Musambo 94:1-23
94 Ô Yehowa, Efile Mukulu aobolaa,Ô Efile Mukulu aobolaa, mekameka ngofu!
2 Ebuee, Ô Nsushi a nsenga yoso ishima.
Futa namu bankitshishi ba bubi biabia bibalombanyine.
3 Mpa na ku nsaa kinyi, Ô Yehowa,Bantu babi abakatungunuka na kusanka mpa na ku nsaa kinyi?
4 Ababalakana na kuisamuna na kasaabu.
Bankitshishi boso ba bubi abesamuna.
5 Ô Yehowa! Abafingakasha muilo oobe,Na bakuete kukiengiesha bupianyi bobe.
6 Abepaa mukashi kilele na muntu mushale bu muenyi,Abepaa bana ba nshiye.
7 Abakula’shi: “Yah takuete kumona.
Efile Mukulu a Yakobo takuete kumona bikuete kukitshika.”
8 Pushayi uno muanda, anue bantu bashi na binangu,Anue bapatakane, nsaa kinyi yanukalesha binangu?
9 Yawa bapangile matui, ntamulombene kupusha su?
Uno bapangile meso, te bia kumona su?
10 Uno alangaa miilo, ntamulombene kusashila su?
Aye nyi apeya bantu kiukilo!
11 Yehowa auku bi binangu bia bantu,Auku’shi bi nka bu lupunga bisumanga.
12 Ô Yah, sha muloo mmuntu olangaa,Uno olongieshaa miiya yobe,
13 Bua kumupa butaale mu mafuku a nkalakashi,Mpa na p’abakabundula buina bua bantu babi.
14 Muanda Yehowa t’akalubu muilo waye,Sunga kusumbushena bupianyi buaye.
15 Muanda biimu abikatshibibua dingi na kululama,Na bantu boso ba sha mashimba alulame abakebilondo.
16 Nnanyi akeboo bua kundamuina kui bantu babi?
Nnanyi akankaluila kui bankitshishi ba bubi?
17 Su Yehowa tabadia kuikala mukuashi ande,Nadia kushimina nka mu kapindi kapeela.
18 Panambile’shi: “Luao luande aluselemuka,”Ô Yehowa, kifulo kiobe kia lulamato kibaadi nka akinkuatshishena.
19 Nsaa ibaadi tuinyongoshi* ntunnemeene,Bodi onnyingisha na kuntaadisha eshimba.
20 We kuikala mu kipuano na bakunkushi abatshibibua milomo,Aku namu abafuisha kafutakanyi muishina dia miiya su?
21 Abaluisha muntu mululame na kikiso,Na kutshibila muntu shi musoole muanda kibawe kia lufu.
22 Kadi Yehowa akafiki bu mbalo yande ya kufuamina,Efile Mukulu ande nyi ndubuebue luande lua kufuamina.
23 Akaaluisha bantu babi bikitshino biabo bi bubi.
Akebashimisha kukiila ku mianda yabo ibubi.
Yehowa Efile Mukulu eetu akebashimisha.
Mayi e mushi mwesaki
^ Sunga “binangu abikalakasha.”
