Isaias 20:1-6
-
Tanda sumpad Ehipto tan Etiopia (1-6)
20 Diad samay taon a si Arin Sargon na Asirya et imbaki tod Asdod+ so Tartan,* sikatoy akiguerra ed Asdod tan sinakop to itan.+
2 Diad saman et oniay imbaga nen Jehova ed si Isaias+ ya anak nen Amoz: “La ka, ekal moy sakon abel ed balangbang mo, pati saray sandalyas ed salim.” Tan ontan so ginawa to, a nanakar a lakseb* tan kasalisali.
3 Insan inkuan nen Jehova: “No panon a si Isaias ya aripen ko et nanakar a lakseb tan kasalisali ed loob na taloy taon bilang tanda+ tan pasakbay parad Ehipto+ tan Etiopia,+
4 ontan met so nagawa sano alaen na ari na Asirya iray narel tod Ehipto,+ tan saray taga Etiopia ya ibantak tod arum a bansa, ugugaw tan mamasiken, lakseb tan kasalisali tan sankanengneng so tapi ra, say inkalakseb* na Ehipto.
5 Tan nataktakot ira tan ibaing da so Etiopia a paniilaloan da tan say Ehipto ya ipapasirayew da.*
6 Diad satan ya agew et ibaga na saray manaayam ed sayan dalin a walad bandad gilig na dayat, ‘Nengneng yoy agawa ed samay paniilaloan tayo, a nila tayon kerewan na tulong, ta pian nisalba itayo komon ed ari na Asirya! Panon lay pakaliktar tayo natan?’”
