Musambo 119:1-176

  • Lutumbu bu’eyi di’Efile Mukulu di na muulo

    • ‘Mbikunyi bilombene ba nsongua kulama eshinda ditooshibue?’ (9)

    • “Ne mufule mitentekiesho yobe ngofu” (24)

    • “Eyi diobe ndukulupilo luande” (74, 81, 114)

    • “Ne mufule miiya yobe ngofu!” (97)

    • “Binangu bibungi kukila balongieshi bande boso” (99)

    • “Eyi diobe nyi elampi bua ngua yande” (105)

    • “Eyi diobe dioso dishima mbinyibinyi” (160)

    • Butaale bui kui baba bafule miiya y’Efile Mukulu (165)

א [Alefe] 119  Ba sha muloo mbaba bashi na matope* mu nshalelo aabo,Abatambukilaa mu miiya ya Yehowa.  2  Ba sha muloo mbaba abatumikila mitentekiesho yaye,Abamukimbi na mashimba aabo oso.  3  T’abakitshi mianda na kukutua kululama. Abatambukila mu mashinda aaye.  4  We mutume eyiBua’shi balame mayi oobe kalolo.  5  Su nadia kushala sunga munyingie,Bua’shi mmone bia kutumikila miiya yobe baboo!  6  Paapa ntshinaadia kukuatshishibua buufu,Nsaa yantaluula miiya yobe yoso.  7  Nakakutumbisha n’eshimba dilulame,P’andongo biimu biobe bia kululama.  8  Nakatumikila miiya yobe. T’onsumbushenanga namu bua loso. ב [Bete]  9  Mbikunyi bilombene nsongualume kulama eshinda diaye ditooshibue? Mp’aye kuilama, na kukita mianda muyile eyi diobe. 10  Nakukimbi n’eshimba diande dioso. Totadilanga namu nyende kula na miiya yobe. 11  Muishimba diande nataa eyi diobe na muulo ukata,Bua’shi ntshikukitshinanga muluisho. 12  Otumbishibue, Ô Yehowa,Ndongieshe namu miiya yobe. 13  Na milomo yande nakakulaPabitale biimu bioso biodi mutshibe. 14  Nasankaa bua mitentekiesho yobeKukila bingi bintu bioso bia muulo. 15  Nanangushena ku* miiya yobeNa nashala mutuule meso ande ku mashinda oobe. 16  Ne mufule ngofu miiya yobe. Ntankalubu eyi diobe. ג [Gimele] 17  Kitshina namu mufubi oobe mianda na kalolo,Bua’shi nshale na muwa na nfubile eyi diobe. 18  Mbuule namu meso bua’shi mmone kaloloMianda ya kukaanya i mu miiya yobe. 19  Ne muenyi muiumbo. Tonfianga namu miiya yobe. 20  Ne na lukalo lukataLua kuuka bitshibilo biobe nsaa yoso. 21  Osaashila ba sha kuitatula,Baba bediibue milua abapambuka ku miiya yobe. 22  Nkatushe namu kapeesha na kusepeshena,Muanda nakokiela mitentekiesho yobe. 23  Sunga nsaa ishale bakunkushi pamune abakula mianda ibubi pabintale,Mufubi oobe anangushena ku miiya yobe. 24  Ne mufule mitentekiesho yobe ngofu,Ayo nyi ayindudika. ד [Dalete] 25  Ne mulale mu lufufi. Ndame namu na muwa muyile eyi diobe. 26  Ne mukulungule mashinda ande, na obe nkungalula,Ndongieshe namu miiya yobe. 27  Nkuashe namu mpushe akipatuula mayi oobe,Bua’shi mmone bia kunangushena ku* midimo yobe ya kukaanya. 28  Nkuete kukutua tulo pa muanda wa kinyongua. Nyingishe namu muyile biodi muakule. 29  Katusha namu eshinda dia madimi diende kula nami,Ndeshe namu kalolo pa kundongiesha miiya yobe. 30  Ne musangule eshinda dia lulamato. Nanguku’shi biimu biobe bi buwa. 31  Ne mulamate ngofu ku mitentekiesho yobe. Ô Yehowa, totadilanga namu’shi nkuatshikie buufu. 32  Nakalondo n’eshimba dimune eshinda dia miiya yobe,Muanda wemuiyipetele mbalo muishimba diande.* ה [He] 33  Ô Yehowa, ndongieshe namu eshinda dia miiya yobe,Na nakedilondo mpa na ku nfudiilo. 