Musambo 138:1-8
Wa Davide.
138 Nakakutumbisha n’eshimba diande dioso.
Kumpala kua bangi b’efile,Nakayimbi bua kukutumbisha.*
2 Nakayinama ne mutadiile ku ntempelo oobe a kishila,Na nakatumbisha eshina diobe,Pa muanda wa kifulo kiobe kia lulamato na lulamato lobe.
Muanda we mutumbishe eyi diobe n’eshina diobe kunundu kua bingi bintu bioso.*
3 Muifuku dinaadi mukuitamine bodi mungalule,Obe nkugikasha mukankamane na munyingie.
4 Ba nfumu boso ba pa nsenga abakakutumbisha Ô Yehowa,Muanda abakapusha milayilo yodi mulee.
5 Abakayimbi pabitale mashinda a Yehowa,Muanda ntumbo ya Yehowa ngikata.
6 Sunga biekala’shi Yehowa e muiyilu mula, amonaa muntu muiyishe,Kadi muntu sha kuitatula, amuiwukila penda ku bula.
7 Sunga pantambukila mu masaku, ondama na muwa.
Olola eyasa diobe bua kunkaluila ku nsungu ya beshikuanyi bande.
Eyasa diobe dibalume andimpaasha.
8 Yehowa akalombasha mpango yaye yoso buande,Ô Yehowa, kifulo kiobe kia lulamato ki kuanka bua loso.
Tolubanga namu mufubo wa ku maasa oobe.
