Musambo 89:1-52
Masikile.* Musambo wa Etane muina Ezera.
89 Nakayimbi pabitale mishindo ya kifulo kia lulamato kia Yehowa bua loso.
Mukanua muande amukaukisha lulamato lobe kui bipungo bioso bia bantu.
2 Muanda nambile’shi: “Kifulo kiobe kia lulamato akikala kuanka bua loso,Na we munyingishe bibukopo lulamato lobe muiyilu.”
3 “Ne mukite kilombeno na musangulue ande,Ne muitshipe kui Davide mufubi ande’shi:
4 ‘Nakakitshi bia’shi lutandua lobe luikale kuanka bua loso,Nakanyingisha nkuasa oobe a bufumu bua bipungo bioso.’” (Sela)
5 Eyilu aditumbisha bintu bia kukaanya biodi mukite, Ô Yehowa,Oolo, kakongie ka beselele bobe akatumbisha lulamato lobe.
6 Muanda nnanyi atudi balombene kupuandikisha na Yehowa muiyilu?
Nnanyi e bu Yehowa munkatshi mua bana ba Efile Mukulu?
7 Efile Mukulu abamutshinaa ngofu mu kakongie ka beselele;Mmukata na akuatshisha baba boso bamuifunyishe moo.
8 Ô Yehowa Efile Mukulu a biluilo,Nnanyi e na bukome bu bobe, Ô Yah?
Lulamato lobe ndukuifunyishe.
9 We na matalua pa mbundambunda ya mema a kalunga aekupila,Apatomboka mbundambunda ya kalunga ka mema weyibatamishaa.
10 We musaasule Rahabe nka bu muntu abadi bayipee.
We mupalakashe beshikuanyi bobe na mboko yobe ibukome.
11 Eyilu ndiobe na nsenga ngiobe;Nsenga ayituushaa bintu na bioso biule panka—nnobe muibipangie.
12 Nnobe mupangie kunundu na kuushi;Muengie wa Tabore na Muengie wa Hermone abitumbisha eshina diobe na muloo oso.
13 Mboko yobe i bukome,Eyasa diobe di bukome,Eyasa diobe dibalume ndikaamishibue.
14 Kululama na kutshiba kua biimu kalolo nyi kitako kia nkuasa oobe a bufumu,Kifulo kia lulamato na lulamato mbimane kumpala kobe.
15 Ba sha muloo mbaba abakutumbisha na misaase ya muloo,Ô Yehowa, abatambukila mu etaata dia mpala yobe.
16 Abasankila muishina diobe munda mua efuku dishima,Na mu kululama kobe nyi muabetumbiisha.
17 Muanda obe we ntumbo ya bukome buabo,Na bu biodi muitukumine, bukome buetu abukatumbishibua.
18 Muanda ngabo eetu afiki kui Yehowa,Na nfumu eetu atuukila kui Eselele a Isalele.
19 Mu kiakia kipungo bodi muakule na ba sha lulamato bobe ku bukuashi bua kimonua, obe nkuamba’shi:
“Ne mupe kilobo kia ngoshi bukome;Na ne mukaamishe musangudibue ande munkatshi mua muilo.
