Musambo 107:1-43
107 Tumbulayi Yehowa muanda e buwa,Kifulo kiaye kia lulamato ki kuanka bua loso.
2 Baba boso babadi bakuule kui Yehowa bakule bino,Baba baadi mukuule kuiyasa dia muishikuanyi,
3 Baba baadi mukatushe mu maumbo ebabunga,Ba kutunduka nguba na kupona nguba,Ba kunundu na kuushi.
4 Babaadi abatambakana mu kabaaka mushi bantu,Tababapetele eshinda dia kuenda mu kibundi kibaabadia kushala.
5 Babaadi na nsala na nyota,Na babaadi abakiebe kupona kimpokotshi pa muanda wa kupungila.
6 Babatungunukile na kudila kui Yehowa mu makienga aabo,Aye nkuibapaasha ku malua aabo akata.
7 Baadi muibatambushe muishinda dibuwa,Bua’shi bakafikie mu kibundi kiabadia kushala.
8 Bantu boso batumbule Yehowa pa muanda wa kifulo kiaye kia lulamato,Na midimo yaye ya kukaanya yadi mukitshine bana ba bantu.
9 Muanda baadi mupue nyota ya baba be na nyotaNa nkuikutshisha be na nsala na bintu bibuwa.
10 Bangi babaadi bashale mu mufito wibukopo,Babaadi mu lukano abakiengieshibua na mbanyibue nkano.
11 Pa muanda babaadi batombokiele eyi di’Efile Mukulu,Abo nkukutua kanemo bua elango dia Sha Kuiyilu Kula.
12 Biabia aye nkukuatshisha mashimba aabo buufu pa kuibatumina makienga,Babaadi bakokole, na takubaadi muntu su ngumune a kuibakuasha.
13 Babayitanyine Yehowa buadia kuibakuasha mu makienga aabo,Aye nkuibapaasha ku malua aabo akata.
14 Bebatushile mu mufito wibukopo,Na nkutshiba nkano yabo.
15 Bantu boso batumbule Yehowa pa muanda wa kifulo kiaye kia lulamato,Na midimo yaye ya kukaanya yadi mukitshine bana ba bantu.
16 Muanda mmutshokole biibi bia kiamo,Na nkutshiba bibayilo bia kiamo.
17 Babaadi bakutue binangu na abo nkukiengaPa muanda wa miluisho na bilubilo biabo.
18 Tababaadi na nsala bua kintu kia kudia su nkimune,Babaadi pepi na biibi bia lufu.
19 Babaadi abetanyina Yehowa buadia kuibakuasha mu makienga aabo,Baadi ebapaasha ku malua aabo akata.
20 Baadi atumu eyi diaye bua kuibapaasha,Na kuibatuusha mu mena mubaabadi bapone.
21 Bantu boso batumbule Yehowa pa muanda wa kifulo kiaye kia lulamato,Na midimo yaye ya kukaanya yadi mukitshine bana ba bantu.
22 Balambule milambu ya lutumbuNa baukishe midimo yaye na misaase ya muloo.
23 Baba abatambukila pa tulunga tua mema mu mashuwa,Abakitshina midimo yabo pa mema akata,
24 Mbamone midimo ya YehowaNa midimo yaye ya kukaanya i mu kalunga ka mema,
25 Mushindo awibuaa kipapi ku bukuashi bu’eyi diaye,Akibuesha mbundambunda ya kalunga ka mema.
26 Mbundambunda ayibakaamisha muiyilu,Na akupu abeyinyi muushi mua kalunga ka mema.
Ababofula ku mashimba pa muanda wa masaku akata aakimbi kuibafikila.
27 Abalunduka nka bu muntu mukolue maalua,Na mayele aabo oso t’aakuasha ku kintu su nkimune.
28 Biabia abedidi kui Yehowa mu makienga aabo,Na aye namu ebapasha ku malua aabo akata.
29 Ayimika kipapi,Mbundambunda ya mema ayishala iumiine.
30 Abasanka apatuele butaale,Na ebakunkusha kuifua diabakumiina.
31 Bantu boso batumbule Yehowa pa muanda wa kifulo kiaye kia lulamato,Na midimo yaye ya kukaanya yadi mukitshine bana ba bantu.
32 Bamusamune munkatshi mua bantu bebungieNa bamutumbishe mu kishalelo kia bantu bakulu.
33 Aluula misulo ya mema bu kaabakaNa nsulo ya mema bu nsenga yume,
34 Aluula nsenga ayituushaa bia kudia bu nsenga ya mungua ish’ayituushaa bintu,Pa muanda wa bubi bua bantu bemushale.
35 Aluula kabaaka bu mashiba a mema e na malengie,Na nsenga yume bu nsulo ya mema.
36 Akuasha bantu be na nsala buabadia kushala muanka,Bua’shi bamone bia kutuula kibundi kiabadia kushalela.
37 Abadimi mafuba na abakunu mitshi ya nfinyo,Aa mafuba aatusha biumbuluanga bibungi.
38 Ebelela miabi na abefuimena ngofu,T’atadila ngombe yabo buayidia kupeela.
39 Akupu abapeele dingi na abakuatshishibua buufuPa muanda wa makienga, mpombo na kinyongua.
40 Abepulaa bantu ba kinemo,Na ebaumbakashaa mu kabaaka mushi mashinda.
41 Kadi akaluila* balanda ku kukiengieshibuaNa afuimisha bifuko biabo nka bu kisaka kia mikooko.
42 Bantu balulame abamono bino na abasanka,Anka bantu bashi balulame abafungu mukanua muabo.
43 Yawa oso e na binangu akatalula ino miandaNa akele binangu kalolo ku bikitshino bia kifulo kia lulamato bia Yehowa.
Mayi e mushi mwesaki
^ Sunga “atuulaa kuiyilu,” kuamba’shi mbalo yabasha kufika kui muntu.
