Amalumbo 113:1-9

  • Lesa uwikala mu muulu emya uushakwata ba kumwafwa

    • Ishina lya kwa Yehova lilumbanishiwe umuyayaya (2)

    • Lesa alakontama (6)

113  Lumbanyeni Jah!* Mwe babomfi ba kwa Yehova mulumbanyeni,Lumbanyeni ishina lya kwa Yehova.  2  Ishina lya kwa Yehova nalilumbanishiweUkufuma nomba ukuya umuyayaya.+  3  Ukufuma uko akasuba katulila ukufika uko kawila,Ishina lya kwa Yehova nalilumbanishiwe.+  4  Yehova alicila inko+ shonse;Ubukata bwakwe bwalicila ubukata bwa myulu.+  5  Nani uwaba nga Yehova Lesa wesu,+Uwaikala* mu myulu iyaba apatali sana?  6  Alakontama pa kuti aloleshe pa myulu na pe sonde,+  7  Emya uushakwata wa kumwafwa mu lukungu. Afumya umupiina pa mwina wa mito*+  8  Pa kuti aleikala na bakankaala,Abakankaala ba pa bantu bakwe.  9  Alapeela umwanakashi uushikwata abana, ing’anda.Alalenga aba ne nsansa pa mulandu wa kukwata abana.*+ Lumbanyeni Jah!*

Amafutunoti

^ Nelyo “Aleluya!” “Jah” e fyo balemba ishina lya kuti Yehova mu kwipifya.
^ Nelyo “Uwaikala pa cipuna ca bufumu.”
^ Nelyo kuti yapilibula no kuti, “pa cishala.”
^ Mu ciHebere, “abana abaume.”
^ Nelyo “Aleluya!” “Jah” e fyo balemba ishina lya kuti Yehova mu kwipifya.

Copyrights for this publication