Musambo 66:1-20
Kui mukunkushi. Loono. Musambo.
66 Elayi misaase ya muloo kui Efile Mukulu, anue bantu boso ba pa nsenga.
2 Imbayi* bua kusamuna eshina diaye dia ntumbo.
Nyishayi kutumbisha ntumbo yaye.
3 Lungulayi Efile Mukulu’shi: “Midimo yobe ngia kukaanya!
Muanda wa bukome bobe bukata,Beshikuanyi bobe abakafiki na kusuusa kumpala kobe.
4 Nsenga yoso ishima ayikakuinamina.
Abakayimbi bua kukutumbisha.
Abakayimbi bua kutumbisha eshina diobe.” (Sela)
5 Fikayi numone midimo ya Efile Mukulu.
Mianda yaye yadi mukitshine bana ba bantu ngia kukaanya.
6 Baadi mushintuule kalunga ka mema ako nkufika bu nsenga yume.
Babaadi basabukie muela lua ngua.
Paapa tubaadi na muloo pa muanda waye.
7 Akunkusha bua ikalayika ku bukuashi bua bukome buaye.
Meso aaye ngashale abekiele kui miilo.
Baba be na mitue ibukopo, t’abitungu’shi betumbishe. (Sela)
8 Tumbishayi Efile Mukulu eetu anue bantu,Na tuleo tua ntumbo yaye tupushikie.
9 Mmuitulame na muwa.
Na ta mutadiile ngua yetu buayidia kukokola.
10 Muanda we muitutaluule, Ô Efile Mukulu.
Anka bu biabalumbuulaa* kalolo kiamo kia arja, biabia we muitulumbuule.
11 We muitutueshe mu bukondia.
Na obe nkuitutenteka kiita ki bushito.
12 Bodi mutadiile bua’shi muana a muntu etuashine.
Tui bakidile mu kaalo na mu mema.
Akupu, obe nkuitutuala mu mbalo ya kuikiisha.
13 Nakafiki mu nshibo yobe na milambu ya kushiika kaalo yoso ishima.
Nakalombasha mitshipo yande kodi,
14 Yaaya ibaadi milomo yande ilee,Na ibaadi mukanua muande muakule panadi mu dikienga.
15 Nakakulambula milambu ya kushiika kaalo ya nyema i muimu,Na miishi ya mulambu wa mikooko ilume.
Nakakulambula ngombe ilume na bipembue. (Sela)
16 Fikayi nuteemeshe, anue boso abatshinyi Efile Mukulu,Nakenulungula mianda yadi munkitshine.
17 Naadi mumuitamine na kukanua kuande,Na ami nkumutumbisha na ludimi luande.
18 Su naadi mulame muanda wibubi muishimba muande,Yehowa tabadia kunteemesha.
19 Anka Efile Mukulu baadi munteemeshe,Aye nkutuula binangu biaye ku luteko luande.
20 Efile Mukulu atumbishibue, aye shi musumbushene luteko luande,Sunga kuikanda bua kundeesha kifulo kiaye kia lulamato.
