Musambo 71:1-24
71 Ô Yehowa, kodi nyi kuandi mufuamine.
Ntana nkuatshikie buufu su nkapeela.
2 Mu kululama kobe, mpaashe namu na onkaluile.
Ntee namu matui* na ompaashe.
3 Ikala namu bu lubuebue luande lua kufuamina,Muandia kuikala natuele mafuku oso.
Tuma eyi bua’shi mpaashibue,Muanda we lubuebue luande na kifuamino kiande.
4 Ô Efile Mukulu ande, mpaashe namu ku maasa a bantu bebubi,Kui muntu shi mululame akiengieshenaa.
5 Muanda obe we lukulupilo luande, Ô Muanana Mukile Bukata Yehowa;Ne mukukulupile kubanga ku bukinga buande.
6 Ne mukukulupile kubanga panaadi mutandibue;Obe nyi baadi muntuushe muifu dia nyinami.
Nakutumbisha nguba oso.
7 Ne mufikie bu kilengieleshi kui bantu bebungi,Anka obe we kifuamino kiande kinyingishibue.
8 Mukanua muande mmuwule na ntumbo yobe;Munda mua efuku dishima nkuete kuakula pabitale ntumbo yobe.
9 Tonsumbushenanga namu ku bununu buande;Tondekanga apapeele bukome buande.
10 Beshikuanyi bande abende na kungamba,Na baba abakimbi kuata muwa wande abandiila lukuku.
11 Abamba’shi: “Efile Mukulu bamusumbushena.
Tuilondeneyi naye na tumukuate, muanda takui muntu a kumupaasha.”
12 Ô Efile Mukulu, toshalanga kula n’ami.
Ô Efile Mukulu ande, fika namu bukidi onkuashe.
13 Baba abanduishaBakuatshikie buufu na bashimine.
Baba abakimbi malua andeBakuatshikie mituuba na kuishibua milongo.
14 Anka buande’mi, natungunuka na kutengiela;Nakanyisha kukutumbisha.
15 Mukanua muande amukakula pabitale kululama kobe,Munda mua efuku dishima, amuakula pabitale bikitshino biobe bia kipandilo,Sunga biekala bungi buanshi mulombene kubadika.
16 Nakafiki ndungule bangi pabitale bikitshino biobe bia kukaanya,Ô Muanana Mukile Bukata Yehowa,Nakakula pabitale kululama kobe, penda kululama kobe obe nabene.
17 Ô Efile Mukulu, we mundongieshe kubanga ku bukinga buande,Na mpa na binobino nkiatungunuka na kulungula pabitale midimo yobe ya kukaanya.
18 Mpa na ku bununu na pangikala na nfuidi, Ô Efile Mukulu, tonsumbushenanga.
Ndekieele namu ndungule kipungo kia bantu akifiki pabitale bukome* bobe,Na pabitale bukome bobe kui baba boso abakafiki.
19 Kululama kobe nkukafikie mpa na muiyilu, Ô Efile Mukulu,We mukite mianda ikata,Ô Efile Mukulu, nnanyi e bu biodi?
20 Sunga we muntadiile’shi nkiengie na mmone malua,Mpe namu dingi bukome,Ngabule namu mu mpongo ya mu nsenga.
21 Tamisha namu kinemo kiande,Ongifunyishe na onyingishe.
22 Paapa nakakutumbisha na kiombuanga kia mioshiPa muanda wa lulamato lobe, Ô Efile Mukulu ande.
Nakayimbi bua kukutumbisha na luseese,Ô Eselele a Isalele.
23 Milomo yande ayikele misaase ya muloo pankuete kuyimba bua kukutumbisha,Muanda we mupaashe muwa wande.
24 Ludimi luande alukakula pabitale kululama kobe,Muanda baba abakimbi kungipaa abakakuatshika buufu na mituuba.
