Amalumbo 51:1-19
Ku ng’omba nkalamba. Ulwimbo lwa kwa Davidi. Ilyo Natani kasesema aile kuli ena ilyo aulungene na Bati-sheba.+
51 Mbeleleni uluse mwe Lesa, ukulingana ne cikuuku cenu.+Ukulingana ne nkumbu shenu ishingi fumyenipo ububi ubo ncitile.+
2 Nsambeni bwino bwino ku bupulumushi bwandi,+Kabili nsangululeni na ku lubembu lwandi.+
3 Pantu nalishiba ububi bwandi,+Kabili ulubembu lwandi luli pa ntanshi yandi inshita yonse.+
4 Kuli imwe, imwe mweka fye, e ko nabembuka,+Kabili ncitile icabipa mu menso yenu,+Awe mulalungika mu fyo mulanda,+Kabili ukupingula kwenu kwaliba fye bwino.+
5 Moneni! Mu lubembu e mo nafyalilwe,+Kabili mu lubembu e mo mayo anjimitile.+
6 Moneni! Musekelela mu cishinka icili mu kati ka mutima;+Kabili nengeni ukwishiba amano yene yene mu mutima wandi.+
7 Nsangulwileni ulubembu kuli husope, pa kuti mbe uwasanguluka;+Nsambeni, pa kuti mbuute tuutu.+
8 Nengeni ng’umfwe ukwaanga no kusekelela,+Pa kuti amafupa ayo mutobele yasekelele.+
9 Fiseni icinso cenu ku membu shandi,+Kabili fumyenipo ubupulumushi bwandi bonse.+
10 Lengeni muli ine umutima uwasanguluka, mwe Lesa,+Kabili bikeni muli ine umupashi uupya, uwashangila.+
11 Mwimpoosa mfume pa cinso cenu;+Kabili umupashi wenu uwa mushilo shi mwimpoka.+
12 Bwesesheni kuli ine ukusekelela nsanga mu kupususha kwenu,+Kabili muntungilile ku mutima wa kuitemenwa.+
13 Nkasambilisha bampulamafunde imibele yenu,+Ukuti ababembu babwelele kuli imwe.+
14 Mpokololeni ku mulandu wa kusuumya umulopa,+ mwe Lesa, Lesa we pusukilo lyandi,+Pa kuti ululimi lwandi lwingalondolola pa lwa bulungami bwenu ne nsansa.+
15 Mwe Yehova, shi asamuneni akanwa kandi,+Pa kuti akanwa kandi kasose ifya kumulumbanya.+
16 Pantu tamufwaya ilambo—acibe fyo nga nalimupeela;+Tamusekelela mu mutuulo wa koca uutuntulu.+
17 Amalambo ya kuli Lesa mutima uwa bulanda;+Umutima uwa bulanda kabili uwasakamikwa, tamwakausuule, mwe Lesa.+
18 Mu kutemwa kwenu citeni icisuma ku Sione;+Kuuleni amalinga ya mu Yerusalemu.+
19 E lyo mukasekelela mu malambo ya bulungami,+Mu malambo ya koca na mu mutuulo uutuntulu;+
E lyo ing’ombe ishilume shikatuulwa pa ciipailo cenu.+
