Amalumbo 41:1-13
Ku mukalamba wa bakemba.Ulwimbo lwa kwa Davidi.
41 Wa nsansa uwafwilisha umuntu uo basuula;+Yehova akamupususha mu bushiku bwa bucushi.
2 Yehova akamulinda no kumupususha.
Bakalamumona ukuti wa nsansa mwi sonde;+Tamwakamupeele ku balwani bakwe.*+
3 Yehova takamulekeleshe ilyo akalaala pa busanshi bwakwe ninshi nalwala;+Mukamusakamana pa nshita yonse iyo akalwala.
4 Pantu natile: “Mwe Yehova, mbeleleni uluse.+
Ng’undapeni*+ pantu nalimubembukila.”+
5 Lelo abalwani bandi balalanda ifyabipa pali ine abati:
“Ni lilali akafwa kabili ni lilali ishina lyakwe likaloba?”
6 Umo pali bena nga aisa mu kumona, umutima wakwe ulanda ifya bufi.
Alapanga ukulanda ifyabipa;Lyena alafumina panse, aya ale-eba abantu.
7 Bonse abampata batotoshanya pali ine;Balapanga ukuncita ifyabipa, balanda abati:
8 “Ubucushi nabumwishila;Apo nomba nalambalala, takeme.”+
9 Nangu fye ni cibusa wandi uo nacetekeele,+Uwalelyako umukate wandi, nanjimisha akatende.*+
10 Lelo imwe mwe Yehova, ng’umfwileni uluse kabili njimyeni,Pa kuti nkande abalwani bandi pa fyo bacita.
11 Nkeshiba ukuti mwalintemwa:
Nga namona abalwani bandi baleka ukuncimfya.+
12 Mulantungilila pa mulandu wa kuti ndi wa kaele;+Mukambika pa ntanshi yenu umuyayaya.+
13 Yehova Lesa wa kwa Israele nalumbanishiweUkufuma umuyayaya ukuya umuyayaya.+
Cibe ifyo fine, cibe ifyo fine.*
Amafutunoti
^ Nelyo “ku kufwaya kwa balwani bakwe, ku mweo wa balwani bakwe.” Moneni Amashiwi ya mu Baibo ne fyo Yapilibula.
^ Nelyo “Undapeni umweo wandi.”
^ Nelyo “nanjalukila.”
^ Mu ciHebere, “Ameni kabili ameni.”
