Musambo 25:1-22
Wa Davide.
א [Alefe]
25 Ô Yehowa, kodi nyi kuandi mutadiile.
ב [Bete]
2 Efile Mukulu ande, ne mukulupile modi,Totadilanga namu’shi nkuatshikie buufu.
Totadilanga bua’shi beshikuanyi bande basankie bua makienga ande.
ג [Gimele]
3 Mbinyibinyi, takui muntu su ngumune akulupila modi akakuatshika buufu,Kadi buufu abukakuata baba boso abakitshi mianda na bunsesa kushi kabingilo.
ד [Dalete]
4 Ngukishe namu mashinda oobe, Ô Yehowa;Ndongieshe namu mashinda oobe.
ה [He]
5 Nkuashe namu bua kutambukila mu bia binyibinyi biobe na ondongieshe,Muanda we Efile Mukulu a kipandilo kiande.
ו [Wawe]
Ne mukulupile modi munda mu’efuku dishima.
ז [Zayine]
6 Tentekiesha namu lusa lobe, Ô Yehowa, na kifulo kiobe kia lulamato,Bioleshaa* mafuku oso.
ח [Hete]
7 Totentekieshanga namu miluisho yande ya ku bukinga na bilubilo biande.
Ntentekieshe namu muyile kifulo kiobe kia lulamato,Pa muanda wa kalolo kobe, Ô Yehowa.
ט [Tete]
8 Yehowa e buwa na mmululame.
Nyi buakinyi alongiesha bankitshishi ba miluisho eshinda diabadia kulonda.
י [Yode]
9 Akunkusha bantu beyishe bua kukita mianda ilulame,Na akalongiesha beyishe eshinda diaye.
כ [Kafe]
10 Mashinda oso a Yehowa ngaule na kifulo kia lulamato na lulamato,Bua baba abalama kilombeno kiaye na mitentekiesho yaye.
ל [Lamede]
11 Pa muanda w’eshina diobe, Ô Yehowa,Nfuile namu lusa bua kilubilo kiande, sunga mbiakidi kikata.
מ [Meme]
12 Su muntu atshinyi Yehowa,Aye namu akamulongiesha eshinda diadia kusangula.
נ [Nune]
13 Mianda ibuwa ayikamufuila,Na bana* baye abakapiana nsenga.
ס [Sameke]
14 Yehowa adiyaa bu kuuku bui bukopo na baba abamutshinyiNa ebaukishaa kilombeno kiaye.
[Ayine]
15 Meso ande ngatadiile nsaa yoso nka kui Yehowa,Muanda akapososha ngua yande mu bukondia.
פ [Pe]
16 Tadiisha namu mpala yobe kuandi na ondeshe kalolo,Muanda ne bupenka na takui muntu a kunkuasha.
צ [Tsade]
17 Kinyongua kibafuimi muishimba diande;Mpososhe namu ku nkalakashi yande.
ר [Reshe]
18 Tala namu dikienga diande na malua ande,Na onfuile namu lusa ku miluisho yande yoso.
19 Tala bibafuimi beshikuanyi bandeNa abakiebe kunkitshina bibubi muanda mbanshikue.
ש [Shine]
20 Lama namu muwa wande na ompaashe.
Totadilanga’shi nkuatshikie buufu, muanda ne mufuamine modi.
ת [Tawe]
21 Kululama na kukutua kuande kua matope binkaluile,Muanda ne mukulupile modi.
22 Ô Efile Mukulu, paasha* namu Isalele ku makienga aaye oso.
