Amalumbo 21:1-13
Ku mukalamba wa bakemba. Ulwimbo lwa kwa Davidi.
21 Mwe Yehova, imfumu ilasekelela pa mulandu wa maka yenu;+Ilasekelela nga nshi pantu mulaipususha!+
2 Mwali-ipeela ico umutima wa iko ufwaya,+Tamwaitana ico imilomo ya iko yalombele. (Selah)
3 Pantu mwali-ipaala nga nshi;Mwali-ifwika icilongwe* ca golde iisuma.*+
4 Yamulombele ukuti ikale inshiku ishingi,Kabili mwaipeele inshiku ishingi nga nshi,*+ mpaka umuyayaya.
5 Yalicindama nga nshi pa mulandu wa kuti mwali-ipususha.+
Mwali-ipeela bukatebebe no bucindami.
6 Mwali-ipaala umuyayaya;+Mulalenga ilesekelela pa mulandu wa kuti mulaba nayo.*+
7 Pantu imfumu yalicetekela Yehova,+Pa mulandu wa kutemwa ukushipwa uko Uwapulamo akwata, tayakatiine.*+
8 Ukuboko kwenu kukekata abalwani benu bonse;Ukuboko kwenu ukwa ku kulyo kukekata abamupata.
9 Ilyo inshita ya kubakanda ikafika, mukabonaula. Cikaba kwati mwabapoosa mwi lungu lya mulilo.
Yehova akabamina ninshi nakalipa, kabili umulilo ukabalofya.+
10 Mukonaula abatuntuka* muli bena, mukabafumya pano isonde,Mukalofya abana babo.
11 Pantu balepanga ukumucita ifyabipa;+Ifyo bapanga tafyakacitike.+
12 Pantu mukalenga bakafulumuke+Ilyo mukabatoonta* ubuta.*
13 Imeni mwe Yehova, kabili langeni amaka yenu.
Pa mulandu wa kuti mwalikwatisha amaka, tukamwimbila amalumbo.*
Amafutunoti
^ Nelyo “icisote ca bufumu.”
^ Nelyo “iyalopololwa.”
^ Mu ciHebere, “mwalitantalisha inshiku sha iko.”
^ Mu ciHebere, “pa mulandu wa kuti ilaba pa cinso cenu.”
^ Nelyo “tayakatale talantanta.”
^ Mu ciHebere, “ifisabo fyabo.”
^ Mu ciHebere, “mukatonta pa menso yabo.”
^ Mu ciHebere, “inshinga.”
^ Mu ciHebere, “tukamwimbila kabili tukamushikila inyimbo.”
