Isaias 66:1-24
66 Oniay inkuan nen Jehova:
“Say tawen so tronok, tan say dalin so toonan na salik.+
Anton klase na abung sirin so nipaalagey yo parad siak,+Tan iner so pasen a panayaman ko?”+
2 “Amin iraya et ginawa na limak,Kanian niwala irayan amin,” so inkuan nen Jehova.+
“Saya sirin so nengnengen ko,Say sakey a walaay mapaabeba tan nagogonigon ya espiritu, tan onggigiwgiw lapud* salitak.+
3 Samay mamapatey na baka et singa samay mangakabil na too.+
Samay mangibabagat na karnero et singa samay mamapakger na aso.+
Samay mangiyapay na regalo—singa say dalay baboy!+
Samay mangiyaapay na olibano bilang pakanodnonotan+ et singa samay mangibabalikas na panamendisyon ed panamegley na saray salitan uusaren ed panagmahiko.*+
Pinili ra so dilin panlabayan da,Tan nanliketan da* iray makapadimlan bengatla.
4 Kanian pilien ko met iray paraan a panusak ed sikara,+Tan iyakar kod sikara iramay bengatlan tatakotan da.
Ta anggapoy inmebat sanen tinmawag ak;Anggapoy dinmengel sanen nansalita ak.+
Intultuloy dan ginaway mauges ed pakanengneng ko,Tan pinili ran gawaen so bengatlan agko panliketan.”+
5 Dengel yoy salita nen Jehova, sikayo ran onggigiwgiw lapud* salita to:
“Inkuan na saray agagi yon mamubusol ed sikayo tan mangipupulisay ed sikayo lapud ngaran ko, ‘Nigloria komon si Jehova!’+
Balet Sikatoy manpanengneng tan panggayagaen to kayo,Tan nabaingan ira.”+
6 Walay ungol na paneyag ed syudad, sakey ya ungol ed templo!
Ta iiter nen Jehova so dusa a manepeg ed saray kalaban to.
7 Sikatoy nananak la antis a manpasakit.+
Inyanak to lay sakey ya ugaw a laki antis a nalikna toy pampasakit.
8 Siopa lay akadngel ed onian bengatla?
Siopa lay akanengneng ed onia ran bengatla?
Niyanak kasi ed sanagew so sakey a dalin?
Odino tampol kasin niyanak so sakey a nasyon?
Balet sanen nampasakit so Sion et tampol a sikatoy angiyanak na ananak a lalaki.
9 “Kasin abuloyan kon anggad ngalngali la iyanak insan ko amperen so ipaway to?” so inkuan nen Jehova.
“Odino kasin abuloyan kon onggapo so pananak insan ko lanlamang isara so panag-anakan?” so inkuan na Dios mo.
10 Miliket kayo ed Jerusalem tan manggayaga a kaiba to,+ amin yon mangaaro ed sikato.+
Miliket kayon maong ed sikato, amin yon maneermen lapud sikato,
11 Ta onsuso kayo tan naligliwan maong lapud sikato, a singa sakey ya ugaw a papasusoen na ina to,Tan oninum kayo na dakel tan panliketan yo so daakan a gloria to.
12 Ta oniay inkuan nen Jehova:
“Iter kod sikato so kareenan a singa ilog+Tan say gloria na saray nasyon a singa manag-agus a danum.+
Pasusoen tan ebaen to kayo,Tan panlugtoten to kayo ed akwalan to.
13 Singa sakey ya ina a liligliwaen toy anak to,Itultuloy ta kayo met a ligliwaen;+Tan naligliwa kayo lapud Jerusalem.+
14 Nanengneng yo iya, tan manggayaga so puso yo,Ombiskeg iray pukel yo a singa saray balon tinmubo a dika.
Tan say lima* nen Jehova et naamtaan na saray lingkor to,Balet ukomen to iray kalaban to.”+
15 “Ta onsabi si Jehova a singa apoy,+Tan saray karwahe to a singa maksil a dagem,+Pian ombales lapud baleg a sanok to,Pian manusa ed panamegley na mandarlang ya apoy.+
16 Ta idapo nen Jehova so panangukom ed panamegley na apoy,On, ed panamegley na espada to, sumpad amin a totoo;*Tan dakel so napatey nen Jehova.
17 “Manganggan amin iramay papasantosen tan lilinisan day sarili ra pian onloob ed saray hardin*+ tan tumboken da imay walad pegley, a kakanen da so karne na baboy+ tan saray makapadimlan bengatla, a pati say utot,”+ so imbaga nen Jehova.
18 “Lapud amtak iray gawa ra tan kanonotan da, onsabi ak pian tiponen ko so totoo ed amin a nasyon tan lenguahe, tan ondago ra tan nanengneng da so gloriak.”
19 “Mangiyan ak na sakey a tanda ed sikara, tan say arum ya akaliktar et ibakik ed saray nasyon—diad Tarsis,+ Pul, tan Lud,+ saramay manuusar na pana, diad Tubal tan Javan,+ tan diad saray ararawin isla—ya agni akadngel na balita nipaakar ed siak odino akanengneng ed gloriak; tan iyabawag da so gloriak diad saray nasyon.+
20 Awiten dan amin iray agagi yo manlapud amin a nasyon+ bilang regalo ed si Jehova, ya akalugan ira ed saray kabayo, karwahe, atarongan a kariton, asno, tan ed saray maples a kamelyo, pian itatdang da ra ed masanton palandey ko, say Jerusalem, a singa saray totoo na Israel sano iyaakar dad abung nen Jehova iray regalo ran akakarga ed malinis a pananginan,” so inkuan nen Jehova.
21 “Alaen ko met so pigara pian magmaliw iran saserdote tan Levita,” so inkuan nen Jehova.
22 “Ta no panon a say balon tawen tan balon dalin+ a gawaen ko et mansiansia ed arapan ko,” so imbaga nen Jehova, “ontan met so pansiansia na ilalak* yo tan say ngaran yo.”+
23 “Tan diad kada balon bulan tan kada sabaton,Ondago so amin a totoo* pian ondakmomo ed arapan ko,”*+ so inkuan nen Jehova.
24 “Tan ompaway ira tan nengnengen da iray bangkay na totoo a nanrebelde ed siak;Ta ag-ompatey iray bigis a manguupot ed sikara,Tan agnaerep so apoy a mamopool ed sikara,+Tan magmaliw iran makapadimla ed amin a totoo.”*
Paimanod leksab
^ Odino “mapaga nipaakar ed.”
^ Odino posiblin, “samay mandadayew ed sakey ya idolo.”
^ Odino “nanliketan na kamarerwa ra.”
^ Odino “mapaga nipaakar ed.”
^ Odino “pakayari.”
^ Literal, “amin a laman.”
^ Salanti, saray espisyal a hardin ya uusaren ed panagdayew ed idolo.
^ Literal, “bini.”
^ Literal, “amin a laman.”
^ Odino “pian mandayew ed siak.”
^ Literal, “amin a laman.”
