Isaias 49:1-26
49 Dengel yo ak, sikayo ran isla,Tan talineng kayo, sikayo ran ararawin nasyon.+
Tinawag ak la nen Jehova antis ak a niyanak.*+
Sinalambit to lay ngaran ko sanen wala ak nid eges nen inak.
2 Ginawa ton singa makdem ya espada so sangik;Sinaniban to ak na anino na lima to.+
Impagmaliw to ak a mautok a pana;Inyamot to ak ed pananginan toy pana.
3 Inkuan tod siak: “Sika so lingkor ko, O Israel,+Diad panamegley mo et ipanengneng koy karakpan ko.”+
4 Balet inkuan ko: “Anggapoy kakanaan na impansagpot ko.
Inupot koy biskeg ko parad andi-kakanaan tan kaapaan.
Balet seguradon si Jehova so mangukom ed siak*Tan say Dios ko so mangiter na upak.”*+
5 Tan natan et imbaga nen Jehova, say amorma ed siak ed eges pian magmaliw a lingkor to,Ya ipawil kod sikato so Jacob,Ta pian natipon ed sikato so Israel.+
Nigloria ak ed pakanengneng nen Jehova,Tan say Dios ko so magmaliw a biskeg ko.
6 Tan inkuan to: “Aliwan magenap so pagmaliw mon lingkor koPian niletneg lamet iray tribu nen JacobTan nipawil iramay akaliktar ya Israelita.
Inter ta ka met bilang sakey a liwawa na saray nasyon,+Pian onsabi anggad saray sampot na dalin so panangiliktar ko.”+
7 Oniay inkuan nen Jehova, say Mananondon tan say Masanton Dios na Israel,+ ed samay minudmora,*+ samay kabkabusol na nasyon, say lingkor na saray manuley:
“Nanengneng na saray arari tan onalagey ira,Tan ondakmomo iray prinsipeLapud si Jehova, say matoor,+Say Masanton Dios na Israel, ya amili ed sika.”+
8 Oniay inkuan nen Jehova:
“Inebatan ta ka diad panaon na panangasi,*+Tan tinulongan ta ka diad agew na kililiktar;+Sinalimbengan ta ka pian iter ta ka bilang sipanan parad saray totoo,+Pian naapiger so dalin,Pian nakayarian da lamet iray ataynanan a tawir da,+
9 Pian nibaga ed saray priso, ‘Paway kayo!’+
Tan ed saramay walad kabilungetan,+ ‘Manpanengneng kayo!’
Mangan ira diad abay na saray dalan,Diad abay na saray basbas a naynay a dadalanan* so pangipastolan ed sikara.
10 Ag-ira naerasan odino napaet,+Ag-ira nasakitan ed mansasnit a petang odino ed sinag na agew.+
Ta iwanwan ira na samay walaan na panangasi ed sikara,+Tan itonton to ra ed saray subol na danum.+
11 Pagmaliwen kon karsada so amin a kapalandeyan ko,Tan niyatagey iray manunan dalan ko.+
12 Manlapu rad ararawin pasen,+Tan manlapu rad amianen tan sagur,Tan manlapu rad dalin na Sinim.”+
13 Eyag kayo ed liket, sikayo ran katawenan, tan manggayaga ka, O dalin.+
Oneyag komon ed liket iray kapalandeyan.+
Ta niligliwa nen Jehova so totoo to,+Tan kinasian to iray apairap a totoo to.+
14 Balet ibabaga na Sion:
“Tinaynan ak la nen Jehova,+ tan alingwanan ak la nen Jehova.”+
15 Nalingwanan kasi na ina so mansususon anak toOdino agto kasi kasian so anak to a nanlapud mismon eges to?
Makalingwan man irayan bibii, agta kan balot lingwanan.+
16 Inyukit ta kad saray dakulap ko.
Saray padir mo et naynay a walad arapan ko.
17 Nangganat a pinmawil iray ananak mo.
Taynanan ka na saramay angigeba tan aneral ed sika.
18 Tangwa ka tan nengneng kad kaliberliber.
Mantitipon iran amin,+
Ondago rad sika.
“Unong a mabilay ak,” so imbaga nen Jehova,“Isulong mo ran amin a singa saray parakep,Tan ikawes mo ran singa pangikakawes na sakey a nobya.
19 Anggaman aderal tan agnapanayaman iray pasen mo tan ageraygeray so dalin mo,+Natan et magmaliw itan a mainget parad saramay manaayam ditan,+Tan niyarawi la iramay mangaakmon ed sika.+
20 Narengel mon ibaga na saramay nagmaliw ya ananak mo kayarin naandian kay ananak,‘Mainget la iyan pasen parad siak.
Mangiter kay pasen a panayaman ko.’+
21 Tan ibabagam ed sarilim,‘Siopay ama na sarayan ananak a niiter ed siak,Anta sakey ak a biin naandiay ananak tan agmakaanak,Nibantak ed arum a dalin tan nipriso?
Siopay amabaleg ed sikara?+
Bukbukor koy atilak,+Kanian iner so nanlapuan da?’”+
22 Oniay inkuan na Soberanon Katawan a Jehova:
“Itagey koy limak pian nanengneng na saray nasyon,Tan itagey koy tandak* pian nanengneng na totoo.+
Ebaen da ray ananak mon lalaki ed taklay* da,Tan awiten da ray ananak mon bibii ed takeb da.+
23 Saray arari so magmaliw a manag-asikasom,+Tan saray prinsesa ra so managkomis mo.
Ondakmomo ra ed sika diad dalin,+Tan dildilan day dabok ed salim,+Tan naamtaan mon siak si Jehova;Agnabaingan iramay maniilalo ed siak.”+
24 Kasin nabawi ni iramay narel la na sakey a mabiskeg a too,Odino kasin niliktar ni iramay inala la na maruksan manuley?
25 Balet oniay inkuan nen Jehova:
“Anggan saramay inerel la na mabiskeg a too et nabawi ni,+Tan saramay inala la na maruksan manuley et niliktar ni.+
Sumpaen ko iramay onsusumpad sika,+Tan iliktar ko ray ananak mo.
26 Ipakan ko ed saramay mamapairap ed sika so dilin laman da,Tan nabuek ira ed dilin dala ra a singa ed masamit ya alak.
Tan naamtaan na amin a totoo* a siak si Jehova,+Say Manangiliktar+ tan Mananondon mo,+Say Makapanyarin Dios nen Jacob.”+
Paimanod leksab
^ Literal, “manlapud eges.”
^ Odino “Balet ipagamor ed siak nen Jehova so hustisya.”
^ Odino “tumang ko.”
^ Odino “minudmoran kamarerwa.”
^ Odino “kaabigay-linawa.”
^ Odino posiblin, “saray pukdol ya anggapoy tanem.”
^ Literal, “pagew.”
^ Odino “palitek a pinagkatandak.”
^ Literal, “amin a laman.”
