Musambo 9:1-20
Kui mukunkushi, a Mute-Labene.* Musambo wa Davide.
א [Alefe]
9 Ô Yehowa, nakakutumbisha n’eshimba diande dioso,Nakakula pabitale midimo yobe yoso ya kukaanya.
2 Nakekala na muloo na kusankila modi,Nakayimbi misambo* bua kutumbisha eshina diobe, Ô Sha Kuiyilu Kula.
ב [Bete]
3 Nsaa ayikalukiila beshikuanyi bande kumongo,Abakapono na kushimina kumpala kobe.
4 Muanda okangakuila mu kilumbu kiande kilulame;We mushale mu nkuasa oobe a bufumu, osambisha na kululama.
ג [Gimele]
5 We musaashile miilo na kubutula bantu be bubi,We mushime eshina diabo bua loso.
6 Beshikuanyi mbabutudibue bua loso;We muluishe bibundi biabo bioso,Na t’abakebatentekiesha dingi.
ה [He]
7 Anka, Yehowa mmushale mu nkuasa aaye a bufumu bua loso,Mmunyingishe bibukopo nkuasa aaye a bufumu bua kululama.
8 Akasambisha ba pa nsenga boso na kululama,Akaata bitshibilo bia kululama bua miilo yoso.
ו [Wawe]
9 Yehowa akafiki bu kifuamino kinyingishibue bua yawa kuete kukiengieshibua,Na bu kifuamino mu nsaa ya dikienga.
10 Baba abauku eshina diobe, abakakulupila modi,Ô Yehowa! T’okasumbushena baba abakukimbi.
ז [Zayine]
11 Imbayi bua kutumbisha Yehowa, aye mushale mu Siyona,Ukishayi bikitshino biaye munkatshi mua miilo.
12 Muanda Yawa aobuela mase aabo ebatentekiesha,T’akalubu kudila kua baba be mu mpombo.
ח [Hete]
13 Ndeeshe namu lusa, Ô Yehowa, omone malua aanfuishila baba banshikue,Obe antuusha ku biibi bia lufu,
14 Bua’shi ngukishe bikitshino biobe bilombene kutumbishibua ku biibi bia nsonguakashi a Siyona,Na nsankie mu bikitshino biobe bia kipandilo.
ט [Tete]
15 Miilo ibapono mu buina buayikalanga ibundule,Na ngua* yabo ibakuatshika mu bukondia buayikalanga ifuamishe.
16 Yehowa mmuwukiibue kukiila ku biimu biayikalanga mutshibe.
Bantu be bubi mbakuatshikie mu kateo, kukiila ku mudimo wa maasa aaye.
(Higayone.* Sela)
י [Yode]
17 Bantu be bubi abakalukiila kumongo batadiile mu Mashama,*Muamua nyi amukende miilo yoso ayilubu Efile Mukulu.
18 Anka balanda t’abakalubibua bua loso,Na lukulupilo lua muntu muiyishe t’alukashimina.
כ [Kafe]
19 Ebuee, Ô Yehowa! T’otadilanga muntu afuiyaa bua’shi akukambile.
Miilo ayikasambishibua kumpala kobe.
20 Ebakuatshishe moo, Ô Yehowa,Bua’shi miilo iukie’shi be nka penda bantu abafuiyaa. (Sela)
