Amalumbo 146:1-10
146 Lumbanyeni Jah!*+
Lekeni numbanye Yehova no mutima wandi onse.*+
2 Inshiku shonse isha mweo wandi nkalalumbanya Yehova.
Nkalaimba inyimbo sha kulumbanya* Lesa wandi ilyo ncili uwa mweo.
3 Mwilacetekela intungulushi*Nelyo umuntunse umbi, uushingamupususha.+
4 Nga aleka ukupeema,* abwelela ku mushili;+Pali bulya bwine ubushiku amatontonkanyo yakwe yalaloba.+
5 Wa nsansa umuntu uo Lesa wa kwa Yakobo afwilisha,+Uwasubila muli Yehova Lesa wakwe,+
6 Uwapangile umuulu ne sonde,Bemba na fyonse ifyabamo,+Uwa cishinka umuyayaya,+
7 Uupingwilako abo bafyenga,Uupeela abali ne nsala ifya kulya.+
Yehova alakakula abafungwa.*+
8 Yehova alenga abashimona batendeka ukumona;+Yehova alemya abawa;+Yehova alitemwa abalungama.
9 Yehova alacingilila abafuma ku calo cimbi;Alapeela abana abashakwata bashibo na bamukamfwilwa ifyo bakabila,+Lelo alafulunganya amapange ya babifi.*+
10 Yehova akaba Imfumu umuyayaya,+Lesa obe we Sione akaba imfumu mu nkulo shonse.
Lumbanyeni Jah!*
Amafutunoti
^ Nelyo “Aleluya!” “Jah” e fyo balemba ishina lya kuti Yehova mu kwipifya.
^ Nelyo “Lekeni umweo wandi ulumbanye Yehova.”
^ Nelyo “Nkalashika inyimbo.”
^ Nelyo “abakankaala.”
^ Nelyo “Umupu wakwe nga wapwa.”
^ Mu ciHebere, “abo bakaka.”
^ Nelyo “alafulunganya inshila ya babifi.”
^ Nelyo “Aleluya!” “Jah” e fyo balemba ishina lya kuti Yehova mu kwipifya.