20 Ne mupete Davide mufubi ande,Na namuela muimu na muimu wande wa kishila.
21 Eyasa diande adikamukuatshishena,Na mboko yande ayikamunyingisha.
22 Muishikuanyi su ngumune takamutekie kitadi,Na muntu shi mululame su ngumune t’akamukiengiesha.
23 Nakasooso beshikuanyi baye tupese tupese kumpala kuaye,Na nakayipaa baba bamushikue.
24 Lulamato luande na kifulo kiande kia lulamato bi naye,Na muishina diande, bukome buaye abukakamishibua.
25 Nakatuulu kalunga ka mema muushi mu’eyasa* diaye,Na miela muushi mu’eyasa diaye dibalume.
26 Akangiele musaase’shi: ‘Obe we Nshami,Efile Mukulu ande na Lubuebue lua kipandilo kiande.’
27 Nakamutuulu bu muana mbedi,Mukile bukata a ku ba nfumu ba pa nsenga.
28 Nakalama kifulo kiande kia lulamato kuadi bua loso,Na kilombeno kiande naye ntakilombene kuluila.
29 Nakakitshi bia’shi lutandua luaye luikale kuanka bua loso,Na nakanyingisha nkuasa aaye a bufumu nka bu eyilu.
30 Su bana baye baleka miiya yandeNa bapela kutambukila mu bitshibilo* biande,
31 Su batupilua mayi andeNa bapela kulonda miiya yande,
32 Paapa nakebanyoko na lufimbo bua kukutua kuabo kua kukokiela,Na kuibanyoka na lufimbo lukata bua kilubilo kiabo.
33 Anka, ntankalekie kumulesha kifulo kiande kia lulamato,Sunga kukutua kulombasha mulayilo wande.
34 Ntankaluisha kilombeno kiandeSunga kushintula kibaadi milomo yande yakule.
35 Nemuitshipe mu buiselele buande musango umune bua loso,Ntankadimbi Davide.
36 Lutandua luaye alukashala kuanka bua loso,Nkuasa aaye a bufumu akashala kuanka nka bu nguba kumpala kuande.
37 Akanyingishibua bua loso nka bu nguba,Nka bu kamonyi ka lulamato mu makumbi.” (Sela)
38 Anka obe nabene we mumupele na kumusumbushena,We mukuatshile muedibue muimu oobe nsungu.
39 We muluishe kilombeno kiobe na mufubi oobe,We muluishe kifulu kiaye kia ntumbo pa kuikisumbula mu nsenga.
40 Bobumbula bimano* biaye bioso bia mabue,Bobutula ma mbalo aaye anyingishibue.
41 Boso abakidila muanka abapaula bintu biaye,Na bantu bekungishene naye bakuete kumusepa.
42 We mukite bia’shi beshikuanyi baye batshimune,*Na we mukite bia’shi beshikuanyi baye boso basankie.
43 Dingi, we mualushe lupete luaye lua ngoshi kumongo,Na tue mumukuatshishene mu ngoshi.
44 We mufudiishe ntumbo yaye,Na obe nkuponesha nkuasa aaye a bufumu mu nsenga.
45 We mupeeleshe mafuku a bunsongua buaye,Na we mumukuatshishe buufu. (Sela)
46 Ô Yehowa ofuama mpa na ku nsaa kinyi? Mbua loso su?
Nsungu yobe ayikatungunuka na kutemba nka bu kaalo su?
47 Tentekiesha bi buipi bua muwa wande!
Bodi mupangie bantu boso kushi kabingilo su?
48 Mmuntu kinyi e kuikala na muwa shii mulombene kufua?
E kuikaluila aye nabene* ku bukome bua Mashama* su? (Sela)
49 Ô Yehowa! A bikitshino biobe bia kifulo kia lulamato bia kala bi kuikunyi,Biabia bibodi muitshipe kui Davide mu lulamato lobe?
50 Ô Yehowa! Tentekiesha namu biabakuete kukaa bafubi bobe mulomo,Biandi musemune kukayibua kua miilo yoso,
51 Biabakuete kukaa muedibue muimu oobe kui beshikuanyi bobe, Ô Yehowa,Biabamukaa bua bioso biakitshi.
52 Yehowa atumbishibue bua loso. Amene, Amene.
Mayi e mushi mwesaki
^ Tala Kipatuluilo kia Bishima.
^ Sunga “ku matalua aaye.”
^ Sunga “biimu.”
^ Sunga “bifuamino biaye bia mabue.”
^ Kish ku kish. “we muele mboko ibalume ya beshikuanyi baye muiyilu.”
^ Sunga “kukaluila anyima aaye.”
^ Sunga “Sheole,” kuamba’shi mashama a bantu boso. Tala Kipatuluilo kia Bishima.
