Musambo 92:1-15
Musambo. Loono lua efuku dia Sabato.
92 Bibuwa bua kutumbisha Yehowa,Na kuyimba misambo* bua kutumbisha eshina diobe, Ô Sha Kuiyilu Kula,
2 Bua kulungula bangi pabitale kifulo kiobe kia lulamato ku namashika,Na lulamato lobe bufuku bushima,
3 Pamune na kiombuanga kia mioshi ekumi na kindaala,Na tuleo tui buwa tua luseese.
4 Muanda we mungikashe na muloo, Ô Yehowa, pa muanda wa bikitshino biobe;Pa muanda wa midimo ya ku maasa oobe nele misaase ya muloo.
5 Midimo yobe ngikata, Ô Yehowa!
Binangu biobe mbikile bungi!
6 Muntu shi na binangu su ngumune ta mulombene kuibiuka,Na muntu mubulakane su ngumune ta mulombene kupusha uno muanda:
7 Nsaa ayimene bantu be bubi bu lubishi,Na apatumpuka* bankitshishi ba bubi boso,Mbua’shi babutudibue bua loso.
8 Kadi obe we mukamishibue bua loso, Ô Yehowa.
9 Mbinyibinyi, tala beshikuanyi bobe na meso a kutshimuna, Ô Yehowa,Tala abikashimina beshikuanyi bobe,Bankitshishi ba bubi boso abakapalakashibua.
10 Kadi obe okafuimisha bukome buande nka bu ngombe a kisuku,Nakabofusha kikoba kiande na muimu upia wibuwa.
11 Nakatala na muloo oso kupona kua beshikuanyi bande,Matui ande aakapusha pabitale kupona kua bantu bebubi bakuete kunduisha.
12 Anka bantu balulame abakatumpuka nka bu ebo,Na kukula nkufika bukata nka bu mutshi wa sedre mu Lebanone.
13 Mbakunyibue mu nshibo ya Yehowa,Abatumpuka mu mpango ya Efile Mukulu eetu.
14 Sunga ku bununu* buabo abatungunuka nka na kuenda kumpala,Abakekala nka na bukome na mbidi ibuwa,
15 Abaukisha’shi Yehowa mmululame.
Aye mmuikale Lubuebue luande, te na kukutua kua kululama su nkupeela.
