Isaias 29:1-24
29 “Pakaskasi lay Ariel,* say Ariel, say syudad a nankampoan nen David!+
Palabas yo iray taon;Itultuloy yon selebraan iray tinaon a piesta yo.+
2 Balet gonigonen ko so Ariel,+Tan walay panermen tan pantagleey,+Tan sikatoy ipasen kon singa panagpoolan ed altar na Dios.+
3 Mankampo ak ed kaliberliber mo pian lusoben ta ka,Tan paliberan ta ka na saray palitekTan mangipaalagey ak na saray panagkubkob ed sika.+
4 Tan nipaabeba ka;Mansalita ka manlapud dalem na dalin,Tan agnatalosan so ibagam lapud dabok.
Ompaway so boses mo manlapud dalem na dalin+A singa boses na sakey ya espiritista,Tan saray salitam et singa uni a manlalapud dabok.
5 Magmaliw a singa pinon pulbos iray kalaban mo,*+Tan singa taep ya ipapalir na dagem iray maruksan manuley.+
Tampol itan a nagawa, bigbigla.+
6 Imanoen ka nen Jehova na saray armadaDiad panamegley na karol tan yegyeg tan maksil ya ungol,Maksil a dagem tan bagyo tan say dalang na apoy a manguupot.”+
7 Insan say amin a nasyon a milalaban ed Ariel+—Amin a milalaban ed sikato,Saray tori a pangubkob ed sikato,Tan saramay mangogonigon ed sikato—Et magmaliw a singa labat kugip, sakey a pasingawey ed labi.
8 On, singa sakey a narasan a mankukugip a mamangan,Balet kabangon to et narasan nin siansia,*Tan singa sakey a napgaan a mankukugip ya oniinum,Balet kabangon to et naksawan tan napgaan nin siansia.*
Ontan so nagawa ed amin a nasyonA milalaban ed Palandey Sion.+
9 Ta inyibung nen Jehova ed sikayo so espiritu na aralem ya ugip;+Perengan yo ray mata yo pian agkayo makanengneng.+
Abuek ira, balet aliwan lapud alak;Mantugingging ira, balet aliwan lapud de-alkohol ya iinumen.
10 Ta inyibung nen Jehova ed sikayo so espiritu na aralem ya ugip;+Pinerengan to iray mata yo, salanti, saray propeta,+Tan sinakbongan to iray ulo yo, salanti, saray makakanengneng na pasingawey.+
11 Parad sikayo, kada pasingawey et singa saray salita ed selyadon libro.+ Sano iter da itan ed sakey a makabasa, ya ikuan dan: “Ipangasim pan basaen a maksil,” oniay iyebat to: “Agnayari, ta selyado.”
12 Tan sano iter da so libro ed sakey ya agmakabasa, ya ikuan dan: “Ipangasim pan basaen a maksil,” oniay iyebat to: “Agak makabasa.”
13 Oniay inkuan nen Jehova: “Onaasingger ed siak irayan totoo ed panamegley labat na sangi ra,Tan papagalangan da ak ed panamegley na bibil da,+Balet arawrawi ed siak so kapusoan da;Tan say takot da ed siak et base ed saray ganggan na totoo a nibangat ed sikara.+
14 Kanian siak so manggawa lamet na saray makapakelkelaw a bengatla parad sayan totoo,+Mantutumbokan a pakelaw;Tan naandi so karunongan na saray marunong a totoo ra,Tan niyamot so pakatalos na saray makabat a totoo ra.”+
15 Pakaskasi la iramay mansasagpot a maong pian iyamot dad si Jehova iray plano* ra.+
Gagawaen dad ambilunget a pasen iray kagagawa ra,Legan dan ibabaga: “Siopay makanengneng ed sikatayo?
Siopay makaamta ed gagawaen tayo?”+
16 Agaylay pamipikewet yod saray bengatla!*
Kasin say managdamili et ipasen a mipara ed samay pitek?+
Ibaga kasi na samay ginawa ed samay nanggawa ed sikato:
“Agto ak ginawa”?+
Tan ibaga kasi na samay ginawa ed samay nanggawa ed sikato:
“Anggapoy amta to”?+
17 Agla manbayag et magmaliw lan tanemay manbubungan kiew so Lebanon+Tan sayan tanemay manbubungan kiew et ipasen lan singa sakey a katakelan.+
18 Diad satan ya agew et narengel na saray telek iray salita ed libro,Tan manlapud kabilungetan tan inkaandiay liwawa et makanengneng iray bulag.+
19 Tan saray mauyamo et manliket a maong ed si Jehova,Tan saray pobrin totoo et manggayaga ed Masanton Dios na Israel.+
20 Ta naandi so maruksan manuley,Mangangga so mapasirayew,Tan naderal so amin a manatalaran a mamasakit,+
21 Saramay mansasalita na tila pian pankasalananen da so arum,A papatitan da so manangiyagel* a walad puerta na syudad,+Tan uusaren day pikewet a panagkatunongan pian agnaikday hustisya imay matunong.+
22 Kanian si Jehova ya anondon ed si Abraham+ et oniay inkuan tod sankaabungan nen Jacob:
“Agla nabaingan si Jacob,Tan agla ompusisaw so lupa to.*+
23 Ta sano nanengneng to ray anak to,Say kimey na saray limak, a kaiba to,+Pasantosen day ngaran ko;On, pasantosen day Masanton Dios na Jacob,Tan igalgalang da so Dios na Israel.+
24 Saramay anawet so ulo ra et nawalaay pakatalos,Tan saramay manrereklamo et mangawat na panangibangat.”
Paimanod leksab
^ Nayarin mankabaliksay “Say Panagpoolan Diad Altar na Dios,” a mapatnag a manutukoy ed Jerusalem.
^ Literal, “iray estranghero ed sika.”
^ Odino “et anggapoy karga na kamarerwa to.”
^ Odino “tan amagaan so kamarerwa to.”
^ Odino “simbawa.”
^ Odino “Agaylay inkapikewet na panagnonot yo!”
^ Literal, “so mangipepetek.”
^ Salanti, lapud kababaingan tan inkadismaya.
