Musambo 51:1-19
Kui mukunkushi. Musambo wa Davide, pabaadi mutemuki Natane mufikie kuadi kunyima kua Davide kulala Bate-sheba.
51 Ndeshe namu lusa, Ô Efile Mukulu, muyile kifulo kiobe kia lulamato.
Shima namu kuipaa kuande kua miiya muyile lusa lobe lukata.
2 Ntumpe namu kalolo ku kilubilo kiande kioso,Na ontooshe ku muluisho wande.
3 Muanda nauku kalolo kuipaa kuande kua miiya,Na muluisho wande wi kumpala kuande* nsaa yoso.
4 Kumpala kua bioso, obe nyi andi mukitshine muluisho.
Ne mukite kiakia kibubi ku meso kobe.
Biabia wekala mululame p’okula,Muanda otshibaa biimu na kululama.
5 Talanga! Ne mutandiibue mupiile,Na nyinami baadi mungimite mu miluisho.*
6 Talanga! Obe osankilaa bia binyibinyi bi muishimba dia muntu,Ndongieshe namu bua’shi eshimba diande dikale na binangu bia binyibinyi.
7 Ntooshe namu ku muluisho wande na ka mutshi ka izope, bua’shi nekale mutooshibue,Ntumpe namu bua’shi nekale mutookie soo kukila neje.
8 Kita namu bia’shi mpushe misaase ya muloo na nsankie,Bua’shi mifufua ibodi musoose isankie.
9 Kumba mpala yobe* ku miluisho yande,Na oshime bilubilo biande bioso.
10 Ô Efile Mukulu, panga namu munda muande eshimba diselele,Na otuule munda muande kikudi kipia akinkuasha bua kuikala na lulamato.
11 Tonsumbushenanga kula nobe,Na tonkatushanga kikudi kiobe kiselele.
12 Alushuula muandi muloo wa kupaashibua nobe,Busha namu muandi lukalo lua kukukookiela.*
13 Nakalongiesha bantu abayipaa miiya mashinda oobe,Bua’shi bankitshishi ba miluisho balukile kodi.
14 Mpaashe namu ku ebasa dia mase, Ô Efile Mukulu, obe Efile Mukulu a kipandilo kiande,Bua’shi ludimi luande luukishe kululama kobe na muloo oso.
15 Ô Yehowa, fungula namu milomo yande,Bua’shi mukanua muande muukishe ntumbo yobe.
16 Muanda t’okumiina mulambu, bisumanga nadia kukulambula wanka;T’osanka na mulambu wa kushiika kaalo oso ushima.
17 Milambu ayisankisha Efile Mukulu nyi mbinangu bifudiile,Eshimba dinyongole na disaasukie, Ô Efile Mukulu, t’okedisumbushena.
18 Mu kalolo kobe, kitshina namu Siyona mianda ibuwa,Ibaka bimano bia Yelusalema.
19 Paapa okasangela milambu ya kululama,Milambu ya kushiika kaalo na milambu ishima;Paapa abakalambula ngombe ilume ku kilambuilo kiobe.