34  Mpe namu lushinguluiloBua’shi mmone bia kufubila miiya yobe,Na kuiyilama n’eshimba diande dioso. 35  Nkunkushe namu muishinda dia miiya yobe,Muanda napetela muloo wande muanka. 36  Takula namu eshimba diande ku mitentekiesho yobe,Tueditakulanga ku luabi. 37  Kumba namu meso ande, bua’shi taatalanga ku bintu bia bisumanga. Ndame namu muishinda diobe. 38  Kumbasha namu mulayilo oobe oodi mukite kui mufubi oobe,Bua’shi bantu bamone bia kukutshina.* 39  Katusha namu buufu buankuete kutshina,Muanda biimu biobe bi buwa. 40  Tala biandi mufule ngofu mayi oobe. Ondame na muwa mu kululama kobe. ו [Wawe] 41  Ô Yehowa, ndeshe namu kifulo kiobe kia lulamato,Na kipandilo kiobe, muyile mulayilo oobe.* 42  Paapa nakamono bia kualula yawa kuete kunkaa mulomo,Muanda ne mutuule lukulupilo luande mu eyi diobe. 43  Tokatushanga namu eyi dia binyibinyi mukanua muande,Muanda ne mukulupile mu biimu biobe. 44  Nakalama miiya yobe nsaa yoso,Bua loso. 45  Na nakatambukila mu mbalo ishi masaku,Muanda nkuete kukimba mayi oobe. 46  Nakakula pabitale mitentekiesho yobe kumpala kua ba nfumu,Na tankapusha buufu. 47  Ne mufule miiya yobe ngofu,Oolo, ne muiyifule. 48  Nakeele maboko ande muiyilu bua miiya yobe yandi mufule,Na nakanangushena ku* mayi oobe. ז [Zayine] 49  Tentekiesha namu eyi* dibolunguile mufubi oobe,Ku bukuashi buadio, we mumpe lukulupilo. 50  Adio nyi adinyingisha mu kinyongua kiande,Muanda eyi diobe adindama na muwa. 51  Bantu ba sha kuitatula abansepe na kapeesha koso,Kadi ntshi mupambukie mu miiya yobe. 52  Ô Yehowa, natentekiesha biimu biobe bia kala,Na abinyingisha. 53  Nsungu ibukopo nginkuate pa muanda wa bantu babi,Bano abasumbushena miiya yobe. 54  Mayi oobe e bu ngono yandeMbalo yoso yandi mushale.* 55  Bufuku, natentekiesha eshina diobe Ô Yehowa,Bua’shi mmone bia kulama miiya yobe. 56  Kino nyi kiubishi kiande,Muanda ne mulame mayi oobe. ח [Hete] 57  Yehowa nyi nkipindi kiande,Ne mulee bua kulama mayi oobe. 58  Nakuitamina n’eshimba diande dioso,Ndeshe namu kalolo muyile mulayilo oobe.* 59  Ne mutaluule mashinda ande,Bua’shi ngalushe ngua yande mu mitentekiesho yobe. 60  Nkuete kukita mianda bukidi kushi na lulengu,Bua kulama mayi oobe. 61  Mioshi ya bantu bebubi nginganyiine,Kadi ntandubu miiya yobe. 62  Nabukaa munkatshi mua bufuku bua kukutumbula,Muanda wa biimu biobe bilulame. 63  Ne kuuku a baba boso abakutshinyi,Na baba abalama mayi oobe. 64  Ô Yehowa, nsenga ngiwule na kifulo kiobe kia lulamato. Ndongieshe namu miiya yobe. ט [Tete] 65  We mukitshine mufubi oobe mianda na kalolo,Ô Yehowa, muyile eyi diobe. 66  Ndongieshe namu binangu bibuwa na kiukilo,Muanda ne mukulupile mu miiya yobe. 67  Kumpala kua’shi nkiengieshibue, naadi napambuka,Anka binobino nalama mayi oobe. 68  We buwa, na midimo yobe i buwa,Ndongieshe namu miiya yobe. 69  Bantu ba sha kuitatula abanduishila nkumo yande pa kumpalakesha mianda ya madimi,Kadi natumikila mayi oobe n’eshimba diande dioso. 70  Mashimba aabo ngapape,Anka ami ne mufule miiya yobe ngofu. 