Amalumbo 30:1-12
-
Alenga naleka ukuloosha, natampa ukusekelela
-
Lesa alanga umuntu ubusuma inshiku shonse isha mweo wakwe (5)
-
Ulwimbo lwa pa kupeela ing’anda. Ulwa kwa Davidi.
30 Nkamulumbanya mwe Yehova pantu mwalinjimya;Kabili tamwalekele abalwani bandi basekelela pa mulandu wa kuwa kwandi.+
2 Iye mwe Yehova Lesa wandi, naliliile kuli imwe ukuti mungafwe kabili mwaling’undepe.+
3 Mwe Yehova mwalimfumya* mu Nshiishi.*+
Mwalilenga naba no mweo; tamwalekele natentemukila mu cilindi.*+
4 Imbileni* Yehova inyimbo sha kumulumbanya, mwe baba ne cishinka kuli ena,+Tooteleni ishina lyakwe* ilya mushilo;+
5 Pantu afulilwa umuntu pa kashita fye akanono,+Lelo alamulanga ubusuma inshiku shonse isha mweo wakwe.+
Umuntu kuti aloosha mu nshita ya cungulo, lelo ulucelo alasekelela nga nshi.+
6 Ilyo nshakwete amafya, natile:
“Nshakasunkane.”*
7 Mwe Yehova, ilyo mwali na ine mwalengele naba uwakosa ngo lupili.+
Lelo ilyo mwafishile icinso cenu nalitiinine.+
8 Nalelilila kuli imwe, mwe Yehova;+Kabili nalepaapaata Yehova ukuti ampaale.
9 Busuma nshi bwingafuma mu mfwa yandi,* nga natentemukila mu cilindi?*+
Bushe ulukungu lukamulumbanya?+ Bushe lukabila pa fyo mwaba aba cishinka?+
10 Umfweni mwe Yehova kabili mpaaleni.+
Mwe Yehova beni kaafwa wandi.+
11 Mwalenga naleka ukuloosha, natendeka ukucinda ninshi ndesekelela;Mwamfuula insamu, e lyo mwamfwika ukusekelela,
12 Pa kuti ni-ikala tondolo, lelo imwimbile* inyimbo sha kumulumbanya.
Mwe Yehova Lesa wandi, nkamulumbanya umuyayaya.
Amafutunoti
^ Nelyo “mwalifumya umweo wandi.”
^ Nelyo “Sheol,” e kutila inshiishi ya bantu bonse. Moneni Amashiwi ya mu Baibo ne fyo Yapilibula.
^ Nelyo “mu nshiishi.”
^ Nelyo “Mushikileni inyimbo.”
^ Mu ciHebere, “icibukisho cakwe.”
^ Nelyo “nshakatalantante.”
^ Mu ciHebere, “umulopa wandi.”
^ Nelyo “mu nshiishi.”
^ Nelyo “ubukata bwandi bumwimbile.”
