Amalumbo 73:1-28
Ulwimbo lwa kwa Asafi.+
73 Cine cine Lesa musuma kuli Israele, ku basanguluka imitima.+
2 Lelo ine, kwashele fye kwempe amakasa yandi nga yalifumine mu nshila;Kwashele fye panono amakasa yandi nga yalishelemwike.+
3 Pantu natendeke ukukumbwa abayumfwa*Ilyo namwene ukuti ifintu file-endela bwino ababifi.+
4 Pantu tabacula mpaka bafwa;Baliba no bumi ubusuma kabili balalya bwino.*+
5 Tabakwata amafya ayo abantu bonse bakwata,+Kabili tabacula nga filya abantu bambi bacula.+
6 E ico bafwala icilumba mu mikoshi yabo;+Bafwala ubunkalwe nge ca kufwala.
7 Mu menso yabo mwalingila pa mulandu wa kuti balekala bwino;*Ifyo bakwata fyalicila na pa fyo imitima yabo yale-elenganya.
8 Balapumya kabili balalanda ifyabipa.+
Balaba ne cilumba ilyo baletiinya abantu ukuti bakalabacusha.+
9 Balanda kwati baba apasansuka nga filya umuulu wasansuka,Kabili ululimi lwabo lwenda cilumba cilumba pano isonde.
10 E ico abantu bakwe baalukila kuli bena,Kabili banwa amenshi yabo* ayengi.
11 Balanda abati: “Bushe Lesa eshiba shani?+
Bushe cine cine Uwapulamo alishiba fyonse?”
12 Aba e babifi abashakwata ica kubasakamika nangu cimo.+
Bakwatilako fye ifyuma.+
13 Kanshi naicusha fye ifi nasangulula umutima wandiNe fi nasamba iminwe yandi pa kulanga ukuti ndi wa kaele.+
14 Kabili naleba na mafya akasuba konse;+Cila lucelo balenkalipila.+
15 Lelo nga nalilandile ifi fintu,Nga nalipondokeele abantu benu.*
16 Ilyo nalefwaya ukwishiba icalenga cibe ifi,Naleumfwa ububi
17 Mpaka ilyo naingile mu cifulo ca mushilo ica kwa Lesa,Kabili nalilwike ifikacitikila ababifi.
18 Ukwabula no kutwishika mwababika apatelela.+
Mulenga bawa no konaika.+
19 Yangu ifyo baloba bwangu!+
Mu kupumikisha ubucushi bwabaponena kabili bafwa!
20 Nga filya umuntu alaba iciloto alotele nga abuuka,E fyo na imwe mwe Yehova mukabalaba* nga mwabuuka.
21 Lelo umutima wandi walikalipe,+Kabili mu kati sana aka mubili wandi* mwalekalipa nga nshi,
22 Nshaletontonkanya bwino kabili nshaishibe ifyo ifintu fyali;Pa cinso cenu nali fye nge cinama icishakwata mano.
23 Lelo nomba mba fye na imwe lyonse;Mwalikata ukuboko kwandi ukwa ku kulyo.+
24 Mulampanda amano+ pa kuti muntungulule,Lyena mukampaala.+
25 Mu muulu tamwaba umbi uo mona ukuti alicindama ukucila imwe,
Kabili apo mwaba na ine, takwaba cimbi ico nkabila pano isonde.+
26 Umubili wandi no mutima wandi kuti fyanaka,Lelo Lesa e ukosha umutima wandi kabili ni Lesa wandi umuyayaya.+
27 Nangu cibe shani abaitalusha kuli imwe bakaloba.
Mukalofya* bonse abamusha+ pa mulandu wa kuti balacita ubucende.*
28 Lelo ine nalimona ukuti ukupalama kuli Lesa kusuma.+
Muli Shikulu Mulopwe Yehova e mo nauba,Pa kuti mbilishe fyonse ifyo mwacita.+