71  Bi buwa bu biangikeele mukiengieshibue,Bua’shi mmone bia kulonga miiya yobe. 72  Miiya yodi muiwukishe bantu i buwa buande’mi,I buwa kukila binunu na binunu bia ôlo na bia kiamo kia arja. י [Yode] 73  Maasa oobe nyi abaadi ankite na ao nkumbumba,Mpe namu lushinguluiloBua’shi mmone bia kulama miiya yobe. 74  Baba abakutshinyi pabammono abapusha muloo. Muanda eyi diobe ndukulupilo luande.* 75  Ô Yehowa nauku’shi biimu biobe mbilulame,N’ashi we munkiengieshe pa muanda wa lulamato lobe. 76  Kifulo kiobe kia lulamato kinyingishe namu,Muyile mulayilo oodi mukite kuandi’mi mufubi oobe. 77  Ndeshe namu kalolo kobe bua’shi ntungunukie na kuikala na muwa,Muanda ne mufule miiya yobe ngofu. 78  Bantu ba sha kuitatula bakuatshikie buufu,Muanda bakuete kunkitshina bibubi kushi muanda.* Anka ami nakanangushena ku* mayi oobe. 79  Baba abakutshinyi balukiile kuandi,Baba abauku mitentekiesho yobe. 80  Eshimba diande dikale dishi matope pa kulonda miiya yobe,Bua’shi ntshikuatshikanga buufu. כ [Kafe] 81  Ne na lukalo lukata lua kipandilo kiobe,Muanda eyi diobe nyi ndukulupilo luande.* 82  Meso ande aatengiela ngofu eyi diobe,Pankiangakula’shi: “Okanyingisha nsaa kinyi?” 83  Muanda n’enka bu mulangi wa musokia uume na miishi,Kadi ntandubu miiya yobe. 84  Abitungu mufubi oobe atengiele munda mua mafuku bungi kinyi? Nsaa kinyi yokatshibila baba abankiengiesha kiimu? 85  Bantu ba sha kuitatula mbambunduile mena,Baba bash’abatshinyi miiya yobe. 86  Miiya yobe yoso ngia kukulupila. Bantu abankiengiesha kushi muanda; nkuashe namu! 87  Abekalanga pepi na kunshimisha pa nsenga,Kadi ntshi musumbushene mayi oobe. 88  Ndame namu na muwa pa muanda wa kifulo kiobe kia lulamato,Bua’shi mmone bia kulama mitentekiesho yodi muakule. ל [Lamede] 89  Ô Yehowa, eyi diobeAdikala kuanka muiyilu bua loso. 90  Lulamato lobe lui kuanka munda mua bipungo bioso,We munyingishe nsenga bi bukopo bua’shi itungunukie na kuimana. 91  Ku bukuashi bua biimu biobe, mbishale* kuanka mpa na lelo,Muanda bioso abikufubila. 92  Su ntshinadia kuikala mufule ngofu miiya yobe,Nadia kushimina mu makienga ande. 93  Ntanandube mayi oobe,Muanda ku bukuashi buawo, we mundame na muwa. 94  Ne muntu oobe, mpaashe namu,Muanda ne mukimbe mayi oobe. 95  Bantu bebubi abakimbi kunshimisha,Kadi ne mutuule binangu biande bioso ku mitentekiesho yobe. 96  Ne mumone’shi kupuidika koso kui na mikalo,Kadi miiya yobe tayi na mikalo. מ [Meme] 97  Ne mufule miiya yobe ngofu! Na nanangushenaa ku yanka munda mua efuku dishima. 98  Miiya yobe ayingikasha na binangu kukila beshikuanyi bande,Muanda ayinkunkusha bua loso. 99  Ne na binangu bibungi kukila balongieshi bande boso,Muanda nanangushenaa ku* mitentekiesho yobe. 100  Nakitshi mianda na binangu kukila bantu bakulu,Muanda nafubila mayi oobe. 101  Ne mupele kutambukila muishinda dioso dibubi,Bua’shi mmone bia kulama eyi diobe. 102  Ntshi mukatukie mu bitshibilo biobe,Muanda we mundongieshe. 103  Mayi oobe e nsaasa mu kilakalaka kiande,E buwa mukanua muande kukila buuki. 104  Kukiila ku mayi oobe nakitshi mianda na binangu. Nyi buakinyi ne mushikue eshinda dioso dia madimi. נ [Nune] 105  Eyi diobe nyi elampi bua ngua yande,Na etaata bua eshinda diande. 106  Ne mukite mutshipo na nakeulombasha,Bua kufubila biimu biobe bia kululama. 