Isaias 33:1-24
33 Pakaskasi ka la, sikan managderal ya anggapoy manederal ed sika;+Sikan traidor ya anggapoy mantratraidor ed sika!
Sano mangangga lay panagderal mo, sika met so naderal.+
Sano mangangga lay pantratraidor mo, sika met so traidoren da.
2 O Jehova, kasian mo kami.+
Sika so kawalaay ilalo mi.
Magmaliw ka komon a taklay* mi+ a kinabuasan,On, say kililiktar mi diad panaon na gonigon.+
3 Diad ungol na panggugulo et ombatik iray totoo.
Sano onalagey ka et mantatayak iray nasyon.+
4 Singa pantitipon na saray masisiban duron, ontan met so pakatipon ed samsam mo;Dagsaen itan na saray totoo a singa amungkog a duron.
5 Nitandoro si Jehova,Ta sikatoy manaayam ed sankatageyan a pasen.
Panoen toy Sion na inkahustisya tan inkatunong.
6 Sikato so lapuay inkaligen ed saray panaon mo;Say baleg a kililiktar,+ karunongan, pikakabat, tan say takot ed si Jehova+—Saya so kayamanan to.
7 Oneyag ed karsada iramay totoon pandidinayewan da;Onakis na ampaipait iray mensahero na kareenan.
8 Ataynanan iray manunan dalan;Anggapo lay ondadalan ed saray karsada.
Sinumlang to* so sipanan;Impulisay to iray syudad;Agto inkabkabilangan so too.+
9 Nanermen* tan kinmapuy so dalin.
Abaingan so Lebanon,+ abulok la.
Nagmaliw a singa desierto so Saron,Tan impagpag na Basan tan Carmel iray bulong da.+
10 “Onalagey ak natan,” so inkuan nen Jehova,“Itandorok natan so sarilik;+Iyatagey ko natan so sarilik.
11 Mangilukon kayo na amagan dika tan mangiyanak kayo na dayami.
Upoten kayo na mismon espiritu yo a singa apoy.+
12 Tan saray totoo et magmaliw a singa apoolan a dena.
Napoolan ira a singa saray pinutot a sabit.+
13 Sikayo ran walad arawi, dengel yo no antoy gawaen ko!
Tan sikayo ran walad asingger, bidbir yoy pakayarik!
14 Tinmakot iramay makasalanan diad Sion;+Ginmiwgiw iramay apostata:
‘Siopad sikatayo so makayarin manbilay ed kawalaay manguupot ya apoy?+
Siopad sikatayo so makayarin manbilay ed kawalaay agnaerep ya apoy?’
15 Samay manutumbok ed inkatunong,+Mansasalita na kaptekan,+Mangipupulisay ed agmanepeg tan masaol a nabang,Ya agmangaawat na pasuksok imbes ya anamoten to itan,+Ag-ondedengel ed saray plano a pamatey,Tan ililikdem toy mata to pian agto nanengneng so mauges
16 —Sikatoy manayam ed atagey a pasen;Say maligen a salimbengan* to et diad saray mabaton pasen a panag-amotan.Sikatoy naikdan na tinapay,Tan sikatoy agnaandiay danum.”+
17 Sakey a maglorian ari so nanengneng mo;Sakey a dalin ed arawi so nabantag da.
18 Nanonotan* mod pusom iyan makapataktakot a bengatla:
“Kawalaan to imay sekretaryo?
Kawalaan to imay managbayar na buis?+
Kawalaan to imay manbibilang na saray tori?”
19 Anggapo lay nanengneng mon agmangitaltalek a totoo,Totoon say lenguahe ra et agaylay irap* a talosan,Ya agmo natalosan so ata-atan dila ra.+
20 Nengneng moy Sion, say syudad a kawalaan na saray piesta tayo!+
Nanengneng mo a say Jerusalem et mareen ya ayaman,Sakey a tolda ya agbalot niyalis.+
Agnabagot iray palpal to,Tan agnapultot iray lubir to.
21 Imbes, salimbengan itayo na Maglorian Dios a Jehova diad satan a pasen,A singa saray ilog tan maawang iran kanal,Ya agmakaloob ed saratan so grupo na saray barkoTan anggapoy makadalan a baleg a barko.
22 Ta si Jehova so Ukom tayo,+Si Jehova so Manangiter na Ganggan ed sikatayo,+Si Jehova so Ari tayo;+Sikato so mangiliktar ed sikatayo.+
23 Naukbar iray lubir mo;Agda nipaalagey so posten pangisisingeray layag tan agda nibuskag so panaglayag.
Diad satan a panaon et panaapagan so dakel a samsam;Anggan say piley et mangala na dakel a samsam.+
24 Tan anggapoy manaayam ditan a mangibagay: “Mansasakit ak.”+
Naperdona lay kasalanan na saray totoon manaayam ed satan a dalin.+
Paimanod leksab
^ Odino “biskeg.”
^ Manutukoy ed kabusol.
^ Odino posiblin, “Amagaan.”
^ Odino “Say atagey tan maligen a pasen.”
^ Odino “Dalepdepen.”
^ Literal, “kaaralem.”
