Musambo 18:1-50
Kui mukunkushi. Ku bukuashi bua Davide mufubi a Yehowa, baadi muyimbile Yehowa mayi a uno musambo muifuku dibaadi Yehowa mumupaashe ku maasa a beshikuanyi baye boso na ku maasa a Saule. Bambile’shi:
18 Ne na kifulo kikata bobe Ô Yehowa, obe nyi ampeyaa bukome.
2 Yehowa ndubuebue luande na kifuamino kiande, aye nyi ampaasha.
Efile Mukulu ande nyi ebue diande, muanfuamina,Nyi ngabo yande, na lusengua* lua kipandilo* kiande, mbalo yande ya kufuamina.
3 Nayitanyina Yehowa, aye mukumbene ntumboNa nakapaashibua kui beshikuanyi bande.
4 Mioshi ya lufu ikeele inganyiine,Mieeshi ya mema ya bantu ba bisumanga ayintshinyishanga.
5 Mioshi ya Mashama* ayikalanga ingifunyishe;Miteo ya lufu, ikeele kumpala kuande.
6 Pangikalanga mu dikienga, naadi muitanyine Yehowa,Naadi mutungunukie na kuidila kui Efile Mukulu ande bua kuteka bukuashi.
Biabia, kukatukila ku ntempelo aaye, bapushile eyi diande,Na kudila kuande kua kukimba bukuashi, kubafikile ku matui aaye.
7 Akupu, nsenga ibabangile kutshinkatshinka na kusuusa,Bitako bia miengie nkusuusaNa abio nkutshinkatshinka, muanda babaadi bamukuatshishe nsungu ibukopo.
8 Muishi ubakamiine, autuukila mu mpembe yaye,Kaalo ke bukopo kabatuukile mukanua muaye,Na makala aatembe ngofu, abatuukile kuadi.
9 Pabayikile, baadi mutonte eyilu,Na mufito wibukopo ubaadi muushi mua ngua yaye.
10 Bakaamine pa mukeluba, na aye nkufika afu’apapamanga.
Pabafikile, bayikile bukidi mukaamine pa mbaba ya kipangua kia mu kikudi.*
11 Akupu baadi muishikiile mufito,Ku mpese yaye yoso nka bu mbalo ya kufuamina,Na mema afiita na makumbi afiita.
12 Mpeshi a mabue na makala a kaaloBibaadi abituuku ku etaata dibaadi kumpala kuaye, bibaadi abisambuka makumbi.
13 Yehowa babangile kukungula muiyilu nka bu kapandapanda.
Sha Kuiyilu Kula bakitshine bia’shi eyi diaye dipushikie,Na mpeshi a mabue na makala a kaalo.
14 Baashile mikietue yaye, aye nkuibapalakasha,Baadi mueleshe mipenyo yaye, aye nkuibatuesha mu kabulakanyi.
15 Muushi mua mema mubamuenekiele,Bitako bia nsenga bibaadi bituushibue patoka, pa muanda wa nsungu yobe, Ô Yehowa,Ku muwa autuuku mu mpembe yobe.
16 Kukatukila muiyilu baadi molole mboko yaye.
Bankuatshile, aye nkuntuusha mu mema e bula.
17 Bampaashile kui muishikuanyi ande mukata,Na kui baba banshikue babaadi na bukome kunkila.
18 Babantukile ngoshi mu efuku diangikalanga mu malua,Anka Yehowa baadi mukuashi ande.
19 Bantuadile mu mbalo ishi masaku,*Bampaashile, muanda baadi munfule.
20 Yehowa anfutu muyile kululama kuande.
Anfutu muanda ntshi musoole muanda.
21 Ne mulame mashinda a Yehowa,Na ntshi mukite muluisho wa kusumbushena Efile Mukulu ande.
22 Bitshibilo biaye bioso bi kumpala kuande,Ntshi mupambukie mu miiya yaye.
23 Nashala kushi matope kumpala kuaye,Na nakelama bua kupela kukita kilubilo.
24 Yehowa anfute muyile kululama kuande,Muyile kukutua kuande kua kusoola muanda kumpala kuaye.
25 Kui muntu e na lulamato, okitshi mianda na lulamato,Kui muntu shi na matope, okitshi mianda kushi matope.
26 Kui yawa oso akitshi mianda ibuwa, obe omukitshinaa nka mianda ibuwa,Anka kui yawa akitaa mianda ituelakane, weleshaa mudimukie.
