Amalumbo 106:1-48
106 Lumbanyeni Jah!*
Tooteleni Yehova, pantu musuma;+Ukutemwa kwakwe ukushipwa kwa muyayaya.+
2 Nani wingalondolola bwino bwino imilimo ya kwa Yehova iikalambaNelyo uwingabilisha fyonse ifyo acita ifya kumulumbanishishapo?+
3 Ba nsansa ababa no mulinganya,Abacita lyonse ifyalungama.+
4 Mukanjibukishe mwe Yehova, ilyo mukalanga abantu+ benu icikuuku*
Nsungeni bwino kabili mpususheni,
5 Pa kuti munange ubusuma ubo mulanga abo mwasala,+Pa kuti nsekelele pamo no luko lwenu,Pa kuti imulumbanishishe* capamo no bupyani bwenu.
6 Natubembuka nge fyabembwike bashifwe;+Natulufyanya; natucita ifyabipa.+
7 Bashifwe mu Egupti tabaletasha* pa fisuma ifyo mwacitile.
Tabaibukishe ifyo mwabalangile ukutemwa ukushipwa,Lelo balimupondokele pali bemba, pali Bemba Wakashika.+
8 Lelo alibapuswishe pa mulandu we shina lyakwe,+Pa kuti alenge amaka yakwe yeshibikwe.+
9 Akalipiile Bemba Wakashika, na o alikamine;Abapishishe muli bemba kwati alebapisha mu ciswebebe;*+
10 Alibapuswishe mu minwe ya walebalwisha+Kabili alibalubwile mu minwe ya mulwani.+
11 Amenshi yalifimbile abalwani babo;Tapapuswike nangu umo.*+
12 Lyena balitetekele ifyo alaile;+Batendeke ukwimba inyimbo sha kumulumbanya.+
13 Lelo tapakokwele balilabile ifyo acitile;+Tabalolelele ukuti abebe ifya kucita.
14 Batendeke ukucita ifyo imitima yabo yalefwaya ilyo bali mu matololo;+Baeseshe Lesa mu ciswebebe.+
15 Alibapeele ifyo balefwaya,Lyena alibalwalike ubulwele ubwalengele bondoloke no kufwa.*+
16 Ilyo bali mu nkambi, bafimbiile MoseNa Aarone+ uwa mushilo wa kwa Yehova.+
17 Lyena umushili walilepwike, wamina Datani,Kabili washiikile abali pamo na Abiramu.+
18 Umulilo walyocele bamo abali mwi bumba lyabo;Ulubingu lwalyocele ababifi.+
19 Bapangile icimpashanya ca mwana wa ng’ombe mu HorebuKabili balekontamina icimpashanya ca cela,*+
20 Mu cifulo ca kuti bampeele ubukata,Batendeke ukupepa icimpashanya ca ng’ombe iilume, iilya fye icani.+
21 Balilabile Lesa+ uwabapuswishe,Uwacitile ifikalamba mu Egupti,+
22 Uwacitile ifipesha mano mu calo ca kwa Hamu,+Ne fya kupapusha pali Bemba Wakashika.+
23 Ilyo ali mu kufumya icipope ca kuti babepaye,Mose uo asalile alimupaapeete* ukuti abweshemo ubukaliPa kuti ebepaya.+
24 Lyena basuulile icalo icisuma;+Tabatetekele ifyo abalaile.+
25 Baikalile fye ukuilishanya mu matenti yabo;+Balisuulile ifyo Yehova+ alelanda
26 E ico aimishe ukuboko kwakwe no kulapaUkuti akabepaila mu matololo;+
27 No kuti ali no kulenga abali no kutuntuka muli bena bakafwile mu nko,Kabili akabasalanganishisha mu fyalo fyalekanalekana.+