107  Ne mukiengieshibue ngofu. Ô Yehowa, ndame namu na muwa muyile eyi diobe. 108  Ô Yehowa, sankila namu milambu yande ya ntumbo* yantusha mu kukumiina kuande,Na ondongieshe namu biimu biobe. 109  Muwa wande wi mu masaku* nsaa yoso,Kadi ntshi mulube miiya yobe. 110  Bantu bebubi mbantee muteo,Kadi ntshi mupambukie ku mayi oobe. 111  Nataa mitentekiesho yobe bu bupianyi* buande nsaa yoso,Muanda ngikale muloo w’eshimba diande. 112  Ne muate kitshibilo kia kukokiela mayi oobeNsaa yoso, mpa na ku nfudiilo. ס [Sameke] 113  Ne mushikue bantu* be na mashimba abidi,Anka ne mufule miiya yobe. 114  Obe we kifuamino kiande na ngabo ande,Muanda eyi diobe nyi ndukulupilo luande.* 115  Ikalayi kula nami anue bantu bebubi,Bua’shi mmone bia kutumikila miiya y’Efile Mukulu ande. 116  Nkuatshishene namu nka bu bibolayile,*Bua’shi ntungunukie na kuikala na muwa,Totadilanga lukulupilo luande lualulukie lufikie lua bisumanga.* 117  Nkuatshishene namu bua’shi mpaashibue,Biabia nekala mutuule binangu biande ku miiya yobe nsaa yoso. 118  Osumbushenaa baba boso abapambuka ku miiya yobe,Muanda mbantu ba sha madimi na abadimbishenaa. 119  Okatusha bantu boso bebubi ba pa nsenga nka bu butshafu bua kiamo bua bisumanga. Nyi buakinyi ne mufule mitentekiesho yobe. 120  Moo onkuatshisha aunsushisha mbidi,Ne na moo bua biimu biobe. ע [Ayine] 121  Ne mukite mianda ibuwa na ilulame. Tontuulanga namu mu maasa mua bantu abankiengiesha. 122  Shinkamiisha namu mufubi oobe’shi ekala biya,Ba sha kuitatula tabankiengieshanga namu. 123  Meso ande abakooko pa muanda wa kutengiela kipandilo kiobe,Na pa muanda wa kutengiela mulayilo oobe wa kululama. 124  Lesha namu mufubi oobe kifulo kiobe kia lulamato,Na ondongieshe namu miiya yobe. 125  Ami ne mufubi oobe, mpe namu lushinguluilo,Bua’shi mmone bia kuuka mitentekiesho yobe. 126  Nsaa yodia kukita muanda ibakumbana, Ô Yehowa,Muanda mbayipee miiya yobe. 127  Nyi buakinyi ne mufule miiya yobeKukila ôlo, kukila ôlo mukile buwa. 128  Nyi buakinyi namonaa mayi oso aakatukila kodi bu alulame,Ne mushikue eshinda dioso dia madimi. פ [Pe] 129  Mitentekiesho yobe i buwa bukile. Nyi buakinyi neyikokiela. 130  Kufumbula kua mayi oobe akupaanaa etaata,Na kupa bantu bashi na binangu lushinguluilo. 131  Natubula mukanua muande bikata na nayikisha,Muanda ne na lukalo lui bukopo lua miiya yobe. 132  Tadiila kuandi na ondeshe namu kalolo,Muyile kutshiba kobe kua kiimu bua baba bafule eshina diobe. 133  Kunkusha namu matabula ande muyile eyi diobe,Totadilanga kintu su nkimune kibubi kimmune. 134  Mpaashe* namu kui bantu abakiengieshenaa,Na nakalama mayi oobe. 135  Munyikila namu mufubi oobe mpala yobe,Na ondongieshe namu miiya yobe. 136  Mpolo ayingalala ku meso,Muanda bantu t’abalama miiya yobe. צ [Tsade] 137  Ô Yehowa, obe we mululame,Na biimu biobe mbilulame. 138  Mitentekiesho y’otuusha ngilulameNa ngia kukulupila. 139  Katshintshi kandi nako bobe akatembe bu kaalo muishimba diande,Muanda beshikuanyi bande mbalube mayi oobe. 140  Eyi diobe nditooshibue kalolo,Na mufubi oobe mmuidifule. 141  Ami ne muntu a bisumanga na abambepuula,Anka ntshi mulube mayi oobe. 142  Kululama kobe nyi nkululama kua ikalayika,Na miiya yobe ngia binyibinyi. 