27 Muanda opaashaa bantu ba sha kuiyisha,*Anka oyishaa ba sha kuitatula.
28 Muanda obe nyi atembesha kimunyi kiande, Ô Yehowa,Efile Mukulu ande nyi ammunyikaa mu mufito.
29 Ku bukuashi bobe, ne kuilondena na kisaka kia bantomboshi,Ku bukome bua Efile Mukulu, ne mulombene kuitumba kimano.
30 Eshinda dia Efile Mukulu a binyibinyi ndipuidikie;Eyi dia Yehowa nditooshibue kalolo.
Aye nyi ngabo kui baba boso abakimbi kifuamino muadi.
31 Muanda nnanyi muikale Efile Mukulu, kukatusha Yehowa?
Na nnanyi muikale ebue, kukatusha nka penda Efile Mukulu eetu?
32 Efile Mukulu a binyibinyi nyi ampeyaa* bukome,Na akalulamisha eshinda diande.
33 Ayikasha mikoolo yande bu ya ntengu,Angimika mu ma mbalo e kuiyilu.
34 Alongiesha maasa ande bia kulua ngoshi,Maboko ande ngalombene kunana buta bua kiamo kia munyinga.
35 Ompa ngabo oobe a kipandilo,Mboko yobe ibalume ayinkuatshishena,Na kuiyisha kobe, akungikasha muntu mukata.
36 Otamishila ngua yande eshinda,Mikoolo yande tayiselemuka nya.
37 Nebingena na beshikuanyi nami na nebakuata,Ntankalukiila mpa na panebashimisha.
38 Nakebafingakasha bua’shi tabebuanga dingi,Abakapono kuushi kua ngua yande.
39 Okampa bukome bua kulua ngoshi,Okaponesha beshikuanyi bande kumpala kuande.
40 Okasuukisha beshikuanyi bande kumpala kuande,*Nakayipaa baba banshikue.
41 Abadidi bua kuteka bukuashi, kadi takui muntu a kuibapaasha,Abeele misaase kui Yehowa, kadi t’ebalula nya.
42 Nebatu bua’shi bashale nka bu lufuufi lui mu lupunga,Nakebasumbula nka bu matekie a mu bilayi.
43 Okampaasha ku bilema biabangamba kui bantu ba mu muilo wande.
Okantuulu bua’shi nekale kunundu kua bisamba,Muilo wanshanguku aukanfubila.
44 Abakankokiela penda bua nkumo yabakapusha,Benyi abakafiki mu kuinama kumpala kuande bua’shi banfubile.
45 Benyi abakabofula ku mashimba,Abakatuuku mu bifuamino biabo bakuete kusuusa.
46 Yehowa e na muwa! Ebue diande ditumbishibue!
Efile Mukulu a kipandilo kiande atumbishibue.
47 Efile Mukulu a binyibinyi angobuela,Atuulu miilo ku bukunkushi buande.
48 Ampaasha kui beshikuanyi bande.
Onkaamisha kunundu kua baba abanduisha,Ompaasha kui muntu sha etombo.
49 Nyi buakinyi nakakutumbisha munkatshi mua miilo, Ô Yehowa!
Na nakayimbi* bua kutumbisha eshina diobe.
50 Akitshi mianda ikata ya kukaanya,* bua kupaasha nfumu aaye,Alesha kifulo kia lulamato kui muedibue muimu aaye,Kui Davide, na kui bekulu* baye bua loso.
Mayi e mushi mwesaki
^ Tala Kipatuluilo kia Bishima.
^ Sunga “mupaashi ande e na bukome.”
^ Sunga “Sheole,” kuamba’shi mashama a bantu boso. Tala Kipatuluilo kia Bishima.
^ Sunga “lupunga.”
^ Sunga “mbalo ikata.”
^ Sunga “bantu babakiengiesha.”
^ Kish ku kish. “anfuadikaa.”
^ Sunga “okampa miongo ya beshikuanyi bande.”
^ Sunga “kuyimba na biombuanga.”
^ Sunga “kutshokola kukata.”
^ Kish ku kish. “Emiino.”
