Amalumbo 109:1-31
Ku mukalamba wa bakemba. Ulwimbo lwa kwa Davidi.
109 Mwe Lesa uo numbanya+ mwi-ikala tondolo.
2 Pantu ababifi na babepa ubufi balasamuna utunwa twabo no kulanda ifyabipa pali ine.
Ululimi lwabo lulalanda ifya bufi pali ine;+
3 Balanjeba amashiwi ayabi ninshi nabanshinguluka,Kabili balansansa apabula umulandu.+
4 Balandwisha pa mulandu wa kuti naliba no kutemwa;+Lelo ntwalilila fye ukupepa.
5 Balancita ifyabipa pa mulandu wa fisuma+ ifyo mbacitilaKabili balimpata pa mulandu wa kuti naliba no kutemwa.+
6 Sonteni umubifi uwa kuti alemutungulula;Uulemulwisha* naeminine ku kuboko kwakwe ukwa ku kulyo.
7 Nga bamupingula bamusange no mulandu;*Ipepo lyakwe nalibe ngo lubembu.+
8 Inshiku shakwe nashicepe;+Lekeni umbi amupyane pali bukangalila.+
9 Lekeni abana* bakwe bashale ukwabula shibo,No mukashi wakwe abe mukamfwilwa.
10 Abana bakwe* nabalepitana fye kabili balelombalomba,Nabalefwayafwaya ifya kulya mu mayanda yabo ayabongoloka.
11 Lekeni uo akongolako amupoke fyonse ifyo akwata,*Kabili abeni nabamupoke ifipe fyakwe.
12 Kwiba nangu umo uwa kumulanga icikuuku,*Nelyo uwakwafwa abana bakwe abashakwata bashibo.
13 Abatuntuka muli ena nabalobe;+Kabili aba mu nkulo ikakonkapo bekabebukisha.
14 Yehova+ naebukishe ifilubo bashibo bacitile,Kabili ulubembu nyina acitile lwikafuutwa.
15 Yehova naleibukisha lyonse ifyo bacita;Kabili amashina yabo bakayalabe pano isonde.+
16 Pantu taibukishe ukuba ne cikuuku*+ ku bantu,Lelo alecusha abacula,+ abapiina na baba no bulandaPa kuti abepaye.+
17 Alitemenwe ukutiipa abantu, e ico icitiipu caishile pali ena;Talefwaya ukupaala abantu, e ico tapaalilwe.
18 Afwele ifitiipu nge ca kufwala.
Kabili fyaingile mu mubili wakwe nga menshi,Na mu mafupa yakwe nga mafuta.
19 Ifitiipu ifyo atiipa abantu nafibe nge nsalu iyo aifimba+Kabili nafibe ngo mushipi uo afwala lyonse.
20 Ici e cilambu Yehova apeela abandwisha+Na balanda ifyabipa pali ine.*
21 Lelo imwe mwe Yehova Shikulu Mulopwe,Ngafweni pa mulandu we shina lyenu.+
Mpususheni pantu ukutemwa kwenu ukushipwa kusuma.+
22 Pantu nshakwata ba kungafwa kabili ndi mupiina,+No mutima wandi baliucena.+
23 Ndepita nga filya icinshingwa cipita ilyo akasuba kaleya kalewa;Bankunta nga makanta.
24 Amakufi yandi nayanaka pa mulandu wa kufunga;Umubili wandi naonda, kabili wile ulepwa.*
25 Balampumya.+
Nga bamona balapukunya imitwe.+
26 Njafweni mwe Yehova Lesa wandi;Mpususheni pa mulandu wa kutemwa kwenu ukushipwa.
27 Lekeni abantu beshibe ukuti ni ku kuboko kwenu;E ko mwe Yehova mwampusushisha.
28 Lekeni bantiipe, lelo imwe mumpaale.
Nga banjimina, lekeni baseebane,Lelo lekeni umubomfi wenu asekelele.
29 Lekeni abandwisha bafwale umuseebanya;Nabafwale insoni ngo mwingila.*+
30 Akanwa kandi kakalumbanya sana Yehova;Nkamulumbanishisha pa ntanshi ya bantu abengi.+
31 Pantu akeminina ku kuboko kwa ku kulyo ukwa bapiinaPa kuti abapusushe ku balebapeela umulandu.*
Amafutunoti
^ Nelyo “Uulemupeela imilandu.”
^ Nelyo “bamumone ukuti mubifi.”
^ Mu ciHebere, “abana abaume.”
^ Mu ciHebere, “Abana bakwe abaume.”
^ Nelyo “Lekeni abakongwesha kaloba bateye ifiteyo, pa kuti bekate fyonse ifyo akwata.”
^ Nelyo “ukutemwa ukushipwa.”
^ Nelyo “ukutemwa ukushipwa.”
^ Nelyo “pa mweo wandi.”
^ Mu ciHebere, “Umunofu wandi naonda kabili taukwete amafuta.”
^ Nelyo “ica kufwala icabula amaboko.”
^ Nelyo “abalepeela umweo wabo umulandu.”
