Amalumbo 73:1-28
Ulwimbo lwa kwa Asafi.+
73 Cine cine Lesa musuma kuli Israele, ku basanguluka imitima.+
2 Lelo ine, amakasa yandi yapene yapaasuke,+Inkasa shandi shapene shitelemuke.+
3 Pantu natendeke ukukumbwa aba mataki,+Ilyo namona umutende wa babifi.+
4 Pantu tabakwata ifibakalipa;+Na mafumo yabo yalibotoka.+
5 Kabili bena tabaculako filya umuntu umwina kufwa acula,+Ne fibi tafibacitikila nga filya ficitikila abantu bambi.+
6 E ico kuli bena amatutumuko yaba nge cibekobeko ca kufwala mu mukoshi;+Bafwala ubunkalwe nge ca kufwala.+
7 Amenso yabo yalitumbuka pa mulandu wa kwina;+Balicila pa fyelenganya imitima yabo.+
8 Balapumya no kulanda pa fyabipa;+Balanda pa fya bucenjeshi cilumba cilumba.+
9 Utunwa twabo babika mu muulu,+No lulimi lwabo lwendauka pano isonde.+
10 E ico abwesha abantu,Na menshi ayengi yapongolwelwa pali bena.
11 Na bo batila: “Bushe Lesa aishiba shani?+Kabili bushe ku Wapulamo kwaba ukwishiba?”+
12 Moneni! Aba e mbifi, abaikala umutende umuyayaya.+Balifusha ifyuma fyabo.+
13 Kanshi naicusha fye pa kusangulula umutima wandi+Kabili ca fye ukusamba iminwe yandi muli bukaele.+
14 Kabili naponenwe no bucushi akasuba konse,+Kabili nale-ebaulwa ulucelo no lucelo.+
15 Nga natile: “Nkasosa ilyashi nga lilya,”Moneni! inkulo ya bana benuNga e yo nabepele.+
16 Awe nakonkenyepo ukutontonkanya ukuti njishibe ici cintu;+Calencululusha,
17 Mpaka nayaingila umwa mushilo umwa kwa Lesa.+Nafwaile ukwishiba inshita yabo iya ku ntanshi.+
18 Cine cine mwababika apatelela.+Mwabalenga ukupona no konaulwa.+
19 Iye ifyo basanguka aba kupapusha abantu mu nshita fye iinono!+Ifyo bafika ku mpela yabo, yangu ifyo bapwa ku bucushi bwa kupumikisha!
20 Nge ciloto pa numa ya kushibuka, mwe Yehova,+E fyo mukabakaana misuula misuula ilyo mukabuuka.+
21 Pantu umutima wandi wali uwakalipa+Na mu mfyo shandi mwalekalipa icine cine,+
22 Kabili nshaletontonkanya bwino kabili nshaishibe;+Nali fye nge cinama kuli imwe.+
23 Lelo ndi na imwe pe;+Mwaikata ukuboko kwandi ukwa ku kulyo.+
24 Ku mano ayo mwampanda e ko mukantungulwila,+Na pa numa mukantungulula ku bukata.+
25 Mu muulu nani uwandi?+Kabili pano isonde tapali uo natemwa nge fyo namutemwa.+
26 Umubili wandi no mutima wandi fyanaka.+Lesa cilibwe ca mutima wandi icasansuka kabili icakaniko candi umuyayaya.+
27 Pantu moneni! abaitalusha kuli imwe bakaloba.+Mukalofya bonse abacita bucilende pa kuitalusha kuli imwe.+
28 Lelo ine, ukupalama kuli Lesa kusuma kuli ine.+Muli Shikulu Mulopwe Yehova e mo nauba,+Ku kubila imilimo yenu yonse.+
