a lɔn min bena kɛ. U b’u yɛrɛ ɲiningara n’u bena Yezu ye a be kabako wɛrɛ kɛra. Nka, muso dɔ be jama cɛma, bana jugu dɔ b’a la. Ale be miirila a ka bana le koo la dɔrɔn.

Kabi saan 12, o Yahutumuso tɔɔrɔnin lo jolibɔn bana bolo. A ye dɛmɛ ɲini dɔgɔtɔrɔ caaman fɛ, ani a ka wari bɛɛ banna furakɛli kosɔn. O n’a ta bɛɛ, a ka bana ma nɔgɔya, nga a ‘be juguyara ka taga.’—Mariki 5:26.

O bana ɲɔgɔn be mɔgɔ barika ban. A be maloya bila mɔgɔ la fana. N’o bana ɲɔgɔn be mɔgɔ la, a man di a tigi ye ka kuma o koo la mɔgɔw cɛma. Ka fara o kan, ka kɛɲɛ ni Musa ka sariya ye, jolibɔn bana be muso min na, u b’a jati ko a nɔgɔnin lo Alako ta fan fɛ. Mɔgɔ o mɔgɔ magara ale wala a ka joli faniw na, a tigi ka ɲi ka ko ani a nɔgɔnin be to fɔɔ wulafɛ.—Levitiki 15:25-27.

O muso ye “Yezu kibaru mɛn” ani a tagara a yɔrɔ ɲini. Komi a nɔgɔnin lo, a be tɛmɛ jama cɛma nɛmɛnɛmɛ. A y’a fɔ a yɛrɛ kɔnɔ ko: “Ni n sera ka maga a ka fani dɔrɔn na, n bena kɛnɛya.” A magara Yezu ka fani dakun na dɔrɔn, a y’a ye a farikolo la ko a ka jolibɔn lɔra yɔrɔnin kelen! A “ka bana banna.”—Mariki 5:27-29.

Yezu ye ɲiningali kɛ ko: “Jɔn magara ne la?” E ka miiriya la, muso y’o mɛn minkɛ, o ye mun lo kɛ a la? O ɲiningali ye Piyɛri kɔnɔ gwan ani a y’a fɔ Yezu ye ko: “I ɲaa b’a la ko mɔgɔw b’i digidigira fɔɔ k’i degun.” O la, mun na Yezu ye ɲiningali kɛ ko: “Jɔn magara ne la?” Yezu y’a ɲɛfɔ ko mɔgɔ dɔ magara ale la sabu a y’a ye ko fanga dɔ bɔra ale la (Luka 8:45, 46). Tiɲɛn na, kabako min kɛra, o ye dɔ bɔ Yezu ka fanga la.

Muso y’a ye ko Yezu bɔra a kala ma minkɛ, a yɛrɛyɛrɛtɔ y’a kunbiri gwan Yezu kɔrɔ siranya kosɔn. A ye tiɲɛn fɔ bɛɛ ɲɛɛ na a ka bana koo la ani a y’a fɔ fana a kɛnɛyara cogo min na. Yezu y’a dusu saalo ni kanuya ye ko: “N [denmuso], i kisira i ka lanaya barika la. Taga hɛrɛ la, i kɛnɛyanin ka to.”—Mariki 5:34.

Ala ye Mɔgɔ min sugandi ka dugukolo mara, siga t’a la, ale be mɔgɔw kanu ani a be makari. A b’a janto mɔgɔw la ani see b’a ye k’u dɛmɛ!