143  Sunga biekala’shi kinyongua na nkalakashi mbinkuate,Ne nka mufule miiya yobe ngofu. 144  Kululama kua mitentekiesho yobe nkua loso. Mpe namu lushinguluilo bua’shi nekale nka na muwa. ק [Kofe] 145  Nakuitanyina n’eshimba diande dioso, ngalule namu, Ô Yehowa. Nakafubila miiya yobe. 146  Nkuete kukuitanyina, mpaashe namu! Nakalama mitentekiesho yobe. 147  Ne mubuukie kumpala kua bufuku kutooka buandia kudila bua kukimba bukuashi,Muanda mayi oobe nyi ndukulupilo luande.* 148  Kumpala kua bufuku kutooka nabuula meso ande,Bua’shi mmone bia kunangushena* kuiyi diobe. 149  Teemesha namu eyi diande pa muanda wa kifulo kiobe kia lulamato. Ô Yehowa, ndame namu na muwa muyile kululama kobe. 150  Baba bepane mu muikelo wi buufu* babefubuila,Be kula na miiya yobe. 151  We pepi nami, Ô Yehowa,Na miiya yobe yoso ngia binyibinyi. 152  Naadi muukie kubanga kala pabitale mitentekiesho yobe’shi,Bodi muiyituule buayidia kuikala kuanka bua loso. ר [Reshe] 153  Tala namu makienga ande na ompaashe,Muanda ntshi mulube miiya yobe. 154  Nkaluile namu na ompaashe,Ndame namu na muwa mu kuipushena na mulayilo oobe.* 155  Kipandilo ki kula na bantu babi,Muanda t’abakimbi miiya yobe. 156  Lusa lobe ndukata, Ô Yehowa. Ndame namu na muwa mu kuipushena na kululama kobe. 157  Bantu abankiengiesha na beshikuanyi nami be bungi,Kadi ntshi mupambukie ku mitentekiesho yobe. 158  Pantala ba nsesa, nebapushaa butete,Muanda tambalame mayi oobe. 159  Tala biandi mufule mayi oobe! Ô Yehowa, ndame namu na muwa pa muanda wa kifulo kiobe kia lulamato. 160  Eyi diobe dioso dishima mbinyibinyi,Na biimu biobe bioso bia kululama bi kuanka bua loso. ש [Sine] sunga [Shine] 161  Bakunkushi abankiengiesha kushi muanda,Kadi eshimba diande ndishimate mu kutshina mayi oobe. 162  Ne na muloo mu mayi oobeNka bu muntu bapete bintu bibungi bipaulue mu ngoshi. 163  Ne mushikue madimi n’eshimba diande dioso,Anka ne mufule miiya yobe. 164  Nakutumbishaa misango musambobidi kuifuku,Pa muanda wa biimu biobe bilulame. 165  Butaale buibungi bui kui baba bafule miiya yobe,Takui kintu su nkimune kilombene kuibakokosha.* 166  Ô Yehowa, ne mukulupile bikitshino biobe bia kipandilo,Na natumikila miiya yobe. 167  Ne mulame mitentekiesho yobe,Na ne muiyifule ngofu. 168  Nakokielaa mayi oobe na mitentekiesho yobe,Muanda oukaa bioso biankitshi. ת [Tawe] 169  Kudila kuande kua kuteka bukuashi kufikie namu kodi, Ô Yehowa. Muyile eyi diobe, mpe namu binangu abikatukila muiyi diobe. 170  Luteko luande lua kukuminyibua lufikie namu kumpala kobe. Mpaashe namu nka bu bibodi mulee.* 171  Milomo yande iule na ntumbo,Muanda we mundongieshe miiya yobe. 172  Ludimi luande luyimbe pabitale eyi diobe,Muanda miiya yobe yoso ngilulame. 173  Mboko yobe ikale namu na bukidi bua kunkuasha,Muanda ne musangule bua kukokiela mayi oobe. 174  Ne na lukalo lukata na kipandilo kiobe, Ô Yehowa,Na ne mufule miiya yobe ngofu. 175  Ndekieele namu nshale na muwa bua’shi mmone bia kukutumbisha,Biimu biobe bikale bukuashi buande. 176  Natambakana nka bu mukooko ushimine. Kimba namu mufubi oobe,Muanda ntshi mulube miiya yobe.

