Musambo 40:1-17
Kui mukunkushi. Musambo wa Davide.
40 Ne mukulupile* Yehowa n’eshimba dimune,Mmuntee matui na ateemesha kudila kuande kua kukimba bukuashi.
2 Mmuntuushe mu buina bui na mema aakungula,Mu mbalo iule matekie.
Mmutuule mikoolo yande pa lubuebue,Na mmunyingishe ngua yande.
3 Akupu, mmuele loono lupia mukanua muande,Loono lua kutumbisha nalo Efile Mukulu eetu.
Bebungi abakatala na kukaanya,Na abakatuulu lukulupilo luabo mui Yehowa.
4 Sha muloo mmuntu akulupila Yehowa,Yawa sh’alamata bantomboshi sunga bantu ba sha madimi.
5 Bintu biodi mukite bi bungi bukile,Ô Yehowa Efile Mukulu ande,Midimo yobe ya kukaanya na binangu biokuete kuituelela.
Takui muntu e biodi;Su natompa kuibiakuila na kuibiisambila,Abikala bungi bukile buanshi mulombene kubadika.
6 Toboodi mukumiine* mulambu na kia buntu,Anka bodi munfungule matui bua kupusha.
Toboodi mutekie milambu ya kushiika kaalo na milambu ya miluisho.
7 Dingi nambile’shi: “Tala! Nafiki.
Mu mufungofungo* mbafunde pa muanda wande.
8 Kukita kikiebe ki’eshimba diobe Ô Efile Mukulu ande, mmuloo wande.*
Na muiya oobe wi munda muande.
9 Nalungula mukandu wibuwa wa kululama mu kakongie kakata.
Tala! Ntshi mufungie milomo yande,Nka bu biowuku kalolo Ô Yehowa.
10 Ntshi mubuikiile kululama kobe muishimba diande,Naukisha bangi lulamato na kipandilo kiobe.
Ntshi mufuamishe kifulo kiobe kia lulamato na binyibinyi biobe mu kakongie kakata.”
11 Ô Yehowa! Tuekandanga namu bua kundeesha lusa lobe.
Kifulo kiobe kia lulamato na binyibinyi biobe bindame mafuku oso.
12 Malua angifuunyishe ngakile bungi, bianshi mulombene kuiabadika.
Bilubilo biande bimbuikile mbikile bungi mu kipaso kianshamono sunga eshinda,Bi bungi kukila mpa na nyene ya ku mutue wande,N’eshimba diande dibafudiila ngofu.
13 Ô Yehowa! Kumiina namu bua kumpaasha.
Fika namu bukidi onkuashe, Ô Yehowa!
14 Baba boso abakimbi kuata muwa wande,Bakuatshikie buufu na bakutue kinemo.
Baba boso abasanka bua malua ande,Bayishibue milongo.
15 Baba boso abangamba’shi: “Oolo! Oolo!”
Bakuatshikie moo wibukopo pa muanda wa buufu abuibakuata.
16 Kadi baba abakukimbi,Basankie na kupetela muloo wibungi modi.
Baba bafule bikitshino biobe bia kipandilo, bekale abakula nsaa yoso’shi:
“Yehowa atumbishibue.”
17 Anka, ami ntshi na muntu a kunkuasha na ne mulanda;Yehowa atuule namu binangu biaye kuandi.
We mukuashi ande na mupaashi ande;Efile Mukulu ande toyishanga namu.
