Amalumbo 145:1-21

Ilumbo, ilya kwa Davidi. א [Aʹleph] 145  Nkamusansabika, mwe Lesa wandi, mwe Mfumu,+Kabili nkacindika ishina lyenu umuyayaya, kabili pe na pe.+ ב [Behth]   Nakulamucindika akasuba konse,+Kabili nakulalumbanya ishina lyenu umuyayaya, kabili pe na pe.+ ג [Giʹmel]   Yehova mukulu kabili alinga ukulumbanishiwa nga nshi,+Kabili ubukulu bwakwe tabwingalondololwa.+ ד [Daʹleth]   Aba mu nkulo shonse bakatasha imilimo yenu,+Kabili bakashimika pa milimo yenu iya bumpalume.+ ה [He]   Nkalatontonkanya pali bukatebebe bwenu ubwapesha amano+Na pa milimo yenu iyapesha amano.+ ו [Waw]   Kabili bakalanda pa fya kutiinya ifilanga amaka yenu;+Na ine nkashimika pa bukulu bwenu.+ ז [Zaʹyin]   Bakashimika ifingi pa busuma bwenu ubwingi,+Kabili pa mulandu wa bulungami bwenu bakaula no kusekelela.+ ח [Chehth]   Yehova wa mutembo kabili wa luse,+Alakokola ukukalipa kabili wa cikuuku nga nshi.+ ט [Tehth]   Yehova musuma kuli bonse,+No luse lwakwe lwaba pali fyonse ifyo abumba.+ י [Yohdh] 10  Fyonse ifyo mwabumba fikamulumbanya, mwe Yehova,+Na bantu benu aba cishinka bakamucindika.+ כ [Kaph] 11  Bakalalanda pa bukata bwa bufumu bwenu,+Bakalalanda na pali bumpalume bwenu,+ ל [Laʹmedh] 12  Ku kulenga abana ba bantu beshibe imilimo yakwe iya maka+No bufumu bwakwe ubwa bukata nga nshi.+ מ [Mem] 13  Ubufumu bwenu bufumu bwa muyayaya,+No kuteka kwenu kwa ku nkulo ne nkulo.+ ס [Saʹmekh] 14  Yehova atungilila bonse abalewa,+Kabili enuna bonse abakontama.+ ע [Aʹyin] 15  Amenso ya bonse yalolela imwe,+Na imwe mubapeela ifya kulya mu nshita ya fiko.+ פ [Peʼ] 16  Mufumbatula iminwe yenu+No kupeela ica mweo conse ifyo cilefwaya.+ צ [Tsa·dhehʹ] 17  Yehova alilungama mu mibele yakwe yonse+Kabili wa cishinka mu micitile yakwe yonse.+ ק [Qohph] 18  Yehova aba mupepi na bonse abalilila kuli ena,+Kuli bonse abalilila kuli ena mu cishinka.+ ר [Rehsh] 19  Akacitila ababa na katiina kuli ena ifyo balefwaya,+Akomfwa ne nkuuta yabo, kabili akabapususha.+ ש [Shin] 20  Yehova alinda bonse abamutemwa,+Lelo ababifi bonse akabalofya.+ ת [Taw] 21  Akanwa kandi kakalanda ifya kulumbanya Yehova;+Lekeni ica mweo conse cicindike ishina lyakwe ilya mushilo umuyayaya, kabili pe na pe.+

Amafutunoti