Mayi e mushi mwesaki

^ Sunga “mbaba abalama lulamato luabo.”
^ Sunga “Nakalongo.”
^ Sunga “kulonga.”
^ Sunga pangi “okitshi bia’shi eshimba diande dikale na lukulupilo.”
^ Sunga pangi “oodi mukite kui bantu abakutshinyi.”
^ Sunga “muyile biodi muakule.”
^ Sunga “nakalongo.”
^ Sunga “mulayilo ubolunguile.”
^ Sunga “Mu nshibo yandi mushale bu muenyi.”
^ Sunga “eyi diobe.”
^ Sunga “Natengiela eyi diobe.”
^ Sunga pangi “kunkitshina bibubi pa kundimbiila.”
^ Sunga “nakalongo mayi oobe.”
^ Sunga “natengiela eyi diobe.”
^ Kuamba’shi, “mudimo waye oso wa kupanga ngushale.”
^ Sunga “nalongaa.”
^ Kish ku kish. “milambu ya mu kukumiina kuande ya mukanua muande.”
^ Sunga “anyima ande e mu maasa muande nsaa yoso.”
^ Sunga “bupianyi buande bua loso.”
^ Sunga “bantu be na mashimba eabuule.”
^ Sunga “natengiela eyi diobe.”
^ Sunga “muyile biodi muakule.”
^ Sunga “nkuatshishibue buufu.”
^ Sunga “Nkuule.”
^ Sunga “natengiela mayi oobe.”
^ Sunga “kulonga.”
^ Sunga “muikelo wi butete.”
^ Sunga “eyi diobe.”
^ Sunga “Buabo, takui kikokoshi kia kuibakokosha.”
^ Sunga “nka bu bibodi muakule.”

Copyrights for this publication