Amalumbo 68:1-35
Ku mukalamba wa bakemba. Ulwimbo lwa kwa Davidi.
68 Lekeni Lesa eme, lekeni abalwani bakwe babasalanganye,Kabili abamupata, nabafulumuke pa cinso cakwe.+
2 Boluleni nga filya umwela ululula icushi;Nga filya ipula lisunguluka ku mulilo,E fyo ababifi balobe pa ntanshi ya kwa Lesa.+
3 Lelo lekeni abalungama basekelele,+Nabasansamuke nga nshi pa cinso ca kwa Lesa;Nabasansamuke kabili basekelele.
4 Imbileni Lesa, imbileni ishina+ lyakwe amalumbo.*
Imbileni uulepita mu ciswebebe*
Jah* e shina lyakwe!+ Sansamukeni pa cinso cakwe!
5 Wishi wa bana abashakwata bashibo kabili uucingilila* bamukamfwilwa+Ni Lesa uwikala ku cifulo cakwe ica mushilo.+
6 Lesa alapeela abashakwata bakubafwa ing’anda ya kwikalamo;+Alalubula abafungwa kabili alalenga ifintu fyalabendela bwino.+
Lelo bacintomfwa* bena bafwile ukwikala mu cifulo umushaba menshi.+
7 Mwe Lesa, ilyo mwatungulwile* abantu benu,+Ilyo mwapitile mu ciswebebe, (Selah)
8 Isonde lyalitentele;+Umuulu waliloseshe* imfula pa mulandu wa kwa Lesa;Ulu ulupili lwa Sinai lwalitentele pa mulandu wa kwa Lesa, Lesa wa kwa Israele.+
9 Mwe Lesa mwalengele imfula yaloka sana;Mwalengele abantu benu* abanakile baba na maka.
10 Baikele mu matenti yenu;+Pa mulandu wa busuma bwenu mwe Lesa, mwapeele abapiina ifyo balekabila.
11 Yehova napeela abantu bakwe ifunde;*Kabili abanakashi abalebila imbila nsuma* bengi icine cine.+
12 Imfumu na bashilika ba shiko bafulumuka,+ bafulumuka!
Umwanakashi uushala pa ng’anda, bamupeelako ifyo bapokolwele.+
13 Nangu ca kuti imwe mwe bantu mwalelaala mu mbali ya mulilo mu nsakwe,*Mukakwata inkunda ya mapindo ayo babikako silfere,Kabili ku mpela ya aya mapindo babikako golde iisuma.*
14 Ilyo Uwa Maka Yonse asalangenye imfumu+ mu calo,Imfula ya bungululu bwa buuta yatendeke ukuloka mu Salmone.*
15 Ulupili lwa mu Bashani,+ lupili lwa kwa Lesa;*Impili sha mu Bashani, ni mpili ishitali nga nshi.
16 Cinshi ico imwe mwe mpili ishitali nga nshi,Mushulukila ulupili ulo Lesa asala* ukuti aleikalamo?+
Nangu cibe shani Yehova akekalamo umuyayaya.+
17 Amaceleta ya nkondo aya kwa Lesa yaba amakana ayengi nga nshi.+
Yehova afuma ku Sinai, aingila mu cifulo ca mushilo.+
18 Mwaile ku cifulo icasansuka;+Mwasendele bankole;Mwasendele abantu+ abaishileba ifya bupe,Kumo na bacintomfwa,+ pa kuti mwikale muli bena, mwe Jah Lesa wesu.
19 Nalumbanishiwe Yehova uutusendela ifisendo+ cila bushiku,Lesa wa cine, uutupususha. (Selah)
20 Lesa wa cine, ni Lesa uutupususha;+Kabili Yehova Shikulu Mulopwe e utupususha ku mfwa.+
21 Nangu cibe shani Lesa akasansaula imitwe ya balwani bakwe,Umutwe wa muntu onse uutwalilila ukucita ifyabipa.*+
22 Yehova alandile ati: “Nkababwesha ku Bashani;+Nkabafumya apashika muli bemba,
23 Pa kuti amakasa yobe yakanyante mu mulopa+ wa balwani bobeKabili pa kuti imbwa shobe shikamyange umulopa wabo.”
24 Balamona imilongo ya bantu benu mwe Lesa,Bamona imilongo ya kwa Lesa wandi, Imfumu yandi, ileingila mu cifulo ca mushilo.+
25 Bakemba e baba pa ntanshi, e lyo abalisha ifilimba fya nsale balabakonka pa numa;+Pa kati paba abakashana abalisha utuoma twa nyenjele.+
26 Lumbanyeni Lesa mwi bumba lya bantu abalongene;Lumbanyeni Yehova mwe bafuma ku Ntulo ya kwa Israele.+
27 Kulya e ko Benjamini+ umwaice pali bonse alecimfya abantu,Ukubikako fye na bacilolo ba baYuda ne bumba lyabo ilya congo,Na bacilolo ba kwa Sebuluni, e lyo na bacilolo ba kwa Naftali.
28 Lesa obe nasalapo ukukupeela amaka.
Langeni amaka yenu mwe Lesa, mwe batucitiileko fimo.+
29 Pa mulandu we tempele lyenu ilyaba mu Yerusalemu,+Imfumu shikamuletela ubupe.+
30 Kalipileni ifinama fya mu matete,Ne ng’ombe ishilume,+ no twana twa shiko,Mpaka abantu bafukame kabili balete* silfere.
Lelo asalanganya abantu abatemwa ukulwa inkondo.
31 Ifipe fya mukuba fikafuma* mu Egupti;+Abena Kushi bakangufyanya ukupeela Lesa ifya bupe.
32 Mwe mabufumu ya pano isonde, imbileni Lesa,+Imbileni* Yehova inyimbo sha kumulumbanya, (Selah)
33 Lumbanyeni uupita pa myulu+ iyabako ukutula kale.
Ishiwi lyakwe ilya maka lilabulukuta.
34 Ishibeni ukuti Lesa wa maka.+
Ukuteka kwakwe kwaba pa bena Israele,Kabili amaka yakwe yaba mu muulu.*
35 Lesa afwaya abantu balemutiina kabili balemupeela umucinshi mu cifulo cakwe ica mushilo.+
Ni Lesa wa kwa Israele,Uupeela abantu amaka.+
Lumbanyeni Lesa.
Amafutunoti
^ Nelyo “shikileni ishina lyakwe inyimbo.”
^ Nelyo kuti yapilibula no kuti, “uulepita mu makumbi.”
^ “Jah” e fyo balemba ishina lya kuti Yehova mu kwipifya.
^ Mu ciHebere, “uupingwilako.”
^ Nelyo “bacipondoka.”
^ Mu ciHebere, “mwatangilile.”
^ Mu ciHebere, “walitoneshe.”
^ Mu ciHebere, “ubupyani bwenu.”
^ E kutila, ifunde lya kuti baye mu kulwa inkondo.
^ E kutila, imbila ya kucimfya
^ Nelyo kuti yapilibula no kuti, “mu macinka ya mpaanga.”
^ Nelyo “golde ya yelo.”
^ Nelyo “Cali kwati imfula ya bungululu bwa buuta yalitendeke ukuloka mu Salmone.”
^ Nelyo “lupili ulukalamba nga nshi.”
^ Nelyo “afwaya.”
^ Nelyo “uutwalilila ukwendauka mu fyabipa.”
^ Nelyo kuti yapilibula no kuti, “banyantaule.”
^ Nelyo kuti yapilibula no kuti, “Inkombe shikafuma.”
^ Nelyo “mushikileni inyimbo.”
^ Mu ciHebere, “mu makumbi.”