28 Lyena batendeke ukupepa* Baali wa ku Peore+Kabili balelya amalambo ayo baaletuulila abafwa.*
29 Ifyo balecita fyalemukalifya,+Kabili icikuko caishile pali bena.+
30 Nomba ilyo Finehasi aimine no kucitapo cimo,Icikuko calipwile.+
31 Kabili ifyo acitile fyalengele balamumona ukuti alilungamaMu nkulo shonse umuyayaya.+
32 Balimukalifye pa menshi ya mu Meriba,*Kabili ifyo bacitile+ fyalengele ifintu fyabipila Mose.
33 Balimukalifye,*Kabili talamine akanwa+ kakwe pa kulanda.
34 Tabalofeshe inko,+Nga fintu Yehova abebele.+
35 Lelo basaakene ne nko shimbi+Kabili batendeke ukucita ifyo shalecita.*+
36 Batwalilile ukubombela utulubi twa shiko,+Kabili twaishileba iciteyo kuli bena.+
37 Baletuula abana babo abaumeNa bana babo abanakashi ku fibanda.+
38 Batwalilile ukusumya umulopa wa kaele,+Umulopa wa bana babo abaume no wa bana babo abanakashi,Abo baletuula ku tulubi twa bena Kanaani;+Kabili filya balesuumya umulopa fyalengele icalo cakowela.
39 Ifyo balecita fyalengele bakowelaKabili fyalengele balacita ubucende na tulesa.*+
40 E ico ubukali bwa kwa Yehova ububilima ngo mulilo bwaishile pa bantu bakwe,Kabili alipatile ubupyani bwakwe.
41 Imiku iingi aleleka inko shabacimfya,+Pa kuti ababapatile balebateka,+
42 Balebacusha ku balwani babo,Kabili balenakila amaka ya* balwani babo.
43 Imiku iingi alebapususha,+Lelo balemupondokela kabili tabalemumfwila,+Kabili pa mulandu wa membu balecita, baleseebana.+
44 Lelo alemona ifyo balecula+Kabili aleumfwa nga balilila kuli ena ukuti abafwe.+
45 Pa mulandu wabo, aleibukisha icipangano cakwe,Kabili alebomfwila uluse* pantu aliba sana no kutemwa ukushipwa.+
46 Alelenga bonse abalebasenda mu kuyaba bankole+Babomfwila uluse.
47 Tupususheni mwe Yehova Lesa wesu,+Tufumyeni mu nko+ kabili tulonganikeniPa kuti tulumbanye ishina lyenu ilya mushiloKabili tumulumbanye ne nsansa.+
48 Yehova Lesa wa kwa Israele nalumbanishiweUkufuma umuyayaya ukuya umuyayaya.+
Kabili abantu bonse nabalande abati, “Ameni!”*
Lumbanyeni Jah!*
Amafutunoti
^ Nelyo “Aleluya!” “Jah” e fyo balemba ishina lya kuti Yehova mu kwipifya.
^ Nelyo “ilyo mukacitila abantu benu ifisuma.”
^ Nelyo “njitakishishe pali imwe.”
^ Nelyo “tabaleiluka.”
^ Nelyo “mu matololo.”
^ Nelyo “Tapali nangu umo uwashele.”
^ Nelyo “ubwalengele umweo wabo waondoloka no kufwa.”
^ Nelyo “icimpashanya icaengwa.”
^ Mu ciHebere, “aiminine pa kati ka kwa Lesa na bena Israele.”
^ Nelyo “bailundile kuli.”
^ E kutila, amalambo ayo baletuulila abafwa nelyo tulesa utushipeema.
^ Ilyalola mu kuti “Ukuumana.”
^ Mu ciHebere, “Balikalifye umupashi wakwe.”
^ Nelyo “basambilile ifyo inko shalecita.”
^ E kutila, balapepa tulesa.
^ Mu ciHebere, “ukuboko kwa.”
^ Nelyo “alebalangulukilako.”
^ Nelyo “Nacibe ifyo fine!”
^ Nelyo “Aleluya!” “Jah” e fyo balemba ishina lya kuti Yehova mu kwipifya.
