Isaias 45:1-25
45 Oniay inkuan nen Jehova ed samay nilanaan to, si Ciro,+A say kawanan a lima to et binembenan ko+Pian taloen koy amin a nasyon a walad arapan to,+Pian ekalen koy armas* na saray arari,Pian lukasan ko ed arapan to so doblin kapot,Ta pian agnikapot iray puerta na syudad:
2 “Onla ak ed unaan mo,+Tan plastadoen ko iray pukdol.
Gaygayen ko iray gansan puerta,
Tan puteren ko iray balatyang a balewet.+
3 Iter kod sika iray kayamanan ed kabilungetanTan saray niyamot a kayamanan diad saray akasekreton pasen,+Pian naamtaan mo a siak si Jehova,Say Dios na Israel, a manatawag ed sika ed ngaran mo.+
4 Nisengeg ed lingkor kon Jacob tan say Israel a pinilik,Tawagen ta ka ed ngaran mo.
Ikdan ta kay mapagalang a ngaran, anggaman agmo ak kabat.
5 Siak si Jehova, tan anggapo lay arum.
Anggapo lay Dios nilikud ed siak.+
Pabiskegen ta ka,* anggaman agmo ak kabat,
6 Pian naamtaan na saray totooManlapud bubutayan na agew ya anggad seselekan na satan*Ya anggapo lay arum nilikud ed siak.+
Siak si Jehova, tan anggapo lay arum.+
7 Papawalaen koy liwawa+ tan kabilungetan,+Say kareenan+ tan kadederal;+Siak, si Jehova, so manggagawad sarayan amin a bengatla.
8 O katawenan, ipelag yoy uran;+Ikalbo komon na saray lurem so inkatunong.
Nalukasan komon so dalin tan manbunga na kilalaban,Tan ontubon kabansag na satan so inkatunong.+
Siak, si Jehova, so amalsa ed satan.”
9 Pakaskasi la imay milalaban* ed Manamalsa to,*Ta sikatoy sakey labat a langaA kaiba na saray arum a langa a nitaytayak ed dalin!
Ibaga kasi na pitek ed samay Managdamili:* “Antoy gagawaen mo?”+
Odino ibaga kasi na samay ginawam: “Anggapoy lima to”?*
10 Pakaskasi la imay mangibabaga ed ama to: “Akin et inilalak mo ak ni?”
Tan ed ina to: “Akin et inyanak mo ak ni?”*
11 Oniay inkuan nen Jehova, say Masanton Dios na Israel,+ say amorma ed sikato:
“Tepetan yo ak kasi nipaakar ed saray bengatlan onsabiTan iganggan yo ak nipaakar ed saray ananak ko+ tan saray kimey na limak?
12 Siak so nanggawa ed dalin+ tan amalsa ed too.+
Imbilkag na limak so katawenan,+Tan siak so mangigaganggan ed amin ya armada ditan.”+
13 “Walay sakey a pinatalindeg ko ed inkatunong,+Tan gawaen kon maptek so amin a dalan to.
Sikato so mangipaalagey ed syudad ko+Tan ibulos to iramay nipriso a kayarian ko,+ ya agla kaukolay bayar odino pasuksok,”+ so inkuan nen Jehova na saray armada.
14 Oniay inkuan nen Jehova:
“Say tubo* na Ehipto, saray produkto* na Etiopia, tan saray Sabeo, ya atatagey ira,Onla rad sika tan nakayarian mo ra.
Akagulonggulong iran manakar ed benegan mo,
Ondago ra tan ondakmomo rad sika.+
Oniay mapagalang ya ibaga rad sika: ‘Talagan say Dios et walad sika,+Tan anggapo lay arum; anggapo lay arum a Dios.’”
15 Tuan sika so Dios a mangiyaamot ed saray dalan mo,O Dios na Israel, say Manangiliktar.+
16 Nabaingan tan napabanday iran amin;Ontaynan a mabanbanday so amin a managgaway idolo.+
17 Balet iliktar nen Jehova so Israel tan iter toy andi-anggaan a kililiktar.+
Agkayo nabaingan odino napabanday ya anggad angga.+
18 Ta oniay inkuan nen Jehova,Say Manamalsa na katawenan,+ say tuan Dios,Say amorma tan amalsa ed dalin, a malet ton inletneg itan,+
Tan agto pinalsa ya andiay gagala,* noagta ginawa ton panayaman:+“Siak si Jehova, tan anggapo lay arum.
19 Agak nansalita ed maamot a pasen,+ diad dalin ya ambilunget;Agko imbagad ilalak* nen Jacob,‘Anap yo ak, balet anggapoy kakanaan na sagpot yo.’
Siak si Jehova, a mansasalitay matunong tan mangibabagay maptek.+
20 Mantitipon kayo tan dago kayo.
Mandaragup kayo, sikayo ran akablos ed saray nasyon.+
Anggapoy amta na saramay mangaawit na inukit ya imahen,
Tan manpipikasi ed sakey a dios ya agmakapangiliktar ed sikara.+
21 Mansalita kayo, iyarap yoy kaso yo.
Mantetepetan ira komon.
Siopay angipasakbay ed saya manlapu la nensamanTan siopay angibaga ed saya manlapud apalabas a panaon?
Agta siak, si Jehova?
Anggapo lay arum a Dios nilikud ed siak;Sakey a matunong a Dios tan Manangiliktar,+ anggapo lay arum nilikud ed siak.+
22 Dapag kayod siak pian niliktar kayo,+ amin yon walad sampot na dalin;Ta siak so Dios, tan anggapo lay arum.+
23 Nansamba ak ed ngaran ko;Pinmaway ed sangik so salita diad inkatunong,Tan ag-iya ompawil:+
Amin a pueg et ontalimukor ed siak,Amin a dila et mansamba ed siak diad katooran+
24 Tan ibaga ra, ‘Peteg a si Jehova so kawalaay tuan inkatunong tan biskeg.
Nabaingan ya onarap ed sikato so amin ya onsasanok ed sikato.
25 Lapud si Jehova, amin ya ilalak* na Israel et napaneknekan a duga,+Tan manpasirayew ira lapud sikato.’”
Paimanod leksab
^ Literal, “ekalen koy balkes ed awak.”
^ Literal, “Balkesan ta kay malet.”
^ Odino “Manlapud bukig ya anggad sagur.”
^ Odino “misasangsangan.”
^ Odino “amorma ed sikato.”
^ Odino “amorma ed sikato.”
^ Odino posiblin, “Odino ibaga kasi na pitek: ‘Anggapoy panagbembenan na ginawam’?”
^ Odino “Anto iyay nampasakitan mon inyanak?”
^ Odino posiblin, “Saray trabahador.”
^ Odino posiblin, “saray managlako.”
^ Odino posiblin, “ya anggapoy manayam.”
^ Literal, “bini.”
^ Literal, “bini.”
